2 Corintios 8

Ti chichaon tsꞌáyéhe̱ ti sin ni̱nkué Díos

1 # Ro. 15:26. *Kíchóni, tjinkaoni chrókónohara nkexrín tjejó ti sin tinkáchónki Ìnchéni tónkotsé Macedonia kixin kjua̱ko̱xi̱n sin kixin Díos imá kjuínki̱tsa ti jehe sin. 2Kixin kjónté nchónhña nkehe kꞌuatsínkaxín sin la chéhe̱ sin, la kjónté nóa sin la a̱ntsí kjuínki̱tsa sin íso chojni éxi chróchónta sin itsjé chichaon xi̱kaha. 3Janhan kꞌuíkua̱n la ko xrja̱nká kixin chaxín kjuajon sin éxi ti nkehe chónta sin la ko a̱ntsí itsjé xíkjajon sin éxi kjuénka̱yáxin sin. 4Imá chrónòa sin kixin chrókjuajoni kjuachaxin kixin kja̱xin sin chrókjuinki̱tsa sin ti sin kíchóni tinkáchónki Díos. 5La a̱ntsí itsjé kjuajon sin ke ti kjuénka̱yáxini kixin chrókjuajon sin, kixin sa̱o la kaín a̱sén sin kuitekaon sin Díos, a̱ndá kjuínchexiteyéhe sin ti jeheni éxi tóxríhi̱n Díos. 6Méxra̱ chrónoéhe̱ni Tito kixin chrókjuintaxín chrókjuenájín chꞌan ti chichaon tjájonra ti tónkotséra kixin jehe chꞌan kjuankíxixín chꞌan ti ixra̱ a senó. 7Jahara la jína kjuáko̱xinra kixin a̱ntsí tinkachónkira Díos, a̱ntsí kꞌuitjára chro̱nkaxinra ti itén Díos, a̱ntsí kꞌuitjára nkehe kuènté Díos, la ko a̱ntsí chontara kjuachéhe̱, la a̱ntsí tjue̱héra ti jeheni. Méxra̱ ijie la a̱ntsí chrókjuáko̱xinra chrókjuínki̱tsara ti sin kíchóni.

8Jehya tétua̱hanra kixin xi̱kaha chrókjui̱chꞌera. Náhí. Jehí tjínka̱oan kixin chrókónohara nkexrín jína kjuíchꞌe ixra̱ ti íso sin kixin kja̱xinra chrókjuáko̱xinra kixin chaxín tjue̱héra kichuara. 9Ó nohara kixin Ìnchéni Jesucristo, kjónté chónta chꞌan kaín nkehe, la kónóa chꞌan kixin imá tjue̱he chꞌan ti jeheni, la kónóa chꞌan kixin jína tsochóntani kaín nkehe.

10Tjínka̱oan kixin jína tsꞌejora, la xi̱kaha ndáxrja̱n ti nkehe tjénka̱yáxian kuènté ti ixra̱ i. Ti nánó kꞌuatsínka la jahara kjuankíxinra kjuínki̱tsara sin, kjuájonra nkehe, la jehya jehó kjuájonra, kja̱xin imá kócháhara kjuínki̱tsara sin. 11A̱ndá ijie chrókjuintaxín chrókjuínki̱tsara la kaín a̱sánra chrókjuájonra éxi tjachara nkojnko ña̱o éxi ti xránkíxixín tsíkjate̱héra tsjínki̱tsara xi̱kaha. 12Mé xi̱kaha ti nkojín chojni chaxín tjinkaon chrókjuajon, la tso̱xríhi̱n Díos ti tjajon sin ti nkehe chónta sin. Díos la tjanchahya ti nkehe chóntahyani.

13Tjinka̱konhña kixin kaín nkehe tsjájonra ndá íso sin tsꞌejóxin jína, ndá jahara tsochontahyara nkehe sintera. Náhí. 14Ícha jína nkokón chróchontara. Ijie jahara chontara ti nkehe chóntahya íso sin. A̱ndá íjnko ña̱o jehe sin tsochónta sin la tsjinki̱tsa sin ti jahara. Mé xi̱kaha tjínki̱tsa kichuara. 15#Ex. 16:18.*Éxi ndáchro ti xroon itén Díos: “Ti sin kjuenájín nchónhña la mé ninkehó xèhya, la ko ti sin kjuenájínhña itsjé, la kjónté tsjéhya la xehe̱ iso ti nkehe kjuenájín sin.”

Ti sin ichrꞌán Pablo

16Kjuasáye Díos kixin kjuínchexraxinkaon ti chꞌin Tito kixin tóxakohen chꞌan éxi tóxakonaxián janhan kixin ti jahara. 17Ndá xrja̱noáhá chꞌan kixin chrókjuíjitsjehe chꞌan ti jahara la kóxríhi̱n chꞌan, ndá kja̱xin chꞌan kóxakohen chꞌan kixin á jína tjejora, ndá tjinkaon chꞌan chrókjuíjitsjehe chꞌan ti jahara.

18Kja̱xin kꞌue̱to̱an kixin tsjijikotóxi̱n chꞌin Tito, íjnko kíchóni chóxin kaín nkexro tinkáchónki Ìnchéni tónkotsé nkojnko ni̱nko kixin ti ixra̱ jína tjechꞌe chꞌan kixin titekaon chꞌan ti itan tsaáxini. 19Kaín ti sin tónkotsé ni̱nko ntihi kjueyá sin ti nkexro a kixin sátsjikotóxi̱n chꞌan ti jeheni ti sátsjikoni ti chichaon tsjikénheni ti sin chóntahya. La nchexiteyáni ti ixra̱ kixin xi̱kaha tsjikosáyeheni Díos la ko xi̱kaha tsja̱ko̱xi̱ni kixin chéhe̱ni tjinki̱tsani ti íso sin. 20Tjinkaoni kixin tso̱kohya nkexro tsꞌándaxín kixin nkexrín chꞌexíni ixra̱ ti chichaon xrenájín ntihi. 21#Pr. 3:4.*Méxra̱ tjinkaoni chrókjuíchꞌeni ndoá ti ixra̱ i, jehya tjinkaoni kixin jehó chojni chrókꞌuikon kixin jína tjejóchꞌeni. Náhí, kja̱xin Ìnchéni la tjetsjehe chꞌan.

22Kja̱xin kꞌue̱to̱ani kixin tsjijikotóxi̱n sin íjnko kíchóni, ijnko nkexro kjua̱ko̱xi̱n kixin chéhe̱ chrókjuinki̱tsa kixin itsjé ixra̱ kjuíchꞌe. A̱ndá ijie a̱ntsí chrókjuíchꞌe chꞌan ixra̱ kixin chóxin chꞌan ti jahara. 23A̱ndá chꞌin Tito la tjinki̱tsa chꞌan ti janhan. La ti tsjanchankí sin nkexra̱ ichꞌe ti í yaá sin kíchóni la chenkara sin kixin ni̱nko tjejó ntihi ichrꞌán ti sin a kixin tjikosáyehe sin Cristo. 24Méxra̱ tjáko̱xinra kixin chaxín tjue̱héra kichuara kixin tso̱nohe ti sin kíchóni kjuíjixín íso ni̱nko kixin ti nkehe ndáxrja̱n kuèntára la chaxín ndoa.

Currently Selected:

2 Corintios 8: poeNTplus

Highlight

Copy

Compare