Salmos 148
148
Ti nkehe kjuíchꞌéna Díos la chrókjuikosáyehe ti jehe chꞌan
1Tjikosayehéra Itꞌéni Díos kaínra tjejora nkaya nka̱jní.
Tjikosayehéra Díos jahara kaín ángel tjejora nkaya nka̱jní.
2Tjikosayehéra Díos, jahara kaínra ángel kuènté Díos.
Tjikosayehéra Díos jahara soldado kuènté nka̱jní.
3Tjikosayéhé Díos jaha ña̱o la ko jaha nitjó.
Jahara konotsé tjáki̱ni, tjikosayehéra chꞌan.
4Jaha nka̱jní tjikosayéhé Díos
la ko jaha ìnta̱ itjen chritaón nka̱jní
tjikosayéhé chꞌan.
5Tjikosayehéra ihni̱é Itꞌéni Díos
kixin jehe chꞌan kꞌue̱to̱an chꞌan
ndá kꞌóna kaín nkehe siín.
6Kjuíchꞌéna Díos kaín tíha kixin tsꞌejó nkochríxín.
Kꞌue̱tua̱nxín chꞌan kjuachaxin kuènté chꞌan la tsꞌitjáñahña tíha.
7Tjikosayehéra Díos, jahara tjejora chjasintajni,
la ko tjikosayehéra chꞌan jahara ti iko ihyé sínkankí nda̱ñao imá ni̱nka la ko jaha nda̱ñao.
8Ti tjónkíxín la ko ti toni
la konti chrínta la ko ti tji̱nonte
la ko ti xri̱nto̱ chjéhe tji̱a̱n
nchexiteyá ti nkehe kꞌue̱to̱an Díos.
9Ti ijna̱ la ko ti nonte yóxin
la ko inta yoa tꞌóna ito la ko inta cedro
10la ko ti iko siín ndo̱e chojni la ko iko jie̱he
la ko konche la ko iko xritjaká.
11Jahara chojni rey chjasintajni la ko kaín chjasin
la ko kaín chojni tꞌe̱to̱an chjasintajni,
12Jahara chojnindoa la ko chojnichjin
la ko chájan ntasoá la ko cháchjin tjarisoá
la ko chojni ó táda la ko chojni ó nána.
13Mé xi̱kaha kaínra chrókjuíkosáyehéra ihni̱é Itꞌéni Díos
kixin jehó ti ihni̱é chꞌan la imá tjetoan.
Ti kjuachaxin kuènté chꞌan la itjen chritaón nka̱jní la ko chjasintajni.
14Díos tsichjéhe chꞌan kjuachaxin
ti sin chjasin kuènté chꞌan.
Kaín chojni jína chrókjuikosáyehe sin chꞌan
la ko ti sin israelita,
mé ti sin chjasin tinkáchónki ti jehe chꞌan.
¡Tsjikosáyeheni Díos nkochríxín!
Mé xi̱kaha tso̱hen.
Currently Selected:
Salmos 148: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
