Apocalipsis 12

Ti chojnichjin la ko ti dragón

1Ndá chrꞌéxi̱n mé kꞌuíkua̱n kóhen ijnko nkehe ijié ti nka̱jní: mé ikui ijnko chojnichjin chónta iké tjáki̱ni éxi ña̱o tsjehe la ti nitjó itjen chrínkí ti to̱té tjan la ko tjenkáya ijnko corona chónta teyó konotsé ti ikja tjan. 2Ti chojnichjin i mé í jóhya#12:2 jóhya í jóhya tjan tsochonta tjan ixjan embarazada tjan la tꞌóyako tjan tóxakohen tjan kixin tjoté sinchekokjíhi tjan ti ixjan. 3#Dn. 7:7.*Xrína̱hña kóhen íjnko nkehe ijié ti nka̱jní: mé ikui ijnko dragón kjátse chónta yato ikja la ite ntèé la chónta corona nkojnko ti ikja. 4#Dn. 8:10.*Landá ti ntañé mé kꞌuitja̱tsaxín níxin parte ti konotsé siín nka̱jní la ikꞌue xrákoa chjasintajni. Ndá kjuákꞌe nkayakon ti chojnichjin i séhya sinchekokjíhi ti ixjan kixin tjinkaon sinie ti xjan ti ó tsokjíhi. 5#Is. 66:7; Sal. 2:9.*Ndá ti chojnichjin mé kokjíhi tjan ijnko xjan ndoa. Jehe chꞌan mé tsochónta chꞌan ijnko vara chika tsꞌe̱to̱exín chꞌan kaín nación. Kjánchó ti ixjan kjuínchekokjíhi tjan mé sákjui̱ko Díos ti itjen ti trono kuènté chꞌan. 6Landá ti chojnichjin la kuinká tjan sákjuí tjan nte̱je̱ kixin ntiha itjen ijnko nketí tsjakꞌe tjan tsíkjichꞌéna Díos la ntiha tsoxrajon nkehe sinie tjan iní nánó kotꞌo̱.

7 # Dn. 10:13, 21; 12:1; Jud. 1:9. *Ndá xrína̱hña kꞌuixin ijnko kjuanínkaon ijié ti nka̱jní; mé ti ángel Miguel la ko ti íso sin ángel mé kjuajo̱nko ti dragón la ko ti ángel kuènté ti dragón. 8Kjánchó kjuachahya ti dragón la í xrokjuahya kꞌuejó sin nkaya nka̱jní isé. 9#Gn. 3:1; Lc. 10:18.*Ndá xi̱kaha kuakitsjexín sin nka̱jní ti dragón#12:9 dragón ti konche ósé ikjí mé itꞌin diablo la ko Satanás, ti konche ósé ikjí mé itꞌin diablo la ko Satanás, ti nkexro chꞌiyehe ti chojni siín kuenté chjasintajni la ko kaín ti ángel kuènté, la ikꞌue sin xrákoa chjasintajni.

10 # Job 1:9-11; Zac. 3:1. *Ndá kui̱ha̱n itén ijnko nkexro nkaya nka̱jní itsen ndáchro:

―Ijie la ó ikui ti kjuachón, ti kjuachaxin la ko ti tꞌe̱to̱axín Díos kuènténi la ko ti kjuachaxin kuènté Cristo kixin ó kjuixin kꞌuaxrjexín nka̱jní ti nkexro kuékꞌeka ijie̱ ti kíchóni, ti nkexro kꞌuekjanchia ijie̱ ncha̱kotjin la ko tie nkayakon Díos. 11Ti sin kíchóni mé kjuacha sin kuaá sin kixin ti ijni̱é ti Kolélo kꞌuitjí la ko ti nkehe jína chrónkaxín sin la chrákonhña sin kjónté ikꞌuén sin. 12Méxra̱ ijie la tso̱chéhe̱ ti nka̱jní la ko kaín ti nkexro tjejó ntiha. Kjánchó nóa ti nkexro tjejó chjasintajni la ko ti nda̱ñao kixin ó kꞌuinkajin ti jínahña la imá nínkaon kixin nohe kixin í kanhñó isé itsꞌe.

13A̱ndá ti dragón ti kónohe kixin kꞌuánótje̱xi̱n nka̱jní ndá kjuankíxin chréhe̱ ti chojnichjin kóchónta ijnko xjan ndoa kixin chrókꞌóñá. 14#Dn. 7:25; 12:7.*Kjánchó Díos chjéhe ti chojnichjin yaá ka̱ñe̱ñe̱e ijié kuènté kotjua̱nhnko kixin jína tsjaká tjan sátsji tjan nte̱je̱ tsinkéhe tjan ti dragón. Sátsji tjan la ntiha tsoxrajon nkehe sinie tjan iní nánó kotꞌo̱. 15Ndá ti dragón mé kuakitsjexín irꞌua yeé ìnta̱ éxi ijnko nda̱río kixin tsꞌátjoáko ti chojnichjin. 16Kjánchó ti nonte la kjuínki̱tsa ti jehe tjan kixin ti nonte la kuakitje̱he̱ ti irꞌua la ikꞌui kaín ti ìnta̱ kꞌuaxrjexín irꞌua ti dragón. 17A̱ndá ti dragón la imá kónínkakohen ti chojnichjin la sákjuikjeyá ti sin tsíkꞌaxrjeníxin tjan kixin tsjajo̱nko chꞌan ti jehe sin, mé tíha la kaín ti sin titekaon ti nkehe tsíkꞌe̱to̱an Díos la ko titekaon ti nkehe tsíchronka Jesucristo. 18A̱ndá ti dragón la kꞌuéchóhen ti chrínta nda̱ñao.

Currently Selected:

Apocalipsis 12: poeNTplus

Highlight

Copy