Santiago 4

Chrótjue̱hyani ti chjasintajni

1¿Xá nketí ti̱xi̱n ti kjuanínkaon tjájo̱nkoáxin kichuara? Tíha la ti̱xi̱n ti nkehe jínahña tjénka̱yáxinra. 2Jahara tjinkáonra tsochontara ichrén nkehe, ndá ti chontahyara, la tónínkáonra la tjajo̱nkoára chojni la ko tꞌoñára chojni. Tóchji̱no̱xínhanra kixin chontahyara ti nkehe chónta íso sin, la tónínkáonra la ko tjajo̱nkoára sin. Jahara la chontahyara ti nkehe tjinkáonra kixin tjanchehyara Díos. 3A̱ndá ti tjanchehéra Díos la tꞌayéhyara, kixin nduáhya tjánchíára la ko tjinkáonra si̱nchexénhóra. 4Jahara titekákuénhñara Díos. ¿Á noahñara kixin ti imá tso̱tjue̱héra ti chjasintajni la tso̱nínkakohénra Díos ní? A̱ndá ti nkojinra a̱ntsí tso̱tjue̱héra ti chjasintajni la tso̱ninkákohénra Díos. 5¿O̱ tjénka̱yáxinra kixin ti nkehe ndáchro xroon itén Díos, la chónkó ní? Kixin ndáchro: “Ti Ncha̱kuén Díos kꞌuáyéhe̱ni la imá tjue̱he ti jeheni la tso̱nínkaon ti tsíto̱heni ti jehe chꞌan.” 6#Pr. 3:34.*Kixin Díos la imá tjinki̱tsa chꞌan ti jeheni, méxra̱ ndáchro xroon itén chꞌan: “Díos la nínkakohen ti chojni ihnke, a̱ndá ti chojni nchenkehya la tjinki̱tsa chꞌan.” 7Méxra̱ ícha jína chrókuitekáonra Díos, la chrókui̱to̱éhyara kixin ti Jínahña chrókꞌue̱tua̱hanra, ndá ti xi̱kaha la ti Jínahña la sáchrokjui. 8Chrókóchjinehéra Díos, a̱ndá Díos tso̱chjina ti tjejora. Jahara chojni chónta ijie̱, chrókꞌontira itjára la a̱ntsí chrótjue̱héra Díos, a̱ndá ti chjasintajni la kanhñó. 9Ícha jína chrókꞌuavára, chrótsja̱nkara la ko chrókꞌueyara. Ti ijie tjanora la chrótsja̱nkara, la ti cháhara la ícha jína chrótsja̱nkara. 10Ícha jína chrókꞌuejoxi̱nra tóchꞌinra chróchronoéhéra Ìnchéni, a̱ndá jehe chꞌan chaxín chrókjuintañaora chꞌan.

Chrokꞌuándaxiénhñani kíchóni

11Kíchóni, chrókꞌuándaxiénhñara kichuara, kixin ti nkexro tꞌándaxíhi̱n kícho la ko nchekito̱exín ijié ti kícho mé tjikosayéhya ti ley. A̱ndá ti tjikosayéhya sin ti ley, la tꞌóna sin juez kuènté ti ley la kja̱xin sin nchexiteyéhya sin ti ley. 12A̱ndá ti ley la nkoko̱a nkexro kjuajon, la jehe chꞌan mé ti Juez chaxín, jehe chꞌan mé jína sinchekaá chꞌan chojni o̱ sinchekjasóte chꞌan chojni. ¿A̱ndá nkexro ti jahara kixin chrókjui̱nchekítuéxian ijie̱ kuènté íjnko chojni?

Noehñani nkehe tso̱hen ndóye

13 # Pr. 27:1. *A̱ndá ijie tihínra tíhi, jahara ndáchrora: “Ijie o̱ ndóye sátsjini ijnko chjasin ijié, la ntiha tsꞌejóni ijnko nánó sinchekjini nkehe kixin tsjachani itsjé chichaon.” 14A̱ndá jahara noahñara nkehe tso̱hen ndóye, kixin ti tjejóchóni la éxi ijnko tji̱nonte tuénxín tsꞌitjáña. 15Ícha jína chróndáchrora: “Ti tjinkaon Ìnchéni la na̱xa̱ tsꞌejóchóni la sichꞌeni ti ixra̱ siín ntiha.” 16A̱ndá jahara ti nixjara la imá ihnkera la kaín tíha la jehya jína. 17A̱ndá ti nkexro nohe ichꞌe ti nkehe jína, ndá chꞌehya, la tjasin sin ijie̱.

Currently Selected:

Santiago 4: poeNTplus

Highlight

Copy