Salmos 34
34
Díos tꞌayakohen ti sin titekaon
Salmo kuènté David
1Tsjikosáyeheni Itꞌéni Díos kaín ña̱o;
irꞌuani tsochjéxini chꞌan kjuasáya nkochríxín.
2Imá chéhe̱ a̱séni kixin tinkáchónkini Itꞌéni Díos.
Chrókuihin ti sin nóa la chrókóchéhe̱ sin.
3Méxra̱ nkoko̱a chrókꞌuejóni chróchjéheni kjuasáya Itꞌéni Díos
kixin imá chónta chꞌan kjuachaxin.
4Kjueyáni Itꞌéni Díos la kjuáte̱he chꞌan
la kjua̱tse̱n chꞌan kaín kjuachrakon kꞌuéchóntani.
5Méxra̱ ti nkexro tsinkáchónki Itꞌéni Díos
la a̱ntsí tso̱chéhe̱ sin, la í tso̱suèhya sin.
6Ti nkexro nóa í, mé kꞌuéye̱he̱ Itꞌéni Díos la kuíhin chꞌan
la kjua̱tse̱n chꞌan kaín ti kjuaxikaon.
7Ti ángel kuènté Díos la tꞌayakohen ti sin tjikosáyehe Díos
la ko tjinki̱tsa ti jehe sin.
8 #
1Pe. 2:3. *Xrákira, tsjehéra kixin Itꞌéni Díos la jína
la chéhe̱ tjejó ti nkexro tinkáchónki ti jehe chꞌan.
9Méxra̱ chrókjuíkosáyehéra Itꞌéni Díos
kaínra titekáonra chꞌan,
kixin ti nkexro tjikosáyehe Díos
la ninkehó nkehe tsꞌitjáñankíhya.
10Ti koxra̱ mé tꞌenxín va kjinta
la chóntahya va nkehe sinie va,
a̱ndá ti nkexro tjeyá Itꞌéni Díos la
tsꞌitjáñankíhya ninkehó nkehe jína.
11Xrákira xje̱eni, tihínra,
tsjákohára nkexrín tsjíkosáyehéra Díos.
12 #
1Pe. 3:10-12. *¿Xá nkexro tjenka̱yáxin kixin itsjé nánó tsochónta
la ko tjinkaon isé tsjakꞌe kjuaxróxin?
13Ti xi̱kaha la chrónixjahyara ninkehó nkehe jínahña,
la ko ninkehó kjuachꞌia chrókꞌuaxrjexinhña ti irꞌuara.
14Chrokui̱to̱héra ti nkehe jínahña;
la chrókjuáko̱xinra ti nkehe jína.
Tjéyára ti kjuaxróxin la chréhéra.
15Kixin Itꞌéni Díos mé tꞌayakohen chꞌan ti chojni jína
la ko tsihin chꞌan ti tsꞌèya sin.
16Itꞌéni Díos mé nínkakohen chꞌan
ti chojni ichꞌe ti nkehe jínahña,
la sinchekꞌitjáña chꞌan sin
la ninkexró tsoxraxinkakonhña ti jehe sin.
17Itꞌéni Díos mé tihin ti tꞌéya ti chojni
tjikosáyehe ti jehe chꞌan
la ko tsja̱tse̱n chꞌan kaín ti náxrjónhña chónta sin.
18Itꞌéni Díos mé chjino itjen chꞌan,
kixin sinchekaá chꞌan ti chojni
kjuaxróxinhña tjejó la ko tꞌává a̱sén.
19Ti nkexro jína la itsjé nkehe náxrjónhña tso̱hen,
kjánchó Itꞌéni Díos mé tsja̱tse̱n kaín tíha.
20 #
Jn. 19:36. *Díos mé tsꞌayakohen kaín huéso̱e ti nkexro a
kixin ninkehó tsochjejinhña.
21A̱ndá ti chojni tjenka̱yáxin ti nkehe jínahña,
la ti nkehe jínahña tsꞌenxín sin,
la ko ti nkexro nínkakohen ti chojni jína la tsjasóte sin.
22Itꞌéni Díos mé sinchekaá chꞌan ti sin
chꞌehe ixra̱ ti jehe chꞌan
la tsjasótehya sin kixin tinkáchónki sin chꞌan.
Currently Selected:
Salmos 34: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
