Gálatas 1

Pablo chjee juajna ni Gálatas

1Jaꞌan Pablo na, thi thjiꞌan juajna, ko jaꞌan kuinchieꞌa na chujni ko jeꞌa jeꞌe na̱ kuetunna na̱ tsjaago, ixin Jesucristo thi ruaꞌan na ko Ndo Dio Ndudaa ná thi binchexechon Cristo kuinchieꞌna. 2Jaꞌan Pablo na ko kain ni choo ná jii ngajin ruaꞌan ná juajna ngain kain niꞌngo jii ngain nunthe Galacia. 3Ko Ndo Dio Ndudaa ná ko Nchaa ná Jesucristo sinthanchaon ra ko ruchjaa ra thi chrjuin sinchekunuꞌe ansean ra. 4Ixin Jesucristo xrajon beꞌen ixin kjuenga ꞌna kain thi jianꞌa juinthoꞌo ná ko kjuengijna ná ixin itsetuanꞌa ná thi jianꞌa jii nthiꞌi ngataꞌa nunthe, ixin jañaa juinao Ndo Dio Ndudaa ná. 5¡Ko Ndo Dio jikininxin tsusayeꞌe kainxin nchaꞌon! Jañaa tsuꞌen.

Xruꞌin inaa juajna nchekjan ni inaa chujni narua

6Jaꞌan xratao tabithuna ixin unda anto tuin ndatjañaꞌa ra Ndo Dio, thi kjuagua ná ixin anto thjuaa ná Cristo, ko jai ujee juajna tedithikaon ra. 7Ko nduaxin xruꞌin inaa thi jian juajna jii. Jeꞌo jinthayaꞌa ra na̱ ko mee thi jituꞌen ko kai rinao na̱ ixin sithikaon ra thi jeꞌa juajnee Jesucristo. 8Ko maski chrujan jaꞌan ná, o naa ángel tsixin ngajni ko tsjaguꞌa ra jee juajna ko jeꞌa inchin jaꞌan ná ukjuaguꞌa ra, chujni mee Ndo Dio ncho nchegatho tangi. 9Jaꞌan undachrjan ko rukjan na rundachrjan inaa: kexeꞌo chujni tsjaago jee juajna ko jeꞌa inchin ukjuaguꞌa ra, chujni mee Ndo Dio ncho nchegatho tangi.

10¿Keꞌe rinaꞌo sinthaꞌa kunixin jiꞌi? ¿A rinaꞌo sithuna jian ngain chujni o ngain Ndo Dio? Ja̱ rujinaꞌo rugithuna jian ngain chujni, jaꞌan irukjiꞌa naa jian ninchexree Jesucristo.

Ndo Dio baye̱e Pablo ixin sincheꞌe xra

11Jaꞌan rinaꞌo tsunuꞌa ra, jaꞌa ra xro choo ná ixin dithikaon ra Cristo, ixin thi jian juajna jaꞌan kjuaguꞌa ra jeꞌa naa juajna binchechjian ko xraxaon chujni. 12Ko jeꞌa chujni chjana ko binchekuanna juajna. Jesucristo binchekuanna juajna.

13Ko jaꞌa ra unuꞌa ra kexreen banthaꞌa are baruaa thi tjaago ni judío, kai unuꞌa ra kexreen chrintho bariꞌi ko baruaa chujni bagithikaon Jesucristo, ko jaꞌan binaꞌo ndaruguꞌen kain na̱. 14Ko thi tjaago ni judío, jaꞌan thi icha bagithikaꞌon ko jaꞌan bakjaa cha ni xrajeꞌo nano bechunda inchin jaꞌan ixin jaꞌan thi icha bakuchjiigo na ko bagithikaꞌon thi bakjaago ni ndo dachriꞌna xrachrjen. 15Aro ixinꞌa mee, Ndo Dio ukuinchieꞌe na ndo are xra bariꞌi ngaxiꞌin tseꞌe janana, ko bayáꞌna ndo ixin anto thjuena ndo. Ko mee kuꞌen ixin jañaa juinao ndo. 16Ko jeꞌe ndo binchegatsuanna Xeꞌen ndo ixin jaꞌan bakjagua chujni jeꞌa judío thi jian juajnee xan. Ko are jiꞌi kuꞌen, xruꞌin chujni banchiangia kexreen runthaꞌa. 17Kai kjuiꞌa Jerusalén ixin ruganchiangia ni icha saꞌo kuinchieꞌe Jesucristo ke jaꞌan. Aro jaꞌan jaikua sakjui nuntheꞌe Arabia, kuthimejan sakjan na Damasco.

18Ko batho nii nano, kuthejan kjui rajna Jerusalén ixin bigatsuan Pedro, ko bithuna ngain jeꞌe thenaꞌo nchaꞌon. 19Aro jaꞌan bikonꞌa icha ni kuinchieꞌe Jesucristo, jeꞌo bikon Jacobo, xan choo Nchaa ná. 20Nduaxin thi ndathjo ra ko Ndo Dio nuꞌe ndo jian ixin thi kji̱n na jiꞌi, jaan, ndua.

21Kuthimejan jaꞌan sakjui no nuntheꞌe Siria ko Cilicia. 22Ko are mee, kain niꞌngo bagithikaon Jesucristo nthi̱ꞌa̱ nuntheꞌe Judea xrabechunxinꞌa na na̱ jaꞌan. 23Ko jeꞌo bakiꞌin na̱ ixin chujni bandachro: “Thi xii banthakinga ná are saꞌo, jai jeꞌe tjaago ixin ruchunthia ná thi juajna jeꞌe binao runchexanthe.” 24Ko ixin thi bincheꞌe ndo ngajin na, jeꞌe na̱ binchesayeꞌe na̱ Ndo Dio.

Currently Selected:

Gálatas 1: plsNT

Highlight

Copy

Compare