Proverbios 1
1
Ti Kjuaxrexinkaon jína
1 #
1Rs. 4:32. *Ti kjuaxrexinkaon jína níxja Salomón, xje̱en David, rey kuènté ti sin Israel
2la tjinki̱tsa kixin tsochónta chojni ti kjuaxrexinkaon jína
la ko tsꞌitja chojni tsienxín kaín ti nkehe imá ixra̱,
3la ko ti nkehe jína chrókjuénka̱yáxin sin
la ko jína ko ndoá chrókꞌuejó sin.
4Ti itan i, la tsjinki̱tsa ti sin kanhñó nohe la tsꞌitja sin ti nkehe jína,
la tíhi chrókjuinki̱tsa ti sin ndasoá kixin tsienxín sin la ko tso̱nohe sin nkexrín jína sichꞌe sin kaín nkehe.
5Ti chojni imá nohe la chrókuihin sin jína ti itan i, ndá a̱ntsí chrókónohe sin
la ko ti chojni tienxín, la a̱ntsí jína chrókꞌuitja,
6ndá chrókienxín sin ti kjuaxrexinkaon jína
la ko chrókienxín sin ti itan imá ixra̱ chrónka ti sin nohe.
7 #
Job 28:28; Sal. 111:10; Pr. 9:10. *Ti tjinkaon chojni kixin chaxín tso̱nohe sin la ticháxi̱n tsjikosáyehe sin Itꞌéni Díos.
A̱ndá ti chojni lo̱nti̱ la tóxríe̱nhña sin chrókuihin sin ninkehó kjuaxrexinkaon jína xráko̱he̱ sin.
Ti kjuaxrexinkaon tsꞌáyéhe̱ ti sin ndasoá
8Tihín, xje̱eni, chrókuitekaoan ti nkehe tꞌe̱to̱an itꞌá
la ko chrókjuíkosáyehé ti nkehe tjako ìná.
9Kixin tíha la éxi ijnko corona náxrjón
chrókjuakꞌenkáya ikjá la ko éxi ijnko nkehe náxrjón chrókjuakꞌenkí isian.
10Xje̱eni, ti tjinkaon ti sin chónta ijie̱ chrókjuachròe ti jaha
la chrókuitekákonhña ti nkehe ndáchro sin.
11A̱ndá ti chróndáchro sin:
“Xrákira tsꞌitoni.
Tsꞌinkákonhe̱ni ti chojni tsꞌatsínka ntihi
la tsꞌóñáni sin, kjónté chóntahya sin ijie̱.
12Sinchekꞌitjáñani sin kjónté jína tjejó sin,
éxi chrókꞌuitsínkayá sin ijnko tòye̱ ni̱nka.
13Ndá tsji̱ka̱oni ndo̱eni kaín ti nkehe tseéni
la tsochóntani itsjé nkehe tjete.
14Xrákira tsꞌitoni la tseéni,
a̱ndá nkokón tsakjani ti nkehe tseéni.”
15Xje̱eni, kjónté xi̱kaha tsondáchro sin, la chrókꞌuitonhña sin;
ti̱to̱hé ti nti̱e sin.
16Kixin jehe sin xritinká sin kixin tjinkaon sin chrókjuíchꞌe sin nkehe jínahña
la ko tjinkaon sin chrókꞌóñá sin chojni.
17Ó chónkó chrókjuasini ijnko trampa chrótsé koxroxe ti tjejótsjehe va
kixin ti xi̱kaha la ókjé sátsji va.
18A̱ndá ti chojni tjenka̱yáxin nkehe jínahña la tjasin sin trampa,
kjánchó jehe sin tsꞌitjáñaxín sin ti trampa kjuasin sin.
19Mé xi̱kaha ti nti̱e ti sin imá tjinkaon tsochónta itsjé nkehe,
a̱ndá ti nkehe tjenka̱yáxin sin tsochónta sin mé tíha tsꞌenxín sin.
Tóxakohanra chrókui̱to̱éhyara ti kjuaxrexinkaon jína
20 #
Pr. 8:1-3. *Ti kjuaxrexinkaon jína la éxi ijnko nkexro
itjen nti̱a la ko ndasin, la tjetꞌèya.
21Tjetꞌèya ti tónkotsé nchónhña chojni
la ko ti ndója puerta tꞌixenxín chojni mé xi̱kihi ndáchro:
22“Jahara ndasoá,
¿xá hasta nkesá nduáhya tsjenka̱yáxinra
la ko chrókjuanoára ti nkehe jína?
Jahara lo̱nti̱ra titekákonhñara ti nkehe jína chrókꞌuitjára.
23Chrokuihínra ti nkehe tso̱xrja̱nka;
janhan mé tso̱xrja̱nka ti nkehe nona
la ko tsjánjua kjuachaxin tsiénxinra ti itan jína níxja janhan.
24Janhan kꞌuéya̱hára, kjánchó jahara tjinkákonhñara chrókuihínra;
jahara kuitekákonhñara ti nkehe ndáxrja̱n,
25la ícha kuitekákonhñara ti nkehe jína ndáxrja̱n
la ko tóxríanhñara ti nkehe níxjahára.
26Méxra̱ ijie la janhan tsjanoá ti ichrén nkehe tso̱hanra
la ko tsjanoá janhan ti itsi ichrén kjuachrakon tsꞌatsínkara,
27la ko ti ó tsꞌatsínkara ichrén nkehe náxrjónhña
ndá tsochrakonra la ko tso̱tsja̱nkara,
kixin éxi tꞌatsínka ijnko xri̱nto̱xenjnki la kaín nkehe tsjakáko tsꞌitjáña,
mé xi̱kaha tso̱hanra.
28A̱ndá tsꞌeye̱héra ti janhan, kjánchó janhan tsjáta̱hya;
tsjéyára ti janhan, kjánchó tsꞌitjáhyara,
29kixin kuitekákonhñara ti kjuaxrexinkaon jína
la ko kjuikosáyehyara Itꞌéni Díos.
30Jahara tjinkákonhñara ti nkehe jína níxja janhan
la ko tóxríanhñara ti ó kjuénduáhára.
31A̱ndá ijie la tsjasótexínra ti nkehe jínahña kjui̱chꞌera,
méxra̱ kjuaxróxinhña tsꞌejora kixin ti nkehe jínahña kjuénka̱yáxinra.
32Kixin ti nkexro tienxínhña jína la tjichròe landá xi̱kaha tsꞌenxín,
ndáchro sin kixin ó jína tjejó sin, kjánchó tíha tsꞌitjáñaxín sin.
33A̱ndá ti nkexro tsihin ti nkehe ndáxrja̱n la jína la ko kjuaxróxin tsꞌejó sin,
la tsochrakuenhña sin ninkehó, kjónté ichrén nkehe náxrjónhña tso̱hen sin.”
Currently Selected:
Proverbios 1: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
