Gálatas 6

Tjinki̱tsara kichuara

1Kíchóni, ti kꞌuíkonra nkojín nkexro kjuasin ijie̱, la jahara chontara Ncha̱kuén Díos, chrókjuínki̱tsara sin chrónixjehéra sin nkojína, chrókónínkakuénhñara sin. La kja̱xin chrókóxakohanra kixin xi̱kahña chrókjuásinra ijie̱. 2Tsjínki̱tsara kichuara kixin jehya nkoko̱a chojni chrókuamá ti nkehe iye. Ndá ti xi̱kaha tjejochꞌera, la chaxín tjejonchexiteyára ti nkehe kꞌue̱to̱an Cristo.

3Kixin ti nkexro tjenka̱yáxin kixin imá tjetoan, ndá chaxínhña, la jehó chꞌiyehe a̱sén. 4Nkojnko chojni chróxraxinkaon á ncho̱xon tjejó o̱ náhí. A̱ndá ti ncho̱xon tjejó sin la chrókóchéhe̱ sin, la chrótsjehya sin nkexrín ichꞌe íjnko chojni 5kixin nkojnko chojni chrókuamá ti ixra̱ kjuajon Ìnchéni.

6Ti nkexro xráko̱he̱ ti itan jína, la chrókjuajon nkehe jína chrókuákja ti nkexro tjako.

7Chꞌiyéhya a̱sánra, kixin ninkexró tsjachahya sichꞌiyehe Díos. Ti nkehe tsꞌe̱nka̱ chojni mé tíha tsotjá. 8Ti nkexro tꞌe̱nka̱ ti nkehe jínahña, la ti nkehe jínahña kꞌue̱nka̱ sin, mé tsꞌenxín sin. A̱ndá ti nkexro tsꞌe̱nka̱ ti nkehe tjinkaon Ncha̱kuén Díos, la tsotjá sin ti kjuachón nkochríxín. 9Méxra̱ chrókꞌóxrjéhyani, chrókjuíchꞌeni ti nkehe jína, kixin ti tso̱xrjenhyani la ti ó tsjixraká ti ña̱o la tsotjáni ti nkehe jína. 10Mé xi̱kaha nkochríxín chrókjuinki̱tsani kaín chojni, la ko a̱ntsí chrókjuinki̱tsani ti sin kíchóni tinkáchónki Ìnchéni.

Kjuixixín nixja chꞌin Pablo

11Tsjehéra nkexrín imá ihyé letra kji̱nxian tjaná. 12Ti sin tjako ley tjinkaon tsꞌe̱tua̱hanra kixin chrókuara xro̱ye kixin tjinkaon sin chrókjuikosáyehe sin chojni ó. La tjinkakonhña sin chrókjuasóte sin kixin tinkáchónki sin ti Cristo kjuákꞌenkáni ntacruz. 13La kjónté ti sin tsíka xro̱ye mé nchexiteyáhya sin ti nkehe ndáchro ti ley. Jehe sin la jehó tjinkaon sin kixin chrókuara xro̱ye kixin tso̱nkexín sin kixin kjuacha sin kꞌue̱to̱an sin kixin ikuára ti xro̱ye. 14A̱ndá janhan tóxrìnahña si̱ntankexián tíha. Ícha jína chróndáxrja̱n kixin Cristo kꞌuenyákohe̱n ti janhan. Kixin Cristo kꞌuénxin ntacruz, la janhan í tjínka̱konhña ti nkehe siín chjasintajni, la ti chjasintajni í tjinkakonhña ti janhan. 15Ninkehó sínkíhya á chónta chojni xro̱ye o̱ náhí. Ti nkehe a̱ntsí sínkí la kixin chrókꞌónani ijnko chojni ni̱xin. 16La kaín ti nkexro titekaon ti nkehe tꞌe̱to̱an Díos, mé chaxín tsíkꞌóna xje̱en Díos, la tsꞌáyéhe̱ sin ti kjuaxróxin kixin Díos kui̱konoéhe̱ ti jehe sin.

17A̱ndá ijie la tjínka̱konhña kixin ninkexró chrókꞌuekana ijie̱. Janhan la chonta ti tsíkjatso̱enxín tsíchrítꞌo̱ ti nto̱na#6:17 nto̱na mi cuerpo kixin kjuasótexian ti ixra̱ kuènté Ìnchéni Jesús.

18Kíchóni, tjáncháha̱ Ìnchéni Jesucristo kixin chrókjuincheñao chꞌan kaínra. Mé tsoxiteyá. Ó tjen.

Currently Selected:

Gálatas 6: poeNTplus

Highlight

Copy