Salmos 45
45
Ti nkehe itsje sin ti tsíkóte̱he ti rey
Salmo kuènté xje̱en Coré
1Itan náxrjón sítꞌaxrjexín a̱séni;
méxra̱ tso̱tsje̱xi̱ni tíha nkayakon ti Rey.
A̱ndá ti ñejeni mé éxi nda̱hni#45:1 nda̱hni nda̱hni kji̱xi̱n chojni xroon tinta para escribir kji̱nxi̱n ijnko nkexro jína ikjin.
2Jaha mé ijnko nkexro imá náxrjón la ko jína.
Ti itan jína tꞌaxrjexín ti irꞌuá,
mé kóxríhi̱n Díos ndá kjuíncheñao chꞌan ti jaha nkochríxín.
3Tákjá ti espada tjenkáya ti tjo̱a̱ la tinka̱tꞌóxián
kixin imá této̱an jaha.
Jaha mé chonta kaín kjuachaxin.
4Ti kjuachaxin kuèntá mé
chrókjuacha chrókjuákoxian ti itan jína
la ko chrókjuínki̱tsa ti sin nchenkehya.
Ti itjá chjina mé chrókjuákoxian ti kjuachaxin ijié chonta.
5Kaín ti chjasin titekakuanhña
mé tsꞌitsínka sin chrínkí to̱tá, jaha rey;
ti flecha kuèntá mé imá iyo
la tsjiaté a̱sén ti chojni nínkakohan.
6 #
He. 1:8, 9. *Jaha Díos, mé této̱an nkochríxín.
Jaha mé imá jína la ko ndoá této̱an.
7Jaha tóxríha̱n ti nkehe jína
a̱ndá tóxríanhña ti nkehe jínahña.
Ti Díos kuèntá kjueyá ti jaha
la imá kjuíntacháha chꞌan
ke ti íso sin kꞌuájiko̱a.
8Méxra̱ kaín ti iká mé xraxé náxrjón,
éxi ti mirra, áloe la ko canela
la ti palacio tsíkꞌónaxín marfil
itꞌin sin arpa nchechèxín sin ti jaha.
9Xje̱en ti sin rey mé tjejó chríkjan
ti chojnichjin tꞌe̱to̱an kuèntá.
Ti reina itjen ti itja chjina ti trono kuèntá,
la chónta tjan oro náxrjón tsíkji̱xi̱n Ofir.
10Tihín xje̱eni chjin, ti nkehe tsondáxrja̱n;
chrókꞌuitjáñahan ti itꞌá la ko ti sin chjasán.
11Kixin ti rey la tóxríhi̱n ti jaha
kixin náxrjón itjen jaha.
Méxra̱ jaha chrókjuíkosáyehé chꞌan.
12Ti sin tjarisoá tsji̱xi̱n chjasin Tiro
mé tsji̱ka̱o sin nkehe sintaki̱to̱nha̱n sin.
Ti sin rico kuènté ti chjasin mé tsjanchia sin
kixin tsjínki̱tsa ti chjasén sin.
13Ti tjan tjarisoá tso̱te̱he,
mé tjechrꞌinkáya tjan ijnko ika náxrjón tjáki̱ni éxi ti oro.
14Tsíkꞌitsá tjan ika imá náxrjón
la sátsjiko̱he̱ sin tjan ti rey.
La ti sin tjarisoá chóxin tjan
la tsjijiko sin tjan ti itjen jaha.
15Mé xi̱kaha kjui̱ka̱o sin tjan, la chéhe̱ sin
tsꞌixehen sin ti palacio kuèntá.
16Jaha rey, ti kꞌuejó ti sin kꞌuaxrjeníxian
la mé tsꞌejó ti xja̱an,
mé tsꞌe̱to̱an sin kuenté ntiha.
17Méxra̱ tsoxraxinkaon chojni ti ihni̱á kaín ña̱o
la kaín chjasin tsjikosáyaha sin nkochríxín.
Currently Selected:
Salmos 45: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
