Hebreos 7

Jesús daana inchin Melquisedec

1Melquisedec kjui rey ngain rajna Salem ko kjui danee Ndo Dio, ndo thjen ngajni. Ko daana jiꞌi bachrje ixin bayée Abraham are kjanxin Abraham thi kjui ixin baketukaꞌo kain xi rey, ko daana binchenchaon Abraham. 2Ko Abraham bajon ngain Melquisedec naa thexin thi jeꞌe bacha ngain thi kueto. Melquisedec ruchro saꞌo “rey ke ncheꞌe thi jian”; ko kai nchegiꞌin na̱ rey rajna Salem, ko jiꞌi ruchro, “rey ke nchekunuꞌe chrjuin anseen chujni.” 3Ko xruꞌin nuꞌe ni ixin kensen kjui ndudee ko jannee Melquisedec, ko nueꞌa ni ixin kensen kjui ni xrachrjeꞌen. Kai nueꞌa ni kesa kunkjiꞌi ko kesa beꞌen. Mexinxin Melquisedec bikininxin inchin Xeꞌen Ndo Dio ixin jeꞌe xan daana xan kainxin nchaꞌon.

4Jai xraxaon ra kexreen renthexin kjui Melquisedec, ixin Abraham, thi kjui ndo dachri xrachrjeꞌen kain chujni Israel, bajon ndo ngain Melquisedec naa thi thexin bantsjeꞌe ndo kain rey kuetukaꞌo ndo. 5Jaꞌa ra nuꞌa ra ixin ley bayée Moisés ndachro ixin jeꞌo ni sachrjeninxin ndo Leví nchao kjan na̱ daana. Ko ley mee kai chjee daana juachaxin ixin sanchieꞌe chujni Israel naa thi thexin jeꞌe na̱ chunda na̱, maski jeꞌe na̱ ko xi daana, xrajeꞌo chujnii Abraham. 6Aro Melquisedec maski jeꞌe bachrjeninxinꞌa ni Leví, aro jeꞌe bayée thi thexin bacha Abraham. Ko kai Melquisedec binchenchaon Abraham, thi Ndo Dio ndache ixin runchenchaon. 7Ko kain chujni nuꞌe ixin thi chujni nchenchaon inaa chujni, chujni mee icha renthe ke thi tunchaon. 8Ni levita dayée na̱ thi thexin dajon chujni ko jeꞌe na̱ kai deꞌen na̱ xraa kexeꞌo chujni. Aro Melquisedec, thi bayée thi thexin bajon Abraham, jichon. 9Ko kai nchao rundachro ni ixin Leví ko kain daana bachrjeninxin jeꞌe ko dayée na̱ thi thexin, kai bajon na̱ thi thexin bechunda na̱ ngain Melquisedec, ko jiꞌi kuꞌen are Abraham, thi bachrjeninxin jeꞌe na̱ kjuenga ꞌna thi thexin bechunda ngain Melquisedec. 10Ixin are mee ubeꞌe ni rugachrjeninxin Abraham ko xraa ubagakao na̱ ngain nthauꞌe, maski xra tunkjiꞌa na̱ are Melquisedec bigetanxin Abraham ngatja nthiꞌá.

11Kain chujni Israel bayée na̱ ley ixin ni chujnii Leví, ko kain daana mee bachrjeninxin Aarón, thi kjui saꞌo daana. Aro ley bakjaago daana ngain chujni, ley mee xruꞌin juachaxin bechunda ixin runchejian chujni ngathexin kon Ndo Dio. Ko ja̱ ley mee runchejian chujni irugundaꞌa rukii inaa daana inchin Melquisedec; ko jeꞌa inaa daana inchin Aarón. 12Ixin ja̱ dituxin daana, kai ley rugunda situxin. 13Ko thi inaa daana, mee Nchaa ná, Jesucristo. Ko jeꞌe bachrjeninxinꞌa ni Leví, ko nua ná ixin bachrjeninxin ni Judá ko xruꞌin nchaꞌon ni Judá kjui daana. 14Ko anto jian nuꞌe ni ixin Jesucristo bachrjeninxin ni Judá, ko Moisés xruꞌin nchaꞌon bajin ixin ni teꞌi rukji daana are jeꞌe nichja ixin kain ni daana.

15Ko jaꞌin icha jian tsinxin ná ja̱ daana narua jiꞌi tsununxin inchin Melquisedec. 16Ixin Jesús kjui daana aro jeꞌa inchin kuetuꞌan ley ixin ley ndachro jeꞌo ni bachrjeninxin Leví nchao rukjan na̱ daana. Ko jiꞌi ruchro ixin Jesús kjui daana aro ixin jeꞌe chunda juachaxin, ko xruꞌin nchaꞌon seꞌen. 17Ko Ndo Dio ndachro jaꞌin ixin Jesús:

Jaꞌa naa daana kainxin nchaꞌon,

ko jaꞌa daana xrajeꞌo inchin Melquisedec.

18Mexinxin thi ley bayée chujni are saꞌo irentheꞌa jai, ixin chroꞌa kjuengijna chujni ko xruꞌin renthe ley mee. 19Ko jiꞌi ruchro ixin ley bayée Moisés chroꞌa nchejian chujni. Ko jai utakuinthuꞌe ná ley ko uchunthia ná ngain Jesucristo; mexinxin jaꞌan ná nchao tunchieꞌen ná ngain Ndo Dio.

20Ko Ndo Dio ndachro ndo ixin jiꞌi rukuꞌen, ko mee ixin Jesucristo, thi daana jai. 21Ixin chujni icha kjan na̱ daana aro Ndo Dio xruꞌin ndachro ndo. Ko are Jesucristo biꞌin daana, Ndo Dio nichja ndo, inchin jitaxin ngain Xruen ndo:

Ndo Dio ndachro ndo ixin tsentuxinꞌa ndo thi jeꞌe ndo ndachro ndo:

“Jaꞌa naa daana kainxin nchaꞌon,

ko jaꞌa daana xrajeꞌo inchin Melquisedec.”

22Mexinxin Jesús ndachro ixin jaan ndua thi ukjuauthexin ndo, ko mee icha jian ke thi kjuauthexin ndo saꞌo. 23Are saꞌo tsjé chujni binthe na̱ daana ixin xruꞌin daana beꞌe ke rugechon kainxin nchaꞌon. 24Aro ixin Jesús xruꞌin nchaꞌon seꞌen, mexinxin jeꞌe xruꞌin nchaꞌon tsinthuꞌe xree. 25Mexinxin Jesús nchao thjengijna kain chujni tunchieꞌen ngain Ndo Dio ixin kjan na̱ inaa chujni narua ke xruꞌin nchaꞌon tsjexin, ixin jeꞌe jichon ko sechon kainxin nchaꞌon ko nchetseꞌen ñao Ndo Dio ixin jeꞌe na̱.

26Ko Jesucristo, thi daana icha renthe, rugundaa ná jaꞌan ná. Ixin Jesús jian ngathexin kon Ndo Dio ixin xruꞌin jianꞌa bincheꞌe. Jeꞌe bachrjendeꞌe chujni ncheꞌe jianꞌa, ko sakuajiin ko sabigeꞌe ngain thi icha renthe nthi̱ꞌa̱ ngajni. 27Jesús jeꞌa inchin daana teꞌa ixin bantheguen na̱ kuxiigo ixin banchendusen na̱ ngain Ndo Dio kain nchaꞌon. Saꞌo banthencheꞌe na̱ jiꞌi ixin bagitjañenxin na̱ kain thi jianꞌa bancheꞌe na̱; kuthimejan baguen na̱ icha kuxiigo ixin bagitjañenxin thi jianꞌa bancheꞌe icha chujni. Aro Jesús irugundaꞌa sincheꞌe jamee ixin jeꞌe xrajon beꞌen nakua nthiꞌa ixin bitjañenxin kain thi jianꞌa ncheꞌe kain chujni ko mee tunchrjeꞌen kainxin nchaꞌon. 28Ley bayée Moisés banchegiꞌin daana, daana icha renthe, thi xii bancheꞌe tsjé jianꞌa ngathexin kon Ndo Dio. Are ujuexin beꞌe ley, kuthejan Ndo Dio ndachro ngathe anseen ndo ixin ruchjaa ná ndo xi daana icha renthe, ko mee Xeꞌen ndo, xan xruꞌin jianꞌa bincheꞌe.

Currently Selected:

Hebreos 7: plsNT

Highlight

Copy

Compare