Salmos 7
7
Díos mé sinchekaáni chꞌan
Salmo kuènté David
1Itꞌéni Díos, jaha mé tinkáchónkini.
Nchekaáni kixin itsjé chojni chréhe̱ ti jeheni
la nínkaon sin.
2Ti̱toéhya sin kixin sinchekꞌitjáña sin ti a̱séni
kixin jehe sin la éxi koxra̱ tjinkaon sin
sinchekꞌitjáña sin ti a̱séni,
la kohya nkexro sinchekaá ti jeheni.
3Itꞌéni Díos,
ti nkojín nkehe jínahña kjuíchꞌeni,
4o̱ kjuíchꞌiyeheni nkojín chojni chóxini,
o̱ nduáhya kjuíchꞌeheni ti jehe sin,
5la jaha tjánjua kjuachaxin kixin
ti chojni nínkaon la chrótsé sin ti jeheni
la chrónkánkákjen sin ti jeheni la ko chrónkátja sin ti jeheni,
la sinchekꞌitjáña sin ti kjuasàya chóntani.
6Tjinki̱tsani, Itꞌéni Díos,
chrókónínkákohén ti sin nínkakohen ti jeheni.
Jaha chonta kjuachaxin si̱nchekito̱exián ti ijie̱
la xi̱kaha chrókjuinki̱tsani.
7Kaín chojni chjasintajni tso̱chjina ti itjen
a̱ndá jaha itjen nkaya nka̱jní tsjakꞌetja̱xian si̱nchekito̱exián iji̱é sin.
8Itꞌéni Díos, jaha si̱nchekito̱exián ti iji̱é chojni chjasintajni.
A̱ndá ijie la chróndáchrua kixin chóntahyani ijie̱,
kixin ó noha kixin jína nchexiteyéheni ti jaha.
9 #
Ap. 2:23. *Jaha nchekꞌitjáña ti nkehe ichꞌe ti sin tjenka̱yáxinhña jína.
A̱ndá ti chojni tjiko̱sáyaha la tjínki̱tsa sin.
Jaha ó noha nkexrín tjenka̱yáxin chojni
la ko nkexrín xráxinkaon chojni.
Jaha mé ijnko Díos jína.
10Ti nkexro tjinki̱tsa ti jeheni mé Itꞌéni Díos
la sinchekaá chꞌan kaín ti chojni jína.
11Díos mé ijnko juez jína,
la nkochríxín nínkakohen chꞌan ti nkehe jínahña.
12Ti tsokjanhña chojni tsinkáchónki Itꞌéni Díos
la tso̱nínkaon chꞌan
la ko sinchetaté chꞌan ti espada kixin tsꞌenxín sin
kixin ó tjeyámá chꞌan ti arco sinchekꞌitjáñaxín chꞌan ti chojni a.
13Ó tjechóhen ti chika tsꞌenxín chojni,
la ko tjekotóxin chꞌan ti flecha tjechrꞌákjen.
14Ti chojni tjenka̱yáxin nkehe jínahña
la jehó nkehe jínahña tjenka̱yáxin sin la ko nchexiteyá sin,
la ko jehó kjuachꞌia xriko sin.
15Jehe sin tsíkjichꞌéna sin ijnko tòye̱ ni̱nka,
la ti tòye̱ tsíkjichꞌéna sin tsꞌánótje̱ñá sin.
16Ti nkehe jínahña kjuíchꞌe sin
kjuíncheníexín sin chojni
mé tsjasótexín sin.
17Méxra̱ chrókjuikosáyeheni Itꞌéni Díos
kixin jehe chꞌan mé ijnko nkexro jína.
Tsotsjeni, tsjikosáyeheni Itꞌéni Díos
chónta kaín kjuachaxin itjen nkaya nka̱jní.
Currently Selected:
Salmos 7: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
