Colosenses 3

1 # Sal. 110:1. *Jahara la ó tsíxechónko̱ara Cristo. Méxra̱ chrókjuéyára ti nkehe siín nkaya nka̱jní kixin Cristo la ntiha tjetja̱xi̱n chꞌan ti itja chjina kuènté Díos. 2Chrokjuénka̱yáxinra ti nkehe siín nkaya nka̱jní. Chrokjuéyáhyara ti nkehe siín chjasintajni, 3kixin jahara la ó kꞌuénkoara Cristo, a̱ndá ijie na̱xa̱ kónoxínhña ti kjuachón nkochríxín tsochontara ti ó tsꞌejoko̱ara Cristo la ko Díos. 4Cristo mé chontaxínra kjuachón nkochríxín, la ti ó tsokjan chꞌan ndá jahara kja̱xinra tsꞌejoko̱ara chꞌan, ndá tsꞌikonra ti kjuachaxin ijié kuènté chꞌan.

Ti nti̱a ntaxin la ko ti nti̱a ni̱xin

5Méxra̱ chrókui̱to̱héra kaín ti ijie̱ chjasintajni tjénka̱yáxinra. Ninkexró chrókjuasinkohya ijie̱ chojnichjin jehya ichjién, la ninkexró chrókjuíchꞌe nkehe jínahña, ninkexró chrókjuíchꞌe ninkehó ti nkehe tjenka̱yáxin a̱sén sin, la ko kja̱xin chrókóxríanhñara chróchontara nchónhña nkehe, kixin ti xi̱kaha la ó yóhe̱ chrókuinkachónkira ti nkehe tsíkjano̱ña. 6La tso̱nínkaon Díos la sinchekjasóte ti sin ichꞌe kaín tíha. 7Mé xi̱kaha kꞌuékji̱chꞌera jahara ósé. 8Méxra̱ ijie chrókui̱to̱héra kaín ti nkehe jínahña, chrókui̱to̱héra ti kjuanínkaon, la ti nkehe tjaké a̱sánra, ti nkehe jínahña, ti tꞌándaxíhínra kichuara la ko ti nkehe jínahña tꞌaxrjexín irꞌuara. 9#Ef. 4:22.*Chrokjui̱chꞌiyehyara kichuara kixin ósé xi̱kaha kꞌuékji̱chꞌera, a̱ndá ijie la ó chrókui̱to̱héra kaín ti nkehe ntaxin kꞌuékji̱chꞌera. 10#Ef. 4:24; Gn. 1:26.*Méxra̱ ijie la ó tsíkꞌónara chojni ni̱xin. Díos tinkánchetjóá ti jahara kixin tsꞌónara éxi jehe chꞌan kixin kjuíchꞌéna chꞌan ti jahara; méxra̱ tjinkaon chꞌan chróchoxínra chꞌan a̱ntsí jína. 11Jehya tjetoan á chojni judío o̱ chojni griego, á chojni tsíka xro̱ye o̱ náhí, á chojni tsíkji̱xi̱n ikjín o̱ náhí, á chojni nohe o̱ chojni noehña, á chojni chꞌexón ixra̱ o̱ chojni tꞌe̱to̱an. Ti nkehe tjetoan la kixin tsinkáchónkini Cristo kixin jehe chꞌan tꞌe̱tue̱hen chꞌan kaín nkehe.

12 # Ef. 4:2. *Díos la tjue̱he ti jahara la tsíkjéyára kixin tsinkachónkira chꞌan. A̱ndá jahara la ó kꞌónara chojni ni̱xin, la chrókui̱konoéhéra kichuara, la jína chrókꞌuejora, chrókjui̱nchenkehyara, la chrókójia̱hyara la ko chrókónínkákonhñara. 13#Ef. 4:32.*Chrokoninkakuénhñara kichuara la chrókꞌuitjáñahanra ichrén ijie̱ kjuásihanra íjnko chojni kixin Cristo la kꞌóxika ti ijie̱ kjuásinra, la kja̱xinra xi̱kaha chrókjui̱chꞌera. 14Mé xi̱kaha a̱ntsí tjetoan kixin chrótjue̱héra kichuara la nkoko̱a chrókjuénka̱yáxinra, la xi̱kaha nkoko̱a tsꞌejóko̱a kichuara. 15Ti kjuaxróxin tjajon Cristo mé chrókꞌue̱tue̱hen a̱sánra kixin xi̱kaha kjuénka̱yáxin Díos kꞌuéya̱hára chꞌan kixin chrókꞌónara nkoko̱a cuerpo la xi̱kaha chrókjuíkosáyehéra ti jehe chꞌan.

16 # Ef. 5:19, 20. *Ti itan kuènté Cristo nkochríxín chrókꞌue̱tue̱hen a̱sánra. Mé xi̱kaha chrókjuákohéra kichuara kaín kjuaxrexinkaon jína. Chrotsjera salmo la ko himno la ko canto kuènté Díos, la chróchje̱héra Díos kjuasáya kaín a̱sánra. 17Kaín ixra̱ chrókjuíchꞌeni la ko kaín nkehe chróndáchroni, la kaín tíha chrókjuanchaxíni kjuachaxíen ihni̱é Ìnchéni Jesús, la ko chróchje̱héni kjuasáya Itꞌéni Díos kixin tinkáchónkini Jesucristo.

Ti sin tinkáchónki Cristo la nkojína chrókꞌuejóko kícho

18 # Ef. 5:22; 1Pe. 3:1. *Jahara chojnichjin chónta xìi, la chrókjui̱nchexiteyéhéra ti xìara kixin xi̱kaha chrókjuáko̱xinra kixin tinkachónkia Ìnchéni. 19#Ef. 5:25; 1Pe. 3:7.*Jahara chojnindoa, la chrótjue̱héra ti ichjiánra la chrókónínkakuénhñara tjan. 20#Ef. 6:1.*Chájan, chrókjui̱nchexiteyéhéra itꞌára la ko ìnára kaín ti nkehe chrókꞌue̱to̱an sin kixin xi̱kaha tóxríhi̱n Ìnchéni. 21#Ef. 6:4.*Jahara itꞌé xjan, chji̱ñéhña chrókjui̱nchekónínkáonra xja̱anra la ko chrókjui̱nchekꞌaváhyara xjan. 22#Ef. 6:5-8.*Jahara chojni chꞌexón ixra̱, chrókjui̱nchexiteyéhéra ti lamoara chjasintajni. Jehya kixin ti tjejótsjehe sin ó chrókjui̱chꞌera ixra̱ éxi ijnko nkexro tjinkaon chrókjuinchechéhe̱ chojni ó. Náhí. Kaín a̱sánra chrókjui̱chꞌera ixra̱ kixin tjikosayehéra Díos. 23Kaín ixra̱ tjejochꞌera la chrókjui̱chꞌera kaín a̱sánra éxi nchexiteyéhéra Ìnchéni, la jehya kixin chrókjui̱nchexiteyéhéra chojni ó. 24Kixin ó nohara kixin Ìnchéni la sintaki̱to̱nhanra ti nkehe chónta chꞌan kixin chꞌehéra Cristo ixra̱ la jehe chꞌan mé chaxín Ìnchéni. 25#Dt. 10:17; Ef. 6:9.*A̱ndá ti sin ichꞌe ti nkehe jínahña la tsjacha sin ti nkehe jínahña kjuíchꞌe sin kixin Díos la sinchekjasóte kaín ti chojni chónta ijie̱.

Currently Selected:

Colosenses 3: poeNTplus

Highlight

Copy