San Marcos 11

Jesús bigaꞌa rajna Jerusalén

(Mt. 21:1-11; Lc. 19:28-40; Jn. 12:12-19)

1Ko are uchiaon tediji na̱ Jerusalén, biji na̱ ngain rajna Betfagé ko rajna Betania, chrika jna diꞌin Ntha Olivo. Nthi̱ꞌa̱ Jesús ruaꞌan yoo chujni bakao, 2ko ndachro ngain na̱:

—Thji ra ngain rajnanchjan dikon ni taꞌa. Nthi̱ꞌa̱ sinchii ra naa kuluchuchjan jichrua ba, ko kuluchuchjan mee xra xruꞌin chujni digetaꞌa ba. Tunxindangeꞌe ra ba ko sikoo ra ba. 3Ko ja̱ chrujan chujni sanchiangiꞌa ra ixin unda jañaa tencheꞌe ra, ndache ra na̱ ixin Nchaa ra rugundeꞌe ba, kuthimejan sikaꞌan ra ba.

4Kuthimejan sakjui kayui ni mee ko bithja na̱ kuluchuchjan tajichrua ba ngandangii nchianduꞌe na̱ no ngaxin nthiꞌá ko kunxindangeꞌe na̱ ba.

5Ko ikanxion chujni te nthi̱ꞌa̱ ndachro na̱:

—¿Keꞌe tencheꞌe ra yaa? ¿Unda tetunxindangeꞌe ra kuluchuchjan yaa?

6Ko kayui na̱ batheꞌe na̱ inchin undachro Jesús ngain na̱, kuthimejan kuanchrjandee na̱ kuluchuchjan. 7Ko bikao na̱ kuluchuchjan ngain Jesús, ko thi tetsaa na̱ kjuataꞌa na̱ kuluchuchjan ko Jesús betaꞌa ba. 8Ko nguii ngaa nthiꞌá chujni kuingo na̱ thi tetsaa na̱ ko ikanxion na̱ kuingo na̱ chaan nthaa juiauxin na̱ ngataon jngi.

9Ko kain chujni tetaon nthiꞌá ko kain chujni teruee kuexiꞌin na̱ kuyao na̱:

—¡Thjengijna ni ra, jaꞌa thi binthanchaon Ndo Dio ko juiꞌi kunixin juachaxiin ndo! 10¡Ndo Dio binchenchaon thi siketuꞌan inchin kuetuꞌan David! ¡Thjengijna ni ra Suixin Ndo Dio, ndo thjen ngajni!

11Ko Jesús bigaꞌa ngain rajna Jerusalén ko kjui ngain niꞌngo icha renthe. Ko are juexin tsjeꞌe kainxin thi jii nthi̱ꞌa̱ ko undajitunthie, jeꞌe ko ni theyoo bakao sakjan na̱ ngain rajna Betania.

Thi kuꞌen ntha higo xruꞌin thuchjuin dajon

(Mt. 21:18-19)

12Ko nduexin are bachrjexin na̱ Betania, Jesús beꞌen jintha. 13Ko kjín bikunxin naa ntha higo jiyaa ntha ka, ko Jesús bitsjeꞌe ntha ixin rugithja tho higo, aro xruꞌin tho bithja ixin xra jeꞌa kunithjaue tho. 14Kuthimejan Jesús ndachro ngain ntha higo mee:

—¡Ixruꞌin chujni rukjan sine thuchjuian!

Ko kain chujni bakao Jesús kuiꞌin na̱ jiꞌi.

Jesús bantsjexin ngain niꞌngo chujni bakeꞌna ko banchekji

(Mt. 21:12-17; Lc. 19:45-48; Jn. 2:13-22)

15Ko are biji na̱ Jerusalén, Jesús bixiꞌin ngain niꞌngo icha renthe, ko kuexiꞌin bengi kain chujni tetheꞌna ko tenchekji. Ko kunkjamangiꞌi kain nthanchauꞌen chujni tedasingixin tumi ko kai kunkjamangiꞌi ntha xintauen kain ni tenchekji kunthuanajni. 16Ko Jesús ixruꞌin chujni kuanchrjanda ixin rugathuyee na̱ niꞌngo ko teyaa na̱ thi dikeꞌna na̱. 17Ko Jesús kjuaago ngain na̱ ko ndachro:

—Ngain Xruen Ndo Dio jitaxin: “Nchiania, siꞌin nchia, nchia tjauxin chujni Ndo Dio, ni te nguixin nunthe”, aro jaꞌa ra ndadinchekjan ra nchia, nchianduꞌa ni cheꞌe.

18Ko are kain xi daana thetuꞌan icha xi daana ko kain xi tjaago ley kuiꞌin xa thi ndachro Jesús ko binchexruxinꞌa xa. Mexinxin kuexiꞌin xa kjuee xa kexreen naruguenxon xa Jesús. Aro baxraon xa ixin kainxin chujni banchexruxiꞌin na̱ kain thi kjuaago jeꞌe. 19Ko are undakunaxin xeꞌe, Jesús sakjuixin ngain rajna Jerusalén.

Ntha higo ndadixema

(Mt. 21:20-22)

20Ko nduexin dakao are kjan batho na̱ thi jii ntha higo, ko bikon na̱ ntha ixin nguixin ntha ndadixema ntha. 21Kuthimejan Pedro xraxaon thi ndachro Jesús ko ndachro:

—¡Suixin ke tjaago! ¡Tsjexin, ntha higo ndache ixin ixruꞌin thuchjuin sajon, ndadixema ntha!

22Ko Jesús ndachro:

—Chunthia ra ngain Ndo Dio. 23Ko ndua rundathjo ra, ixin kexeꞌo chujni rundache jna jimee: “Sathjixin yaa, ko daritsiangi ndachaon”, ko mee jaan tsuꞌen, ja̱ chujni mee ndua chunthia ixin tsuꞌen, ko ruxraxaonꞌa ngain anseen a jaan tsuꞌen o tsuenꞌa. 24Mexinxin ndathjo ra, ixin kain thi sanchia ra ngain Ndo Dio, ko dithikaon ra ixin jaan sayéꞌe ra, jamee tsuꞌen. 25Ko are tenichjeꞌe ra Ndo Dio, ko chrujan chujni tetuñauꞌe ra, nchetjañeꞌe ra na̱. Jamee kai Ndudaa ra rexruxin ngajni sinthatjañaꞌa ra ndo kain thi jianꞌa ncheꞌe ra. 26Aro ja̱ sinchetjañeꞌa ra chujni mee, kai Ndudaa ra rexruxin ngajni kai chroꞌa sinthatjañaꞌa ra ndo thi jianꞌa ncheꞌe ra.

Thi juachaxin chunda Jesús

(Mt. 21:23-27; Lc. 20:1-8)

27Kuthimejan kjan biji na̱ Jerusalén. Ko are Jesús tarideꞌe ngain niꞌngo icha renthe, kunchieꞌen ngain jeꞌe kanxion xi daana baketuꞌan ngain icha xi daana ko kanxion xi tjaago ley ko kanxion xi thetuꞌan ngain rajna. 28Ko ndachro xa ngain Jesús:

—¿Keꞌe juachaxin chunda jaꞌa ixin ncheꞌe kain jiꞌi? ¿Ko kensen chjaa juachaxin jiꞌi?

29Ko Jesús ndachro:

—Kai jaꞌan rinaꞌo sanchiangiꞌa ra, ko ja̱ rundachjejin ni ra thi jaꞌan sanchiangiꞌa ra, kai jaꞌan rundathjo ra keꞌe juachaxin nthaxin kain jiꞌi. 30Ndachjejin ni ra: ¿Kensen ruaꞌan Juan ixin banchegithe chujni? ¿A Ndo Dio o chujni?

31Ko kuexiꞌin xa banchiangiꞌi choo xa ko ndache choo xa:

—¿Keꞌe rundachro ná?, ixin ja̱ rundachro ná ixin Ndo Dio ruaꞌan, jeꞌe rundathjo ná: “¿Unda bithikaonꞌa ra thi ndachro Juan?” 32Ko kai chroꞌa rundachro ná ixin chujni ruaꞌan.

Ko jaꞌin ndachro xa ixin baxraguen xa chujni ixin kain na̱ bagithikaon na̱ ixin Juan jaan ndua, naa thi bagayee juajnee Ndo Dio. 33Mexinxin ndachro xa ngain Jesús:

—Nunaꞌa ná.

Kuthimejan ndachro Jesús ngain xa:

—Mexinxin jaꞌan kai rundathjoꞌa ra keꞌe juachaxin nthaxin kain jiꞌi.

Currently Selected:

San Marcos 11: plsNT

Highlight

Copy

Compare