Salmos 25
25
Díos la tjinki̱tsa la ko tꞌayakohen ti jeheni
Salmo kuènté David
1Jaha Itꞌéni Díos, tjikosayéheni ti jaha.
2Díos kuènténi, titekaoni ti jaha.
Chrokui̱toéhya kixin chrókósuéhe̱ni,
kixin chrókjuanoáhña ti jeheni ti chojni nínkaon.
3Ti sin titekaon ti jaha la chrókósuèhya sin,
a̱ndá ti sin tjinkakonhña tsitekaon ti jaha mé tso̱suéhe̱ sin.
4Itꞌéni Díos, tjàkua ti nti̱a kuèntá,
tjákohéni ti nti̱a jína.
5Tjákohéni kixin chaxín ndoá tsochréhe̱ni ti nti̱a kuèntá,
kixin jaha mé ti Díos kuènténi tsaáxini.
Tjechóheni kixin jaha tsjinki̱tsani kaín ña̱o.
6Itꞌéni Díos, xráxinkaoan kixin tjue̱héni
la ko ti̱konoéhéni nkochríxín.
7Chroxraxinkákonhña ti ijie̱ kjuasini
la ko ti nkehe jínahña kjuíchꞌeni ti na̱xa̱ kꞌuéntasoáni.
Itꞌéni Díos xráxinkaoan ti jeheni
kixin jaha ti̱konoéhé chojni la ko tjue̱hé sin.
8Itꞌéni Díos, jaha la imá jína la ko ndoá itjen.
Jaha tjákohé ti chojni chónta ijie̱ ti nti̱a jína kuèntá.
9Jaha tjákohé ti sin nóa
la ko ti sin jína ti nti̱a kuèntá
kixin jína tsꞌaji sin.
10Jaha tjue̱hé ti sin titekaon
la ko nchexiteyá ti nkehe tsíndáchrua.
11Ti ihni̱á chónta kaín kjuachaxin
la tíha chrókꞌóxika̱xian ti ijie̱ chóntani kjónté imá ijié.
12¿Xá nkexro tjikosayéhé ti jaha, Itꞌéni Díos?
Jaha tsjákohé ti nkexro a, ti nti̱a jína tsochréhe̱ sin.
13Jehe sin tso̱chéhe̱ sin kixin jína tsꞌejó sin
la ti sin tsꞌaxrjeníxin sin mé tsꞌáyéhe̱ ti nonte tsíndáchro Díos.
14Itꞌéni Díos, jaha jína choxián ti sin tjiko̱sáyaha;
la nchekiénxian sin ti nkehe tsíkéto̱an.
15Nkochríxín tjetsjeheni ti jaha, Itꞌéni Díos
kixin jaha mé tjínki̱tsani kixin kohya nkehe tso̱heni.
16Komá ti jeheni, Itꞌéni Díos, la ti̱konoéhéni
kixin jehóni itjeni la tꞌává a̱séni.
17A̱séni la imá náxrjónhña itjen.
Tjatsían ti náxrjónhña tóhen a̱séni, Itꞌéni Díos.
18Tsjehé nkexrín tꞌáváni la ko ti kjuaxróxinhña chóntani
la tꞌoxika ti ijie̱ chóntani.
19Tsjehé kixin ti chojni nínkakohen ti jeheni
la imá sítinkákótsjé sin.
Nínkaon sin tjinkakonhña sin ti jeheni.
20Tꞌayakohén a̱séni, la nchekaáni;
ti̱toéhya kixin tso̱suéhe̱ni kixin tinkáchónkini ti jaha.
21Tjinki̱tsani la ko tꞌayakonhéni kixin tsjasinhñani ijie̱
kixin jahuá tinkáchónkini.
22Díos kuènténi, nchekaá ti sin Israel
kixin kjuaxróxinhña tjejó sin, tꞌává sin.
Currently Selected:
Salmos 25: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
