San Marcos 10
10
Jesús tjaago ixin thi dachrjendeꞌe ni tekaꞌo choo
(Mt. 19:1-12; Lc. 16:18)
1Jesús bachrjexin rajna Capernaum, ko sakjui no nuntheꞌe Judea ko no tuenxin nda Jordán. Ko nthi̱ꞌa̱ kjan xrathe chujni ngain Jesús inaa, ko banchekueꞌen na̱ inchin jeꞌe bancheꞌe. 2Kuthimejan kunchieꞌen kanxion xi fariseo ngain Jesús ixin runchenichja xa Jesús naa thi nchaoꞌa jii ixin nchao rukjangixin xa. Ko banchiangiꞌi xa anchao naa xii sachrjendeꞌe xa chriꞌi xa. 3Kuthimejan Jesús ndachro ngain xa:
—¿Keꞌe kuetuꞌan ley bayée Moisés?
4Kuthimejan jeꞌe xa ndachro xa:
—Moisés bajon juachaxin ixin nchao sajon ni ngain nchra naa xroon setaxin ixin unda bachrjendeꞌe choo ni, ko jañaa nchao rundache ni nchra satsji nchra.
5Kuthimejan ndachro Jesús ngain xa:
—Moisés kuetuꞌan jañaa ixin jaꞌa ra atho cha thinxin ra. 6Aro ndachro ngain Xruen Ndo Dio ixin are kainxin kuexiꞌin beꞌe Ndo Dio binchechjian ndo xii ko nchrii. 7Kai ndachro: “Mexinxin xii dachrjendeꞌe xa ndudee xa ko janee xa ixin sekaꞌo xa chriꞌi xa. 8Ko kayuixin chujni mee rukjan na̱ inchin nakuaxinxon chujni.” Ko ijeꞌa yoo chujni ixin ndakjan na̱ xraa nakua chujni. 9Mexinxin thi ni Ndo Dio binchekjan nakua chujni, chujni chroꞌa santsjendeꞌe choo na̱.
10Ko are sakjan na̱ nchia, chujni bakao Jesús banchiangiꞌi na̱ ixin keꞌe ruchro thi ndachro. 11Ko Jesús ndachro ngain na̱:
—Thi xii sachrjendeꞌe chriꞌi ko sekaꞌo inaa nchra jincheꞌe jianꞌa ngain chriꞌi ixin jidejuakaꞌo inaa nchrii jeꞌa chriꞌi. 12Ko ja̱ thi nchrii sachrjendeꞌe xixiꞌi ko sekaꞌo nchra inaa xa, kai nchrii mee jianꞌa jincheꞌe ngain xixiꞌi ixin jidejuakaꞌo inaa xii jeꞌa xixiꞌi.
Jesús binchenchaon xan nchinnchinchjan
(Mt. 19:13-15; Lc. 18:15-17)
13Ko juiaꞌo na̱ kanxion xan nchinnchinchjan ngain Jesús ixin rukathe xan kunixin raa. Aro chujni bakao Jesús binchesatheꞌe chujni juiaꞌo chjan teꞌi. 14Ko are Jesús bikon yaa, guñao ko ndachro ngain chujni bakao:
—Tanchrjanda ra xan nchinnchinchjan tsii xan ngajin; kayakuenꞌa ra xan. Ixin thi thetuꞌan Ndo Dio, jeꞌo sixiꞌin thi chujni ncheꞌe xraa jeꞌe xan. 15Jaꞌan ndua thi rundathjo ra, ja̱ sithikaonꞌa ra ngain Ndo Dio inchin dithikaon naa xan nchinchjan, jaꞌa ra chroꞌa sixiꞌin ra nthi̱ꞌa̱ thi thetuꞌan ndo.
16Ko are Jesús juexin kjuua xan nchinnchinchjan teꞌi, kuentaꞌa raa ngataꞌa xan ko binchenchaon xan.
Thi xii bechunda anto tsjé tumi
(Mt. 19:16-30; Lc. 18:18-30)
17Kuthimejan, are Jesús sajithji, naa thi xii kuinga ngain jeꞌe ko bethuxin ngain Jesús ko ndachro:
—Suixin ke tjaago ko jian chujni, ¿keꞌe rugunda sinthaꞌa jaꞌan ixin nchao rukjan na inaa chujni narua ko xruꞌin nchaꞌon tsjexin?
18Jesús ndachro:
—¿Unda ndachro ixin jaꞌan jian na? Xruꞌin inaa thi icha jian, jeꞌo nakuaxinxon thi jian, ko mee Ndo Dio. 19Jaꞌa uchunxin thi kuetuꞌan Ndo Dio thi ndachro: “Duenꞌa chujni, darichrikoꞌa nchrii jeꞌa chriꞌa o xii jeꞌa xixiꞌa, theꞌa, nichjaꞌa thi jeꞌa ndua ixin inaa chujni, ncheyeꞌa chujni ko chundeꞌe juasaaya ndudaa ko janaa.”
20Kuthimejan thi xii ndachro:
—Suixin ke tjaago, kain yaa nthaꞌa ko banthaꞌa are xra xan xii na.
21Ko Jesús bikon kunixin juathjua ko ndachro ngain xa:
—Jeꞌo nakua thi ditjaan sincheꞌe. Thji ko nchekji kain thi chunda ko tunchjeyeꞌe tumia chujni nua, ko tsjé ruchunda nthi̱ꞌa̱ ngajni. Kuthimejan siꞌi ko rueꞌna.
22Ko are kuiꞌin xa kain yaa kuaa xa juachjaon ko tabechiin xa ko sakjui xa ixin anto tsjé bechunda xa.
23Kuthimejan Jesús tsjeꞌe ngayee chujni bakao ko ndachro ngain na̱:
—¡Anto tangi ixin naa chujni chunda anto tsjé tumi nchao sixiꞌin nthi̱ꞌa̱ thi thetuꞌan Ndo Dio!
24Ko chujni bakao Jesús anto kuiseꞌen na̱ ixin thi nichja jeꞌe. Aro Jesús kjan ndachro ngain na̱ inaa:
—¡Anto tangi sixiꞌin ngain thi thetuꞌan Ndo Dio chujni chunthia ixin tumii tsjengijna! 25Icha tangiꞌa naa kucamello sathuxiꞌin ba thuechjeꞌen naa nthachia ke chujni anto tsjé chunda sixiꞌin na̱ ngain thi thetuꞌan Ndo Dio.
26Ko are ni bakao Jesús kuiꞌin na̱ yaa, icha kuiseꞌen na̱ ko banchiangiꞌi choo na̱ ko ndachro na̱:
—¿Kensen nchao rukjan inaa chujni narua remee?
27Jesús tabetsjeꞌe na̱ ko ndache na̱:
—Chujni chroꞌa sincheꞌe jiꞌi, aro ixin Ndo Dio xruꞌin thi tangi jii.
28Ko Pedro ndachro ngain Jesús:
—¿Mee jaꞌan ná, xro kuinthua ná kain thi binthechunda ná ko ruaꞌa ra?
29Jesús ndachro:
—Jaꞌan ndua rundathjo ra ixin kexeꞌo chujni thinthuꞌe nchianduꞌa, o xan choo, o ndudee, o janee, o chriꞌi, o xeꞌen, o nuntheꞌe ixin ruena jaꞌan ko dikao thi jian juajna, 30chujni mee sayée na̱ naa renkia icha tsjé ke thi ubechunda na̱ inchin nchianduꞌa na̱, xan choo na̱, nchri choo na̱, janee na̱, nuntheꞌe na̱ ko kai rukjan na̱ inaa chujni narua ko xruꞌin nchaꞌon tsjexin. 31Aro tsjé chujni jai xraxaon ixin anto renthe na̱, are mee, xruꞌin tsurenthe na̱, ko ni xraxaon ixin jai rentheꞌa na̱, are mee jeꞌe na̱ icha tsurenthe na̱.
Jesús ndachro inaa ixin jeꞌe ndaseꞌen
(Mt. 20:17-19; Lc. 18:31-34)
32Ko satethji na̱ Jerusalén, ko Jesús bitauꞌen nthiꞌá chujnii ko jeꞌe na̱ kuiseꞌen na̱ ko teruee na̱ kunixin juaxraon. Kuthimejan Jesús batsjenda ni theyoo bakao ko kuexiꞌin ndache na̱ thi rukuꞌen jeꞌe. 33Ko Jesús ndachro ngain na̱:
—Jaꞌa ra tedikon ra ixin satethji ná Jerusalén. Ko nthi̱ꞌa̱ jaꞌan, thi Xii juixin ngajni, sajon na na̱ ngain xi daana thetuꞌen icha xi daana ko ngain xi tjaago ley, ko ni teꞌi rundachro na̱ ixin nasuenxon na na̱. Ko sajon na na̱ jaꞌan ngain chujni jeꞌa judío, 34ko tsjanua na na̱, ko tsjajin na na̱ rua, ko tsjanito na na̱ ndathee na̱ ko nasuenxon na na̱, aro ngain nchaꞌon ninxin jaꞌan ruxechon na.
Thi banchia Jacobo ko Juan
(Mt. 20:20-28)
35Kuthimejan Jacobo ko Juan, kayui xeꞌen Zebedeo, kunchieꞌen na̱ ngain Jesús ko ndachro na̱:
—Suixin ke tjaago, rinaꞌo ná naa juatutseꞌen ñaꞌo ngajin.
36Kuthimejan Jesús ndachro:
—¿Keꞌe rinao ra?
37Ko jeꞌe na̱ ndachro na̱:
—Rinaꞌo ná ixin are Suixin sayéꞌe juachaxin tsetuꞌan kainxin thi jii, chjana ni ra juachaxin sinthe ná ngajin, naa ná no rajianxin ko inaa ná no rajngo.
38Kuthimejan Jesús ndachro ngain na̱:
—Jaꞌa ra nuaꞌa ra keꞌe tedanchia ra. ¿Anchao tsuꞌan ra thi anto tangi tsunna jaꞌan, ko anchao ndaseꞌen ra inchin ndaseꞌen na jaꞌan?
39Ko jeꞌe na̱ ndachro na̱:
—Jaan, nchao.
Ko Jesús ndachro ngain na̱:
—Jaan ndua, anto tangi tsuꞌan ra ko seꞌen ra inchin jaꞌan seꞌen na. 40Aro thi sinthe ra no rajianxin na ko rajngo na, jeꞌa jaꞌan thi dajon juachaxin mee, jeꞌo Ndudana, ndo nuꞌe kensen sinthe nthi̱ꞌa̱.
41Ko are thi ithe chujni bakao Jesús kuiꞌin na̱ yaa, guñao na̱ ngain Jacobo ko ngain Juan. 42Aro Jesús baye̱e na̱ ko ndachro ngain na̱:
—Jaꞌa ra nuꞌa ra ixin chujni tunuꞌe ixin jeꞌe anto renthe ko tunuꞌe ixin jeꞌe thetuꞌan kain, chujni teꞌi ncheꞌe na̱ xraa ja̱ jeꞌe na̱ ruketuꞌan na̱ nguii nunthe ko thetuꞌan na̱ inchin jeꞌe na̱ rinao na̱. 43Aro ngajin ra jeꞌa jañaa tsuꞌen, ixin thi rinao icha tsetuꞌan ngayaꞌa ra, mee rugunda icha tsjengijna chujni. 44Ko kexeꞌo ra xro rinao ra icha tsetuꞌan ra, rugunda ixin chujni mee icha sincheꞌe xra ngayaꞌa ra. 45Jañaa inchin jaꞌan, thi xii juixin ngajni, juiꞌa ixin chujni tsjengijna na jaꞌan, jaꞌan juiꞌi ixin bikjengijna chujni ko ruxrajon na seꞌen na ixin jeꞌe na̱.
Jesús binchexrueꞌen Bartimeo thi bagikonꞌa
(Mt. 20:29-34; Lc. 18:35-43)
46Kuthimejan Jesús kunixin chujni bakao biji na̱ rajna Jericó, ko are bachrjexin na̱ rajna mee, anto tsjé chujni jiruee ko bikon na̱ ngandeꞌe nthiꞌá tajii naa xii bagikonꞌa ko baganchiagaꞌa, ko xii mee biꞌin Bartimeo, xeꞌen naa thi biꞌin Timeo. 47Ko are kuiꞌin ixin jithii Jesús, thi juixin Nazaret, thi bagikonꞌa kuexiꞌin kuyao suji ko ndachro:
—¡Jesús, thi bachrjeninxin David, thiakunuana jaꞌan!
48Anto tsjé chujni banchesatheꞌe ixin rutenkua, aro jeꞌe icha seen bakuyao ko ndachro:
—¡Suixin, thi bachrjeninxin David, thiakunuana jaꞌan!
49Kuthimejan Jesús tabingathjen ko ndachro:
—Daye̱ꞌe ra xii mee.
Kuthimejan jeꞌe na̱ baye̱e na̱ ko ndachro na̱:
—Taꞌa juachjaon ko dingathjen ixin Jesús jidayaꞌa jaꞌa.
50Ko thi bagikonꞌa nthiaꞌo banka thi jitsaa ko bingathjenbeꞌo ko kunchieꞌen ngain Jesús. 51Kuthimejan ndachro Jesús ngain:
—¿Keꞌe rinao ixin jaꞌan sinthaꞌa?
Jeꞌe thi bagikonꞌa ndachro:
—Suixin ke tjaago, jaꞌan rinaꞌo sikon.
52Ko Jesús ndachro:
—Ixin chunthia jaꞌa ukuxruaꞌan. Ko unchao sathji.
Ko xra jinichja Jesús are thi xii unchao bikon ko saruee Jesús.
Currently Selected:
San Marcos 10: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
