2 Corintios 12

Ti nkehe kꞌuíkon Pablo

1Ninkehó sínkíhya ti si̱ntankexián ti ixra̱ kjui̱tꞌa. Kjánchó tso̱xrja̱nka ti nkehe kꞌuíkua̱n la ko ti nkehe kjuínchenona Ìnchéni. 2Choxián ijnko nkexro tinkáchónki Cristo, la ó kꞌuatsínka catorce nánó sátsíkji̱ chꞌan nkaya nka̱jní la ikjan chꞌan, a̱ndá nonahña á sátsíkji̱ko chꞌan ti cuerpo kuènté chꞌan o̱ náhí. Jehó Díos la nohe tíha. 3La choxián ti nkexro a, kjánchó nonahña á koí ti cuerpo kuènté chꞌan sátsíkji̱ko chꞌan o̱ náhí. Jehó Díos mé nohe tíha. 4Jehó nona kixin sátsíkji̱ chꞌan nka̱jní. La kuíhin chꞌan nkehe nixja Díos, kohya kjuachaxin nijnko chojni tsochronka. 5Jína chrókjui̱ntankexián kixin choxián ti nkexro xi̱kaha kóhen. Kjánchó xrokjuahya chrókjui̱ntahnke kixin janhan imá nona. Ícha jína chrókjuákoxian kixin ti janhuán la chontahya ninkehó kjuachaxin. 6A̱ndá ti chrókjui̱ntankexián ti nkehe kóna la jehya ijnko kjualóko tíha, kixin chaxín ti nkehe chróxrja̱nka. Kjánchó si̱ntahnkehya kixin tjínka̱konhña kixin chrókjuénka̱yáxin chojni kixin a̱ntsí jína janhan. Náhí. Tjínka̱oan kixin ti ixra̱ tꞌikon sin la ko ti nkehe tihin sin mé tsjenka̱yáxixín sin á jína ti janhan o̱ náhí.

7Imá náxrjón ti nkehe kꞌuíkua̱n, méxra̱ xránjon kjuachaxin kixin kꞌuayáha̱ ijnko kjuatjoté éxi ijnko ichꞌi̱ kjuiáte ti cuerpo kuénta̱na kixin chrókjui̱ntankexinhña ti nkehe kꞌuíkua̱n, la tíha mé ti nkehe ichrꞌán ti Jínahña ikui nchekjasótena. 8La iní vece xrja̱noáhá Ìnchéni kixin chrókjuatsìin chꞌan ti kjuatjoté chonta, 9kjánchó ndáchro Ìnchéni kixin jehó ti kjuachaxin kuenté chꞌan mé chrókuichánxi̱na, kixin ti kjuachaxin kuenté chꞌan mé a̱ntsí tja̱ko̱xi̱n ti chojni fuertehya. Méxra̱ chàna kixin fuertehyana kixin xi̱kaha a̱ntsí tsꞌayáha̱ ti kjuachaxin kuènté Cristo. 10Méxra̱ chàna kjónté fuertehyana, kjónté tꞌándaxìna chojni, kjónté ticháxi̱na nkehe, kjónté chónkíhi sin chrókꞌóñána sin, la ko kjónté chrókjuasótexian kixin tinkachónkia Cristo. Chàna kixin ti fuertehyana la a̱ntsí tsochonta ti kjuachaxin kuènté Cristo.

Tóxakohen Pablo kixin ti sin tjejó ni̱nko Corinto

11Kjá locona, ichrora. Kjánchó xi̱kaha níxja kixin jahara la kuitekákonhñara. Jahara chróchro̱nkara kixin jína tjàkua. Jehya kixin kanhñó tjetoana, landá ti sin chréhéra la a̱ntsí tjetoan sin. Náhí. Kjónté chaxín janhan la ninkehó sínkíhyana. 12Kjuásian itsjé kjuaxroan ijié la jína kjuakꞌé kónínka̱konhña mé xi̱kaha kjuáko̱xián kixin chaxín janhan ijnko nkexro tsíkjeyá Ìnchéni. 13¿Xá ndáxrja̱n kixin kanhñó sínkíra, ke ti íso ni̱nko ní? Kjá ti nkehe kꞌuitjáña kjui̱tꞌahya, la kjuanchahyara kixin tsjínki̱tsara ti janhan. A̱ndá ti nduáhya kjui̱tꞌa la tónínkákonhñara.

14A̱ndá ijie ó yaxìna kixin ó tíhi ti níxin vece tsjasántsjahára la tjáncháhyara ninkehó chichaon. Janhan la tjéyáhya ti nkehe chontara. Náhí. Ti nkehe tjéyá la mé jahara kixin jahara la tꞌíkua̱n éxi xja̱na xi̱kaha kixin éxi ijnko itꞌé xjan la tjenájín chichaon kixin tsjinki̱tsa ti xje̱en. Jehya ti ixjan tjenájín chichaon kixin tsjinki̱tsa ti itꞌé, náhí. 15Janhan, kjónté si̱ntakjeje̱ kaín ti nkehe chonta la ko kjónté chrókꞌuenxian ti ixra̱ kixin jína chrókꞌuejora. Janhan la imá tjua̱hára, kjánchó jahara la kanhñó tjue̱héra ti janhan.

16Janhan la tja̱áhyara ninkehó ixra̱, kjónté nkojín sin tsondáchro sin kixin kjuitꞌayahara. 17¿Xá kjuitꞌayahara ti nkojín nkexro ichrꞌán kjuíjitsjehe sin ti jahara ní? 18Ti ó kjuáncháha̱ Tito kixin tsjijitsjehe ti jahara la ko kja̱xin ti íjnko kíchóni kjuíjikotóxi̱n chꞌan, la, ¿á kjuitꞌayahara ti chꞌin Tito, ní? ¿Á chaxínhña kixin janhan la ko Tito la jína kꞌuéjoni kixin nkokón Ncha̱kuén Díos chóntani ní?

19¿Á tjénka̱yáxinra kixin xi̱kaha nixjani kixin chóntani ijie̱ ní? Náhí. Díos la tjetsjehe kixin nixjani éxi ijnko chojni tinkáchónki Cristo. Kíchóni, tjua̱hára, la kaín tíha ndáxrja̱n kixin tjínka̱oan kixin a̱ntsí chrókuinkachónkira Ìnchéni Cristo. 20Tóxakona kixin ti ó tsjasántsjahára la tso̱xrínahña nkexrín tjejora la ko kja̱xinra tso̱xríanhñara ti nkehe tsonixja. Tóxakona kixin ti ó tsjasán la na̱xa̱ siín kjuanínkaon, na̱xa̱ siín kjuachji̱no̱xíhin, na̱xa̱ ninkákohénra kichuara, na̱xa̱ chrókuéto̱anra jahóra, na̱xa̱ tinkachónkira kjuachꞌia, na̱xa̱ tꞌándaxíhínra kichuara, na̱xa̱ chontara kjuahnke la ko nkoko̱ahya tjénka̱yáxinra. 21Tóxakona kixin ti ó tsjasántsjahára ínaá la ti Díos kuénta̱na la sinchesuéhe̱ chꞌan ti janhan kixin ti jahara, landá tso̱tsja̱nka kixin itsjéra la na̱xa̱ ti̱toéhyara ti ijie̱ tsíkjásinra, na̱xa̱ chontara chojnichjin ókjé jehya ichjiánra la ko na̱xa̱ ti̱toéhyara kaín ti íso nkehe jínahña kꞌuékji̱chꞌera.

Currently Selected:

2 Corintios 12: poeNTplus

Highlight

Copy