Proverbios 30
30
Ti nkehe tsíndáchro Agur
1Ti nkehe nixja Agur, xje̱en chꞌin Jaqué, tsíkji̱xi̱n chjasin Masa.
Agur nixje̱he̱ ti chꞌin Itiel la ko ti chꞌin Ucal, ndáchro:
2Janhan mé ijnko chojni a̱ntsí lo̱nti̱ ke kaín ti chojni lo̱nti̱ siín,
la tia̱nxi̱nhña ninkehó éxi tienxín íso chojni.
3La kꞌuitjáhya ti kjuaxrexinkaon jína
la ko nonahña ninkehó nkehe kuènté Díos.
4¿Xá nkexro sákjui̱ ti nka̱jní
la ko chrókjui̱xi̱n ntiha?
¿Xá nkexro chrókjuacha chrótsé ti xri̱nto̱?
¿Xá nkexro chrókjuacha chrókꞌuisímá ti nda̱ñao ijnko ika?
¿Xá nkexro kjuakꞌe ti kjuéje̱xin ti nonte chjasintajni?
¿Xá nkexrín itꞌin ti nkexro, la ko xá nkexrín itꞌin ti xje̱en chꞌan?
5Kaín ti itan tsíndáchro Díos la chaxín jína.
Jehe chꞌan tꞌayakohen chꞌan ti sin tjeyá kixin jehe chꞌan tsjinki̱tsa chꞌan ti jehe sin.
6Chróchrꞌakjenhña íjnko nkehe ti nkehe tsíndáchro chꞌan,
kixin ti xi̱kaha si̱chꞌe la tsjenduéhe chꞌan ti jaha
la tso̱nohe chojni kixin kjui̱chꞌia.
7Jehó yaá nkehe tjáncháha, Itꞌéni Díos;
chróchje̱héni tíha ti na̱xa̱ tꞌenhñani.
8Tjájonhña kjuachaxin kixin chrónixjani kjuachꞌia la ko chrókjuakꞌehya a̱séni ti nkehe ó chónkó
la tjájonhña kjuachaxin kixin imá chrókóríkoni o̱ chrókónóani.
Jehó chrókjuánjua ti nkehe sinieni kaín ña̱o.
9Kixin ti chrókjuánjua nchónhña nkehe la kjá chrókꞌuitjáñeheni ti jaha,
la ko chróndáchroni kixin xá nkexro ti Itꞌéni Díos.
A̱ndá ti imá chrókónóani la kjá chrókjuankíxini chrókueéni
landá chrókꞌuándaxínhi̱ni ti ihni̱á, Itꞌéni Díos.
10Chrokꞌuándaxiénhña ti nkexro chꞌexín ixra̱ ti tjetsjehe ti làmoé;
kixin ti xi̱kaha la a̱ntsí tsꞌándaxíhan chꞌan la tsjasótia jaha.
11Siín chojni la tꞌándaxíhi̱n itꞌé
la ko tjikosáyéhya ti ìñé.
12Siín chojni tjenka̱yáxin kixin chóntahya sin ijie̱,
kjánchó chaxínhña kixin na̱xa̱ kji̱ta̱ a̱sén sin.
13Siín chojni tjenka̱yáxin kixin imá tjetoan;
a̱ndá chóntehya sin kjuasàya ti íso chojni.
14Siín chojni chónta ñeno éxi espada.
Ti ñeno sin la éxi cuchillo
kixin sinie sin kaín ti chojni nóa siín chjasintajni.
15Ti kosi̱nto̱ itꞌi ijni̱é chojni la mé chónta yaá xje̱en chjin;
la jehó ndáchro: “Tsjánjua nkehe, tsjánjua nkehe”,
La siín iní nkehe tókje̱hya;
la ti noóxin nkehe la nkochríxín ndáchrohya kixin ó tjen.
16Tíha mé ti tòye̱ xravá chojni,
la ti chojnichjin xrokjuahya tsochónta chájan,
la ti nonte titsínka ìnta̱ la tuénxín xámá,
la ko ti xrohi ndáchrohya kixin ótjen.
17Ti nkexro tꞌándaxíhi̱n ti itꞌé
la ko titekakuenhña ti nkehe tjako ti ìñé
la ti kontálo chrókuakitsjenkí va ti ikon sin,
la ko ti konte̱xrje̱n chrókjonie va ti nto̱e sin.
18Siín iní nkehe hasta noó
la mé tjachahya tia̱nxia̱n;
19nkexrín ti kotjua̱nhnko xritjaká va nka̱jní
la ko ti konche la xritaón va ixro̱
la ko ti ntabarco la xritaón nda̱ñao
la ko nkexrín ti chojnindoa tjue̱he ti chojnichjin.
20Ti chojnichjin nduáhya ixri mé xi̱kihi ichꞌe tjan:
inie tjan la ko tꞌóni tjan irꞌua tjan
la ndáchro tjan kixin kohya ijie̱ kjuasin tjan.
21Siín iní nkehe nchekꞌinki ti chjasintajni
la ti noóxin la tjacha nchexrànka̱ ti nonte:
22tíha la ti chojni chꞌexón ixra̱ ndá tꞌóna ijnko chojni tꞌe̱to̱an,
la ko ti chojni jínahña chónta itsjé nkehe sinie,
23la ko ti chojnichjin nínkakohen chojni landá tꞌitja xìi,
la ko ti tjan chꞌexón ixra̱ ndá tsákja ti ixra̱ kuènté ti sin tꞌe̱to̱an.
24Siín noó nkehe ntsíntsí ti chjasintajni a̱ntsí nohe,
ke ti sin imá nohe:
25ti kochꞌokan kjónté iko imá ntsíntsí
la kaín nitjó imá sóa la tꞌe̱nka̱chji̱na va itsjé nkehe;
26ti kotéjon kjónté kanhñó tse̱he̱ va
la chꞌéna va ndo̱e va ti siín itjo̱;
27ti kochjoá kjónté chóntahya va ijnko rey tꞌe̱to̱an
la yóxin síkjínxi̱n va sátsji va.
28Ti kotsi̱ka̱rꞌe̱, kjónté tsjacha chojni tsotséxin itja
kjánchó tjejó va nkaxehen ti palacio itjen ti rey.
29Siín iní nkehe
la ti noóxin la jína ixri:
30ti koxra̱ a̱ntsí jie̱he ke iso iko,
la chrakuenhña va ninkehó;
31la ti kochi̱ntóla imá ihnke, la ti kocható
la ko ti rey titaón nti̱a ndá chréhe̱ ti sin soldado.
32Ti kjui̱chꞌe ijnko kjualo̱nti̱
o̱ kjuínchejié a̱sán o̱ kjuénka̱yáxin ijnko nkehe jínahña,
la tjakꞌe tjénka̱yáxian jína la nixjáhya ninkehó;
33kixin éxi ti itsjen, ti tsinkatjénkiá la tsꞌóna mantequilla,
la ko ti tji̱a̱n tsákjaxín nkojín nkehe ti xrítuan la tsꞌaxrje ijni̱,
mé xi̱kaha ijnko chojni tsjate kícho la tsꞌixin kjuanínkaon.
Currently Selected:
Proverbios 30: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
