Gálatas 2

Pablo la ko ti sin tsíkjeyá Jesús

1 # Hch. 11:30; 15:2. *Kꞌuatsínka catorce nánó, ndá sákjuia Jerusalén ínaá, sákjuiki̱a̱n Bernabé la ko Tito. 2Sákjuia ntiha kixin Díos kjuínchenona la ntiha kónkotséki̱a̱n jehó ti sin tꞌe̱to̱an ni̱nko, la xrja̱nkaxián nkexrín tjákohá ti sin jehya judío ti itan tsaáxini. Xi̱kaha kjui̱tꞌa kixin tjínka̱konhña kixin ti ixra̱ kjui̱tꞌa la chrókóchónkó tíha. 3Méxra̱ chꞌin Tito kjuákꞌeki̱a̱n la jehe chꞌan ijnko chojni griego, la kjónté xi̱kaha, la kꞌue̱tua̱nhña sin kixin chrókua chꞌan ti xro̱ye kuènté sin judío. 4Kjónté iso ti sin chaxínhña tinkáchónki Ìnchéni kꞌuejó ntiha kixin tsotsjehe sin nkexrín ti kjuachaxin chóntani kixin tinkáchónkini Cristo Jesús kixin tjinkaon sin kixin chrókjuinchexiteyéheni ti ley ínaá. 5Kjánchó kuáhyani kuentá ti nkehe ichro sin kixin tjinkakonhñani chrókjuénka̱yáxinra kixin tichánxi̱n chrókuara ti xro̱ye, jehó tjinkaoni kixin na̱xa̱ chrókuitekáonra ti itan ndoá tsaáxini.

6 # Dt. 10:17. *La kjónté ti sin tꞌe̱to̱an kuènté ni̱nko la kjuakohya sin íjnko nkehe ni̱xin. (Jeheni la tsjehyani á chojni tꞌe̱to̱an o̱ náhí kixin Díos la nkokón tꞌikon kaín chojni.) 7La kjuátso̱an sin kixin Díos ó kjuajon ti ixra̱ i kixin tsjákohá ti sin jehya judío ti itan jína éxi tsichjéhe Díos ixra̱ Pedro tsja̱ko̱he̱ chꞌan ti sin judío. 8Kixin ti Díos tsíkꞌe̱tue̱hen Pedro tsꞌóna apóstol tsja̱ko̱he̱ ti sin judío, la kja̱xin kꞌue̱to̱an chꞌan janhan tsꞌóna apóstol tsjáko̱ha̱ ti sin jehya judío.

9Méxra̱ Jacobo, Pedro la ko Juan, ti sin tꞌe̱to̱an kuènté ni̱nko, la kjuátso̱an sin kixin Díos tsíkjajon kjuachaxin tsjákuá. Ndá kjuénka̱yáxinkoni sin kixin jeheni tsja̱ko̱he̱ni ti sin jehya judío, a̱ndá jehe sin tsja̱ko̱he̱ sin ti sin judío. Ndá kóchéhe̱ sin kixin nkokón ichꞌeni ixra̱ la itsé sin itjani. 10Jehó kjuanchia sin kixin chrókꞌuitjáñehñani tsjinki̱tsani ti sin nóa, ndá tíha la ó xráxín ichꞌeni.

Pablo kjuenduéhe Pedro chjasin Antioquía

11A̱ndá ti ó kjuíji Pedro chjasin Antioquía la janhan kjuenduáha̱ chꞌan kixin nduáhya kjuénka̱yáxin chꞌan. 12Kixin kꞌuékjinieko chꞌan ti chojni jehya judío, hasta kjuíjijia iso ti sin judío tsíchrꞌán Jacobo. Ndá kjuankíxin kꞌuaxrjenta chꞌin Pedro la í kjoniekohña chꞌan ti sin jehya judío, kixin chráko̱nhe̱n chꞌan ti sin kjuíji. 13La xi̱kaha ti íso sin kíchóni judío la kja̱xin kuitekakohen sin Pedro, kjónté nduáhya kjuénka̱yáxin chꞌan. La kja̱xin chꞌin Bernabé la kjuacha sin kjuachròe sin chꞌan. 14A̱ndá ti ó kꞌuíkua̱n kixin kjua̱ko̱xi̱nhña chꞌan éxi chrónka ti itan jína tsaáxini, la nixja̱ha̱ Pedro nkayakon kaín ti sin tsíkónkotsé. Ndáxrja̱n: “Jaha la ijnko chojni judío, la tjáko̱xián éxi jehya ijnko chojni judío kixin titekaonhña ti ley. ¿Nkekuènté tétue̱hén ti sin jehya judío kixin chrókuitekaon sin éxi ti sin judío?”

Kaín chojni la tsaá sin kixin titekaon sin Ìnchéni

15Jeheni la tsíkꞌaxrjeníxini chojni judío la jehya kꞌuaxrjeníxini chojni jehya judío chónta nchónhña ijie̱. 16#Sal. 143:2; Ro. 3:20; Ro. 3:22.*Kjánchó noheni kixin ti nkehe tsíkꞌe̱to̱an Moisés la xrokjuahya tsꞌóxika ti iji̱éni, kixin ti sin tsjìin ti iji̱é mé jehó ti sin tinkáchónki Jesucristo. A̱ndá jeheni la tinkáchónkini Ìnchéni Jesucristo kixin tjinkaoni tsꞌóxika chꞌan ti iji̱éni kixin titekaoni chꞌan. A̱ndá ti ley la tsjachahya tsꞌóxika ti iji̱é chojni.

17A̱ndá ti chaxín tjinkaoni kixin Cristo tsꞌóxika ti iji̱éni, ndá tso̱noheni kixin kjuasini ijie̱ éxi ti íso sin, la, ¿á tsjenka̱yáxini kixin Cristo kꞌue̱to̱an tsjasini ijie ní? Kjá náhí. 18Ti kui̱to̱ha̱ ti ley, ndá na̱xa̱ chrókjan chrókjui̱ntaxiteyáha̱ ínaá la táha la ó ijie̱ kuénta̱na. 19Ti ley la kjuanchia ijie̱ chrókꞌuenxian, a̱ndá ijie la tjéchua̱n kixin si̱tꞌa ixra̱ kuènté Díos. 20Janhan la éxi ikꞌuén kixin kꞌuenki̱a̱n Cristo ti kjuákꞌenkáni chꞌan ntacruz, A̱ndá ijie la jehya janhan tjéchua̱n. Cristo mé tjéchónxia̱n janhan. Ijie la tjéchónxia̱n ti cuerpo chonta kixin tinkachónkia ti Xje̱en Díos kixin jehe chꞌan la tjua̱na chꞌan la kꞌuenyákohe̱n chꞌan ti janhan. 21Tjínka̱konhña tsi̱to̱ha̱ ti tjua̱na Díos. Kixin ti chrókjuacha ti ley chrókꞌóxika iji̱é chojni la kjá chónkó ikꞌuén Cristo ti xi̱kaha.

Currently Selected:

Gálatas 2: poeNTplus

Highlight

Copy