2 Corintios 13

Thi kuetuꞌan Pablo

1Jiꞌi ninxin nthiꞌa sasutsjaꞌa ra. Ko xraxaon ra inchin ndachro ngain Xruen Ndo Dio: “Are tsjangiꞌi ra naa chujni ixin thi jianꞌa bincheꞌe, rugunda seꞌe yoo o nii chujni bikon thi kuꞌen.” 2Are ngain nthiꞌa yuxin baso ngajin ra, jaꞌan ndathjo ra jiꞌi, maski jai riꞌa ngajin ra, xrajeꞌo tendathjo ra inaa: Are sasutsjaꞌa ra, jaꞌan itsiakunuaꞌa ra xro bincheꞌe ra o tencheꞌe ra thi jianꞌa. 3Ko jaꞌa ra tethjee ra ixin sikon ra a jaan ndua Jesucristo nchegunda na runichja ngajin ra. Ko Jesucristo xruꞌin nchaꞌon tjaago ixin sujiꞌa ngajin ra ixin jeꞌe tjaago thi jié juachaxin chunda ngajin ra. 4Jaan, ndua are jeꞌe benganito ntha cruz xraa chundaꞌa juachaxin, aro jai jeꞌe jichon kunixin juachaxiin Ndo Dio. Jañaa jaꞌan ná kai sujiꞌa ná inchin Cristo are benganito ntha cruz, aro kunixin juachaxiin Ndo Dio, suji te ná ixin jañaa nchao tsjengijna ra.

5Xraxaon ra jian thi tencheꞌe ra ko tsjeꞌe ra a chunthia ra ngain Jesucristo, ko ja̱ tsixiꞌan ra ko sincheꞌa ra thi jianꞌa, jañaa sikon ra ixin Jesucristo jii ngajin ra. Aro ja̱ bincheꞌe ra thi jianꞌa, jiꞌi ruchro ixin Jesucristo koꞌa ngajin ra. 6Ko rinaꞌo tsunuꞌa ra ixin jaꞌan ná xruꞌin thi jianꞌa binthaꞌa ná. 7Ko kai danchiaa ná Ndo Dio ixin xruꞌin thi jianꞌa sincheꞌe ra, jeꞌa ixin chujni runichja na̱ ixin anto jian kjuaguꞌa ra, aro jeꞌo rinaꞌo ná ixin jaꞌa ra sincheꞌe ra thi jian, maski chujni nichja ixin jaꞌan ná ndakuaꞌa binthaꞌa ná. 8Ixin jaꞌan ná chroꞌa runichjangii ná thi ndua, jaꞌan ná jeꞌo dithua ná runichja ná jian ixin thi ndua. 9Mexinxin jaꞌan ná chaꞌna ná are sujiꞌa ná, ko jaꞌa ra icha tsusuji ra. Ko danchiaa ná Ndo Dio ixin jaꞌa ra tsinthuꞌe ra kain thi jianꞌa bincheꞌe ra. 10Ko riruꞌan ra xroon jiꞌi, ixin are jaꞌan saso, sujiꞌa sinthasathaꞌa ra kunixin juachaxin chunda jaꞌan. Thi juachaxin jaꞌan richunda, Nchaa ná chjana ixin tsjengijnanxin ra ko jeꞌa ixin sinthagatho ra tangi.

11Kain ra xro choo ná kain jiꞌi thi ndathjo ra ko rinaꞌo ixin chrjuin tsunuꞌa ra ko thjee ra ixin jian sincheꞌe ra kain, nchesuji choo ra, xra jeꞌo juaxraxaon dinthechunda ra ko jian dakjioꞌo choo ra. Ko Ndo Dio, ndo anto thjuaa ná ko chrjuin nchekunuꞌe ansean ná, seꞌe ngajin ra. 12Jian chjeꞌe choo ra juajna inchin kukuan ná. 13Ko kain xan choo ná dithikaon Jesucristo ruaꞌan ra xan juajna.

14Ko dayéꞌe ra thi jian dajon Nchaa ná Jesucristo. Ko thi thjuaa Ndo Dio ko thi ncheꞌe Espíritu Santo ixin jian sakjiꞌo choo ra seꞌe ngajin ra. Jañaa tsuꞌen.

Currently Selected:

2 Corintios 13: plsNT

Highlight

Copy

Compare