Salmos 64
64
Díos mé tsjinki̱tsa chꞌan ti jeheni
Salmo kuènté David
1Jaha Díos kuènténi, tihín tsochronkani ti kjuaxikaon chóntani.
Tjínki̱tsani la tꞌayakonhéni
kixin ti sin nínkaon la nchechrákon sin ti jeheni.
2Tjakꞌèmáni kixin tso̱enhña ti nkehe imó
tjenka̱yáxin ti sin nduáhya ixri,
la ko ti nkehe tjenka̱yáxin ti sin tjinkaon sichꞌe
ti nkehe jínahña.
3Nchetaté sin ñejen sin éxi chika espada
la ichrꞌán sin chika flecha
mé xi̱kaha ti nkehe nixja sin la chónta veneno.
4Tjejómá sin ichrꞌán sin ti chika flecha tsjiate ti nkexro jína.
Titàya̱ ichrꞌán sin ti chika la chrakonhña sin.
5Tꞌe̱tue̱hen kícho sin kixin sichꞌe sin ti nkehe jínahña.
Imó tjenka̱yáxin sin tjasin sin ijnko trampa
kixin tsꞌitsínkayá ti chojni jína.
Ndáchro sin kixin:
“¿Xá nkexro chrókꞌuikon tíhi?”
6Tjenka̱yáxin sin nkexrín sichꞌe sin ti nkehe jínahña
la ndáchro sin kixin ninkexró tso̱nohe ti nkehe sichꞌe sin.
7Kjánchó Díos mé sinchekjasóte chꞌan ti jehe sin.
Mé titàya̱ tsochrꞌán chꞌan ichin tso̱níexín sin.
8Jehe sin tsꞌitjáñaxín sin ti nkehe nixja sin,
a̱ndá ti sin tsꞌikon tíhi la tsjano sin
kixin xi̱kaha kóhen ti sin a.
9Mé xi̱kaha tsochrakon kaín chojni,
la tsochronka sin ti kjuaxroan kjuasin Díos
la ko tsoxraxinkaon sin ti ixra̱ kjuíchꞌe chꞌan.
10A̱ndá ti chojni jína tso̱chéhe̱ sin
kixin tinkáchónki sin Itꞌéni Díos
la ko kaín ti chojni jína tjejó la tsjikosáyehe sin chꞌan.
Currently Selected:
Salmos 64: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
