Salmos 135
135
Ti kjuaxroan ijié tsíkja̱ko̱xi̱n Itꞌéni Díos
1Chrokjuíkosáyehéra Itꞌéni Díos.
Chrokjuíkosáyehéra ihni̱é chꞌan,
jahara chꞌehéra chꞌan ixra̱,
2kaínra tjejora nkaxehen ti ndo̱e Itꞌéni Díos
la ko tjejora ndója ti ndo̱e Díos kuènténi.
3Tjikosayehéra Itꞌéni Díos kixin jehe chꞌan
la imá jína chꞌan.
Itsjera salmo tsjikosáyexínra ihni̱é Díos
kixin ijnko kjuachéhe̱ tíha.
4Kixin tsíkjeyá Díos Jacob, mé tíha ti chꞌin Israel
kixin jína tsꞌayakohen chꞌan la ko tso̱tjue̱he chꞌan ti nkexro a.
5Méxra̱, jeheni la ó noheni kixin Itꞌéni Díos
la imá ijié kjuachaxin chónta chꞌan,
tíha mé Itꞌéni Díos.
Ó noheni kixin Díos la mé imá tꞌe̱to̱an,
la ti íso díos la náhí.
6Kaín ti ixra̱ tjinkaon Díos la mé xi̱kaha tso̱hen
ti nka̱jní la ko chjasintajni
la ko ti ni̱nkaxín nda̱ñao.
7Nchechrìin Díos ti itji̱ hasta ti xránkíxixín chjasintajni
la ko sítjónkíxín la ko sítjonta ndá tsꞌaniá ichrin
la tꞌe̱to̱an chꞌan kixin tsochjéhe xri̱nto̱.
8Itꞌéni Díos kjuajon kjuachaxin
kixin ikꞌuén ti xjan sa̱o kuènté ti sin Egipto
la ko ti iko kuènté sin sa̱oxén tsíkokjíhi.
9Nchónhña kjuachrakon imá ijié ichrꞌán Díos
ti kꞌuejó ti sin egipto
la ko ti kjuákꞌe Faraón la ko kaín ti sin kjuíchꞌehe chꞌan ixra̱.
10Kjuínchekꞌitjáña Díos nchónhña nación
la ko kꞌóñá chꞌan ti sin rey kuékꞌe̱to̱an,
11mé rey Sehón, rey kuènté ti sin amorreo
la ko ti rey Og, rey kuènté chjasin Basán
la ko kaín ti sin rey kuènté Canaán.
12A̱ndá ti nonte kꞌuéno̱nte̱e ti sin rey
la Díos mé kjuíncheki̱to̱nhe̱n ti chjasén chꞌan, Israel,
kixin tíha tsꞌóna no̱nte̱e sin.
13Jaha Itꞌéni Díos, nkochríxín itjen ti ihni̱á,
kaín chojni tsoxraxinkaon ti jaha nkochríxín.
14Jaha Itꞌéni Díos mé tsjínki̱tsa ti sin kjuaxróxinhña tjejó ti chjasin kuèntá
la ko tsi̱konoéhé ti sin tꞌaha ixra̱.
15 #
Sal. 115:4-8; Ap. 9:20. *Ti nkehe tsíkjano̱ña tjikosáyehe ti sin chónhña Díos
mé tsíkꞌónaxín chika plata la ko chika oro;
ti nkehe a mé itja chojni ó tsíkjichꞌénaxín.
16Tíha la chónta irꞌua la nixjahya
la ko chónta ikon la tꞌikonhña.
17Chónta ndatsjon la tienhña,
méxra̱ xi̱kaha ninkehó kjuachón chóntahya.
18Ti sin chꞌéna ti nkehe la mé tóyóhe̱ sin
ti nkehe kjuíchꞌéna sin
la ko xi̱kaha kaín ti sin tinkáchónki ti nkehe a.
19A̱ndá ti sin israelita la chrókjuikosáyehe sin Díos
la ko ti sin ncha̱tꞌá la chrókjuikosáyehe sin Díos
20la ko ti sin levita chrókjuikosáyehe sin Díos
la ko kaín ti jahara nchexiteyéhéra Díos
la chrókjuíkosáyehéra chꞌan.
21La ko ti sin tjejó ti ijna̱ Sión
chrókjuikosáyehe sin Díos itjen chjasin Jerusalén.
Kjuasáye Díos kjuínki̱tsa jína tjejóni,
mé xi̱kaha tso̱hen.
Currently Selected:
Salmos 135: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
