Romanos 4
4
Thi bincheꞌe Abraham
1Mexinxin, ¿keꞌe rundachro ná ixin keꞌe bacha Abraham, thi kjui ndo dachriꞌa ná xrachrjen? 2Ja̱ Ndo Dio binchetjañeꞌe Abraham ixin thi jian bincheꞌe, Abraham jichunda keꞌe tsainxin ñao, aro jeꞌa ngathexin kon Ndo Dio. 3Aro ndachro ngain Xruen Ndo Dio: “Abraham bechunthia Ndo Dio, mexinxin Ndo Dio bayée Abraham inchin naa chujni xruꞌin thi jianꞌa bincheꞌe.” 4Ko nua ná ixin thi xengeꞌe ꞌna naa thi ncheꞌe xra jeꞌa jidithuen ixin yaa thi dacha ixin xra bincheꞌe. 5Aro jeꞌa jamee ngain Ndo Dio ixin thi ncheꞌa xra aro chunthia ngain Ndo Dio, ndo nchetjañeꞌe chujni thi jianꞌa ncheꞌe na̱. Ko jeꞌo ixin chunthia na̱ ngain ndo, jeꞌe ndo dayée ndo chujni teꞌi inchin naa chujni jian. 6David kai nichja ixin chrjuin tunuꞌe anseen chujni kunchaon maski xruꞌin xra bincheꞌe na̱. 7Ko David ndachro:
Anto chrjuin tunuꞌe chujni bithjañeꞌe
kain thi jianꞌa bincheꞌe.
Ko kain thi jianꞌa bincheꞌe na̱, ndaxramataon.
8Anto chrjuin tunuꞌe thi chujni,
binchetjañeꞌe ndo kain thi jianꞌa bincheꞌe na̱.
9¿Aro ajeꞌo chujni judío, thi chunda thi xruꞌe diꞌin circuncisión, Ndo Dio sinchenchaon na̱, o kai sinchenchaon ni jeꞌa judío, thi chundaꞌa xruꞌe? Ixin jaꞌan ná undachro ná ixin Ndo Dio bayée ndo Abraham inchin naa chujni jian jeꞌo ixin bithikaon ngain ndo. 10Are Ndo Dio bayée Abraham, ¿a ubechunda xruꞌe o naꞌi? Jeꞌe xra bechundaꞌa xruꞌe are bayée Ndo Dio. 11Kuthimejan Abraham bayée xruꞌe ixin rugatsuanxin ni ixin Ndo Dio ubayée inchin naa chujni jian ixin jeꞌe chunthia ngain ndo. Ko jañaa Abraham kjan ndudee kain ni chunthia Ndo Dio, maski bayeꞌa na̱ xruꞌe. Ko jañaa Ndo Dio dayée ndo chujni teꞌi ixin chunthia na̱ ngain ndo. 12Ko Abraham kai ndudee ni bayée xruꞌe ko chunthia na̱ ngain Ndo Dio, jañaa inchin bincheꞌe Abraham are xra bayeꞌa xruꞌe.
Thi jikininxin sayée ni chunthia Ndo Dio
13Ndo Dio ndachro ngain Abraham ko ngain kain chujni bachrjeninxin jeꞌe ixin jeꞌe rugayee nguixin nunthe. Ko bayée nunthe ixin chunthia ngain Ndo Dio ko kjan jian chujni ngain ndo, ko jeꞌa ixin bithikaon ley. 14Ixin ja̱ jeꞌo ni dithikaon ley rugayee na̱ thi ndachro ndo, yaa ruchro ixin xruꞌin renthe thi chunthia ni ngain Ndo Dio, ko jamee xruꞌin rukurenthe thi undachro Ndo Dio. 15Ndo Dio ncheꞌe ndo jie̱ ngain chujni dithikaonꞌa ley. Aro ja̱ xruꞌin ley jii, xruꞌin jie̱ duan.
16Mexinxin rugunda ruchunthia ra ngain Ndo Dio ko jañaa sithuꞌan ra thi ndachro ndo ixin sajon ndo ngajin ra, ko ngain kain chujni rugachrjeninxin Abraham. Ko jeoꞌa ni dithikaon ley rugayee jiꞌi, kai sayée ni chunthia xraa Abraham. Mexinxin Abraham ndudaa ná kain ná xro chunthia ná. 17Inchin jitaxin ngain Xruen ndo: “Jaꞌa rukjan ndudee tsjé chujni nguixin nunthe.” Ko Abraham bayée nunthe ixin chunthia ngain Ndo Dio, ndo nchexechon ni ndadigeꞌen ko nchechjian thi xra jiꞌa.
18Maski are mee, Abraham ibixraxaonꞌa ixin nchao rugechunda chjan, aro maski jamee, jeꞌe bechunthia ngain Ndo Dio, ko jañaa jeꞌe bigeꞌe “ndudee tsjé chujni nguixin nunthe”, jañaa inchin ndachro ndo. 19Maski Abraham bechunda chiaon naꞌo thi kan nano ko uchiaon ndarugeꞌen, jeꞌe xra bachunthia ngain Ndo Dio ko kai Sara thi kjui chriꞌi ko anto joon ko chroꞌa runchian chjan. 20Aro Abraham kain nchaꞌon bagithikaon ixin Ndo Dio runcheꞌe ndo thi ndachro ndo, ko kain nchaꞌon icha bachunthia ngain ndo ko banchesayeꞌe ndo. 21Ko Abraham jian benuꞌe ixin Ndo Dio jié juachaxin chunda ndo ko runcheꞌe ndo kain thi ndachro ndo. 22Mexinxin Ndo Dio bayée ndo Abraham inchin naa chujni jian ixin bachunthia ngain ndo. 23Ko kji̱nꞌa na̱ jiꞌi jeꞌo ixin Abraham, 24kai kji̱n na̱ ixin jaꞌan ná xro chunthia ná ngain Ndo Dio ixin dayáa ná ndo inchin naa chujni jian ixin duthikaon ná ngain Nchaa ná Jesucristo, thi binchexechon Ndo Dio ngayexin ni ndadigeꞌen. 25Ko Jesucristo xrajon guen na̱ ixin kjuenga ꞌna kain thi jianꞌa binthoꞌo ná ko kjan xechon, ko jamee Ndo Dio nchao bayáa ná ndo inchin chujni jian.
© 2017, Wycliffe Bible Translators, Inc. All rights reserved.