Proverbios 3
3
Imá sínkí ti kjuaxrexinkaon jína
1Xje̱eni, chrókꞌuitjáñahña ti nkehe kjuákohá,
la ko nkochríxín xráxinkaoan ti nkehe kuétua̱han.
2La ti xi̱kaha la isé tsjakꞌe kjuaxróxin la ko náxrjón.
3Nkochríxín chrótjue̱hé chojni la ko chrókjui̱chꞌiyehya ti chojni choxián.
Éxi ijnko nkehe chrókjuakꞌenkí isian,
la chrókꞌuitjáñahña tíhi.
4 #
Lc. 2:52. *A̱ndá ti xi̱kaha la tso̱xríhi̱n Díos,
la ko kja̱xin chojni tsondáchro kixin ndoá itjen.
5Chrokuinkachónkia Itꞌéni Díos kaín a̱sán
la chróndáchrohya kixin jahuá mé noha.
6Chrokjuaké sa̱o Díos kaín ti ixra̱ ichꞌe,
ndá jehe chꞌan la tsjendoá chꞌan ti nti̱a kuèntá.
7 #
Ro. 12:16. *Méxra̱ chróndáchrohya kixin jahuá imá noha;
ícha jína chrókjuíkosáyehé Itꞌéni Díos;
chrókui̱to̱hé ti nkehe jínahña tjénka̱yáxian.
8Tíha mé ijnko xro̱a̱n jína
tsjinki̱tsa ti cuerpo kuèntá.
9Chrokjuíkosáyexián Itꞌéni Díos ti nkehe tjete chonta
la ko chróchje̱hé chꞌan kaín ti nkehe sa̱oxín tꞌónaha.
10Landá ti xi̱kaha, la tso̱kaón ti nchia tꞌenkachjinañá noa
la ko tso̱kaón ti nkehe tikia vino.
11 #
Job 5:17. #
He. 12:5, 6. *Méxra̱, xje̱eni, chrókónínkakonhña ti chrókjuinchekjasóte Itꞌéni Díos ti jaha
la ko chrókónínkakonhña ti chrókjuenduáha chꞌan.
12 #
Ap. 3:19. *Kixin Itꞌéni Díos tjue̱he chꞌan ti nkexro tjenduéhe chꞌan
éxi ijnko itꞌé xjan tjenduéhe ti xje̱en kixin tjue̱he.
13Náxrjón tsjakꞌe ti nkexro tsíkꞌitja ti kjuaxrexinkaon jína
la ko ti nkexro tsꞌitja tso̱nohe jína
14kixin tíha a̱ntsí tjete ke ti plata
la ko ti nkehe tsꞌitja chojni mé a̱ntsí sínkí ke ti oro.
15Mé a̱ntsí sínkí tíha ke ti ixro̱ imá náxrjón tsjehe,
la kohya íjnko nkehe tjenka̱yáxini tsochóntani
tsjacha tso̱yóhe̱ ti kjuaxrexinkaon jína.
16Ti kjuaxrexinkaon jína mé tsjinki̱tsa kixin isé tsjakꞌe
la ko tsjajon kaín ti nkehe imá tjete siín la ko ti kjuasàya.
17Ti chróchréhé ti nti̱a kuènté ti kjuaxrexinkaon jína,
la tíha chrókjuinchecháha la ko chrótjáha kjuaxróxin.
18Ti kjuaxrexinkaon jína mé tjajon kjuachón tsꞌáyéhe̱ ti nkexro tjeyá
la ko náxrjón chéhe̱ ti nkexro tꞌitja tíha.
19A̱ndá ti kjuaxrexinkaon jína mé kjuíchꞌénaxín Itꞌéni Díos ti chjasintajni
la ti imá nohe chꞌan mé kjuíchꞌénaxín chꞌan ti nka̱jní.
20Ti kjuaxrexinkaon jína mé kꞌóchrítꞌo̱exín chꞌan ti ìnta̱
la ko kjuakꞌe chꞌan ti itji̱ kixin tsꞌaniá ichrin.
21Méxra̱ xje̱eni, chrókui̱toéhya ti kjuaxrexinkaon jína
la ko chrókjuénka̱yáxian jína kaín ti nkehe si̱chꞌe
22kixin tíha mé tsjajon ti kjuachón;
tíha mé chróchónta éxi ijnko nkehe náxrjón tsjehe chrókjuakꞌenkí isian.
23Landá ti xi̱kaha, la kjuaxróxin tsꞌájia ti nti̱a jína
la í tsóténki̱xinhña.
24La ti ó tso̱kꞌáha, la ninkehó tsochrakuenhña,
la ko ti ó tsjakꞌechrian, la kjuaxróxin tsjakꞌe.
25La tsochrakonhña ti xrína̱hña chrókui ijnko kjuaxikaon
o̱ ti itsi nkojín nkehe tsꞌitjáñaxín ti sin tjasin ijie̱,
26kixin Itꞌéni Díos la tsꞌayakohen ti jaha
la ko tsjinki̱tsa chꞌan kixin kohya nkehe tso̱han.
27Ti nkojín nkexro tjanchia kixin chrókjuinki̱tsa
la chróndáchrohya náhí
ti noha kixin jína tsjínki̱tsa.
28Chróndáchrohya kixin ndóye tsjínki̱tsa
ti noha kixin jína tsjínki̱tsa ijie.
29Chrokjuénka̱yáxinhña chrókjui̱chꞌehé nkojín nkehe jínahña ti nkexro choxián,
itjen chjinaxón la ko titekakohen ti jaha.
30Chrokjuéyéhya kjuanínkaon ijnko nkexro
ti ninkehó nkehe jínahña kjuítꞌaha sin.
31Chrokjuakéhya a̱sán ti nkehe kjuacha ti sin jínahña
la ko chrókuankíehya ti nkehe ichꞌe sin
32kixin Itꞌéni Díos la tóxrìe̱nhña ti chojni jínahña
a̱ndá ti chojni ndoá tjejó la tjinki̱tsa chꞌan.
33Itꞌéni Díos la nínkakohen ndo̱e ti sin tjenka̱yáxinhña ti nkehe jína,
a̱ndá ndo̱e ti sin ndoá tjejó la ncheñao chꞌan.
34 #
Stg. 4:6; 1Pe. 5:5. *Itꞌéni Díos la tóxrìe̱nhña ti sin nchehnke tjanoá iso chojni,
a̱ndá tjikosayéhe chꞌan ti sin nchenkehya.
35Ti sin nohe la tsꞌáyéhe̱ sin kjuasàya;
a̱ndá ti sin lo̱nti̱ la jehó kjuatosuéhe̱ tsꞌáyéhe̱ sin.
Currently Selected:
Proverbios 3: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
