Salmos 58
58
Díos mé ijnko Díos jína tꞌe̱to̱an
Salmo kuènté David
1Jahara chojni tꞌe̱to̱an,
¿á chaxín ndoá tjéyára ti iji̱é chojni ní?
¿Á chaxín ndoá nchekito̱exínra ti iji̱é sin ní?
2Kjá náhí, kixin a̱sánra na̱xa̱ tjenka̱yáxin ti nkehe jínahña.
Tjájonra kjuachaxin kixin tsꞌixin kjuanínkaon ti chjasin.
3Ti chojni tjenka̱yáxin ti nkehe jínahña la jínahña sin
kjónté na̱xa̱ tjejóyá sin tse̱e ìñé sin.
Tsíkokjíexién sin chꞌia sin la ko ichꞌe sin ti nkehe jínahña.
4Chónta sin veneno éxi ti veneno kuènté konche.
Jehe sin la éxi ti konche jie̱he tienhña kixin síkjehe̱ ndatsjon.
5Tjinkakonhña va tsihin va ti isón tjasin ti ìnché va
kjónté ijnko nkexro imá nohe tsꞌe̱tue̱hen va.
6Jaha Itꞌéni Díos, tꞌochjenjña ñeno ti sin tjenka̱yáxin ti nkehe jínahña
la ko tꞌochjenjña ti ñeno koxra̱.
7Chrokjui̱nchekꞌitjáña sin éxi tꞌitjáña ti ìnta̱ tꞌitjí nonte.
La nchekuen ti flecha tjakꞌe sin.
8Chrokꞌuitjáña sin éxi tꞌitjáña ti kochi̱ka̱jua̱
tsíxámáña ko̱kjo̱e
o̱ éxi ti chájan tsíkꞌen tokjíhi la í kꞌuíkonhña
ti xrohi kuènté ña̱o.
9Ti kjónté na̱xa̱ noehña sin la tsoche sin éxi tsoche ti kachꞌi̱,
ti na̱xa̱ tjejóchón sin la tsꞌitjáña sin éxi nkehe sátsjiko xri̱nto̱.
10A̱ndá ti sin jína la tso̱chéhe̱ sin ti ó tsꞌikon sin
tsjasóte ti chojni tjenka̱yáxin ti nkehe jínahña.
La ijni̱é ti sin a mé tsꞌíjmáxin to̱té ti sin jína.
11La tsondáchro chojni:
“Chaxín ti chojni titekaon Díos la tsꞌáyéhe̱ sin ijnko nkehe náxrjón;
chaxín itjen ijnko Díos sinchekito̱exín iji̱é ti chojni chjasintajni.”
Currently Selected:
Salmos 58: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
