Santiago 5

Thi rugunda tsunuꞌe chujni chunda tsjé tumi

1¡Thiꞌin ra jai, jaꞌa ra xro chunda ra tsjé tumi! Tsjanga ra ko tuyao ra ixin anto tangi sikuꞌan ra. 2Kain tumia ra digiꞌi chjiin, ko luntho anto renthe chunda ra ndadijine kuchii. 3Kain chia oro ko plata chunda ra digiꞌi chjiin, ko chjiin tumia ra tjaago ixin banchexinꞌa ra tumi, ko mee tsjaaga nthauꞌa ra inchin naa xruꞌi. Jaꞌa ra anto tedasintja ra tumi are uchiaon jithii nchaꞌon ndatsjexin nunthe. 4Thiꞌin ra kexreen chro chujni anto ncheniꞌi ixin kjuengeꞌa ra na̱ ꞌna xra bincheꞌe ngataon jngiꞌa ra. Ko thi anto ncheniꞌi chujni bincheꞌe xraa ra ujithiꞌin Ndo Dio, thi Nchaa ná chunda kain juachaxin. 5Jaꞌa ra ngain nunthe jiꞌi binthechunda ra kain thi anto renthe, banchetsujin ra thi binthe ra ko bincheꞌe ra kain thi binao nthauꞌa ra. Ko thi bincheꞌe ra, jeꞌo binthanthao ra ixin seꞌen ra xraa are nchaꞌon deꞌen tsjé kuleko. 6Jaꞌa ra banchia ra gueꞌen jie̱ chujni xruꞌin teka ko naguenxon ra na̱. Ko jeꞌe na̱ xruꞌin ndachro na̱ ko xrajon na̱ beꞌen na̱.

Tsixiꞌin ni kain thi tangi sathuꞌe ni

7Mexinxin jaꞌa ra xro choo na, thixiꞌan ra kain thi tangi tsija Nchaa ná inaa. Jañaa inchin chujni thenga chuꞌen suan thi thenga ko chuꞌen chrin tuin thii ko chrin tuinꞌa thii. 8Mexinxin kai jaꞌa ra thixiꞌan ra kain, ko tunuꞌa ra jian ngain ansean ra ixin utuin tsii Nchaa ná inaa. 9Jaꞌa ra xro choo ná, nichjaꞌa ra jianꞌa ixin xan choo ra ko jañaa suanꞌa ra jie̱ ixin Ndo Dio, ndo ncheꞌe jie̱, ujindangii ndo nchia. 10Jaꞌa ra xro choo ná, tsjeꞌe ra kexreen kuixiꞌin kain thi tangi kuꞌen ni bagayée juajnee Ndo Dio, ni nichja ixin Nchaa ná. 11Ko jaꞌan ná nua ná ixin anto chrjuin ixin ni thixiꞌin dathuꞌe kain thi tangi. Jaꞌa ra ukuiꞌin ra kexreen Job kuixiꞌin kain thi tangi, ko kai unuꞌa ra ixin are bathuꞌe kain thi tangi mee, Nchaa ná anto tsjé chjee ixin Nchaa ná anto thiakunua ná ko chjaa ná thi dundaa ná.

12Aro kain ra xro choo ná, are rundachro ra ixin chrujan sajon ra dajinꞌa ra ixin ngajni, nunthe o kexeꞌo inaa sinchexin ra. Ko are rundachro ra: “Jaan”, xruꞌin inaa ndachro ra, maski jeꞌo “jaan”; ko are rundachro ra: “Naꞌi”, kai jeꞌo ndachro ra “naꞌi”, ko jañaa Ndo Dio sincheꞌa jie̱ ngajin ra.

13Ja̱ chrujan ra tedetan ra tangi, nichjeꞌe ra Ndo Dio ixin sinthjian ndo thi tangi mee. Ja̱ chrujan ra techaꞌa ra, tsjetheꞌe ra Ndo Dio. 14Ja̱ chrujan ra niꞌa ra, dayéꞌe ra ni dakuꞌen niꞌngo ixin runichjee na̱ Ndo Dio ixin ni niꞌi, ko ixin juachaxiin Nchaa ná tsinga na̱ aceite. 15Ko are chunthia ra ko sanchieꞌe ra ndo, thi niꞌi ruxingameꞌe, ko Nchaa ná sinchexrueꞌen. Ko ja̱ bincheꞌe thi jianꞌa, sitjañeꞌe thi bincheꞌe. 16Mexinxin thekiꞌin choo ra thi jianꞌa bincheꞌe ra ko nichjaxin choo ra ngain Ndo Dio ixin tsuxruaꞌan ra. Ixin chujni nichjee ndo ko jian jii ngathexin kon ndo, chunda jié juachaxin ko tuꞌen thi danchia ngain ndo. 17Elías, thi bagayée juajnee Ndo Dio, kjui naa chujni inchin jaꞌan ná ko jeꞌe anto binchetseꞌen ñao Ndo Dio ixin rukiꞌa chrin, ko juiꞌa chrin ngain nunthe nii nano ko rioꞌo. 18Ko Elías kjan binchetseꞌen ñao Ndo Dio ixin ruchjee chrin, ko kjan juii chrin inaa, ko nunthe kjan bajon nunthe thi bagajon nunthe.

19Jaꞌa ra xro choo ná, ja̱ chrujan ra ndakuinthuꞌe ra thi ndua, aro inaa sinthakjan ra ngain thi ndua, 20tunuꞌa ra ixin thi nchekjan naa chujni jincheꞌe jianꞌa ngain thi ndua, jeꞌe tsajandaꞌa chujni mee tsji ngain xruꞌi dangaꞌa, ko sincheꞌe ixin Ndo Dio sinchetjaaña tsjé thi jianꞌa.

Currently Selected:

Santiago 5: plsNT

Highlight

Copy

Compare