San Marcos 13

Jesús ndachro ixin ruxanthe niꞌngo

(Mt. 24:1-2; Lc. 21:5-6)

1Jesús bachrjexin ngain niꞌngo icha renthe, are naa chujni bakao ndachro ngain:

—¡Suixin ke tjaago, tsjexin anto yeye xro ko yeye thjarioꞌo teꞌi!

2Ko Jesús ndachro:

—¿A dikon kain thjarioꞌo yeye teꞌi? Ndua rindathjo ixin xruꞌin xro sithuꞌe ngataꞌa inaa xro ixin kain ndaruxanthe.

Thi tsuꞌen saꞌo kuthimejan tsjexin nunthe

(Mt. 24:3-28; Lc. 21:7-24; 17:22-24)

3Ko icha chungiixin sabinthekji na̱ ngain jna diꞌin Ntha Olivo, jii no thi bagachrjexin ni niꞌngo icha renthe. Ko Pedro, Jacobo, Juan ko Andrés jimao banchiangiꞌi na̱ Jesús ko ndachro na̱:

4—Ndachjejin ni ra, ¿kensa sikuꞌen kain yaa? ¿Ko keꞌe thi naꞌa dikunxin ni sikuꞌen are utsuꞌen yaa?

5Ko Jesús ndachro:

—Tsjeꞌe ra ixin xruꞌin kensen sinthayaꞌa ra. 6Ixin anto tsjé thi tsii ko rundachro ixin chunda juachaxinna ko rundachro: “Jaꞌan thi Cristo na”, ko tsjé chujni sincheyeꞌe.

7’Ko are jaꞌa ra tsiꞌin ra ixin anto duen choo chujni ngain nunthe, ko tsiꞌin ra ixin suen choo na̱ ngain ikanxin rajna, aro xraonꞌa ra ixin jiꞌi rugunda tsuꞌen, aro xra jeꞌa nchaꞌon are ndatsjexin nunthe. 8Ixin chujni naa nunthe siguen chujni ngain inaa nunthe, ko thi thetuꞌan siguen inaa thi thetuꞌan ngain inaa nunthe. Ko ngain tsjé nunthe suji tsingi nunthe ko anto seꞌe jintha, ko kain yaa tsuꞌen ko nandaa tsexinxin thi anto tangi tsuꞌen chujni.

9’Aro tsjeꞌe ra ixin xruꞌin tsuꞌan ra, ixin chujni sajon ra na̱ ixin sinthaꞌa ra na̱ jie̱ ko anto sintja ra na̱ ngain niꞌngo ixin dithikaon ni ra jaꞌan, ko chujni sajon ra na̱ ngain ni thetuꞌan nunthe ko ngain ni rey ixin jañaa nchao runichja ra ngain na̱ ixin jaꞌan. 10Aro saꞌo rugunda ruxraago thi jian juajnee Ndo Dio ngain nguixin nunthe. 11Ko are tsiaxiꞌan ra na̱ ko sinthachiaꞌan ra na̱ ngain ni ncheꞌe jie̱, taꞌa ra juachjaon ixin keꞌe rundachro ra o kexreen runichja ra, jeꞌo nichja ra thi Ndo Dio rundathjo ra. Ixin jeꞌa jaꞌa ra thi runichja ra, Espíritu Santo, mee thi runichja ixin jaꞌa ra. 12Chujni sichro jie̱ ixin xan choo ixin nasuenxon na̱ xan, ko ndudaꞌa sichro ndo jie̱ ixin xeꞌen ndo, ko chjan runingakuꞌen xan ni nduꞌa xan ko sichro xan jie̱ ixin nasuenxon na̱ ni nduꞌa xan. 13Chujni nguixin nunthe runingakuꞌan ra na̱ ixin jaꞌan. Aro thi tsixiꞌin ko xruꞌin nchaꞌon tsinthuꞌe thi jaꞌan kjuagua, chujni jiꞌi thi rukjan inaa chujni narua.

14’Mexinxin are sikon ra ngain niꞌngo thi anto thjuaꞌa sinchendusen na̱ ngain Ndo Dio, jañaa inchin ndachro Daniel, thi bagayee juajnee Ndo Dio. —Thi tsjeꞌe xroon jiꞌi rugunda tsinxin—, ko are mee xro sinthe ra ngain nunthe Judea sathinga ra ngagaꞌa jna. 15Ko thi seꞌe ngataꞌa nchianduꞌa, saniaꞌa siruee thi sinao sasikao. 16Ko thi seꞌe ngataon jngi, rukjanꞌa siruee lunthue. 17¡Anto tangi tsuꞌen kain nchrii sintheyaa chjan ko kain nchrii ruchunda chjan tetai ngain nchaꞌon mee! 18Ko nchetseꞌen ra ñao Ndo Dio ixin satsingaꞌa ra are kunithjaue kin, 19ixin are mee anto tangi tsuꞌen, ko thi tangi mee bagikuꞌan ni are nakuexinxin beꞌe nunthe jiꞌi, ko isikuenꞌa. 20Ko Ndo Dio kuanchrjandaꞌa batho tsjé nchaꞌon thi tangi mee, ixin ja̱ rukanchrjanda ndo xruꞌin chujni ruxeꞌe, ko mee bincheꞌe ndo ixin anto thjueꞌe ndo chujni jeꞌe ndo kuinchieꞌe ndo.

21’Are mee ja̱ chrujan chujni rundathjo ra: “Nthiꞌi jii thi Cristo”, o “Nujiꞌa jii”, jaꞌa ra dithikaonꞌa ra. 22Ixin are mee tsununxin tsjé thi rundachro ixin jeꞌe thi Cristo ko tsjé thi rundachro ixin jeꞌe thi dayée juajnee Ndo Dio, aro nduaꞌa. Ko sincheꞌe na̱ tsjé thi chrjuin dikon ni ko tsjé thi xra naꞌa dikunxin ni, ko ja̱ nchao kai sincheyeꞌe na̱ chujni ukuinchieꞌe Ndo Dio. 23Aro tsjeꞌe ra ixin xruꞌin tsuꞌan ra ixin jaꞌan ubinthanuꞌa ra kain thi sikuꞌen jiꞌi.

Rukjan tsii thi Xii juixin ngajni

(Mt. 24:29-35, 42-44; Lc. 21:25-36)

24’Ko are tsjexin satho kain thi nchaꞌon anto tangi mee, kuthimejan nchaꞌon isinchengasanꞌa nchaon ko kunithjao isinchengasanꞌa ba. 25Kunutse singuxin ba ngajni ko kainxin thi jii ngajni ruxranga. 26Kuthimejan sikon na na̱ jaꞌan, thi Xii juixin ngajni, siꞌi inaa ngakjan thjui kunixin jié juachaxin. 27Ko jaꞌan ruruaꞌan angelna ixin satse kainxin chujnina kuinchiaa, ni te nguixin nunthe ko ngajni.

28’Tangi ra ixin thi tuꞌen ntha higo: Are xesan chaan ntha, jaꞌa ra unuꞌa ra ixin ujitunchiaon kunithjaue chrin. 29Jañaa kai are sikon ra kain yaa tsexiꞌin tsuꞌen, jaꞌa ra unuꞌa ra ixin jaꞌan uchiaon rukjan na siꞌi inaa. 30Atho ndua thi rindathjo ra ixin tsuenja kain jiꞌi, kuthimejan ndaseꞌen chujni sinthechon are mee. 31Maski ngajni ko nunthe ndasitjaan, aro thi jaꞌan ndachrjan jaan sikuꞌen.

32’Aro xruꞌin kensen nuꞌe nchaꞌon ko hora are sikuꞌen jiꞌi, ko xruꞌin ángel nuꞌe ko kai jaꞌan, thi Xeꞌen Ndo Dio, nunaꞌa. Jeꞌo Ndo Dio, Ndudaa ná, thi nuꞌe.

33’Mexinxin jaꞌa ra tsjeꞌe ra jian are sikuꞌen kain jiꞌi ixin nuaꞌa ra keꞌe hora tsii Nchaa ra. 34Ko mee inchin naa xii sathji kjín ko kuinthuꞌe xa nchianduꞌa xa, aro saꞌo thetuꞌen xa ni ncheꞌe xree xa sincheꞌe na̱ xra jikininxin ngain nchia mee, ko kuetuꞌen xa thi jinda thi dixinxin ni nchia ixin senda jian. 35Mexinxin tsjeꞌe ra jian, ixin nuaꞌa ra kesa tsii nchee nchia mee, ¿atsii xa are utsukjin, o atsii xa are uthie, o tsii xa are xra nduuyo o tsii xa are ujidingasaan? 36O rukinbeꞌo xa are jaꞌa ra techuenꞌa ra xa ko sithja ra xa tatechrin ra. 37Thi ndathjo ra jiꞌi jeoꞌa jaꞌa ra tendathjo ra, jiꞌi ndachrjan ixin kainxin chujni: ¡Tsjeꞌe ra jian are sikuꞌen kain jiꞌi!

Currently Selected:

San Marcos 13: plsNT

Highlight

Copy

Compare