Colosenses 4

1Ko jaꞌa ra xro najni ra chjeꞌe ra ni ncheꞌe xraa ra inchin jikininxin sacha na̱. Xraxaon ra ixin jaꞌa ra kai chunda ra naa xi najni thjen nthi̱ꞌa̱ ngajni.

2Kain nchaꞌon nichjeꞌe ra Ndo Dio ko xraxaon ra keꞌe tedanchieꞌe ra ndo ko thexruxiꞌin ra ndo. 3Ko kai nchetseꞌen ra ñao ndo ixin jaꞌan ná, ixin ruchjana ná ndo juachaxin runichja ná juajnee ndo ngain icha chujni, ko rundathjan ná na̱ thi kuꞌen Jesucristo ixin kjuenga ꞌna kain thi jianꞌa binthoꞌo ná, ko mee inchin naa thi jima ixin jeꞌe na̱. Ko jai jaꞌan jiaxinna ixin tjaago juajna jiꞌi. 4Nchetseꞌen ra ñao Ndo Dio ixin jaꞌan jian tsjaago juajna jiꞌi ngain chujni inchin jikininxin.

5Ndakua dakjiꞌo ra kain chujni xra dithikaonꞌa Jesucristo ko are nchao, nichjeꞌe ra na̱ ixin Jesucristo. 6Are runichjeꞌe ra na̱ chrjuin nchekuꞌen ra na̱, ixin thi jian nichja ra, ko jian xraxaon ra kexreen satheꞌe ra na̱ ixin thi sanchiangiaꞌa ra na̱.

Nthiꞌi tsjexinxin thi kji̱n Pablo

7Xan choo ná Tíquico, xan anto thjuaa, rundathjo ra xan kain thi jitunna jaꞌan. Jeꞌe xan kain nchaꞌon anto thjengijna xan ni dithikaon Jesucristo, ko kayui ná nthaꞌa ná xree Jesucristo. 8Ko jaꞌan riruaꞌan Tíquico ngajin ra ixin rundathjo ra kexreen te ná nthiꞌi ko jañaa icha sinthasuji ra. 9Ko Tíquico kai sijikao Onésimo, naa xan choo ná, xan anto thjueꞌe ná ko kai anto dithikaon xan Jesucristo. Ko jeꞌe naa chujni rajnaa ra ko kayui xan rundathjo ra xan kain thi jituꞌen nthiꞌi.

10Aristarco, xi kai jiaxiꞌin nthiꞌi ngain nduꞌa xiiso, ruaꞌan ra xa juajna, ko Marcos, xeꞌen chrinii Bernabé, ruaꞌan ra xan juajna kai. Ko jaꞌa ra ubituꞌan ra ixin are siji Marcos sitsjaꞌa ra, dayeꞌe ra jian. 11Ko Jesús, thi kai nchegiꞌin na̱ Justo, ruaꞌan ra juajna kai. Ko jeꞌo ni judío teꞌi thjengijna ná tenthaꞌa ná xree Ndo Dio, ko jeꞌe na̱ anto nchesuji na na̱. 12Epafras, thi kai naa chujni rajnaa ra, ruaꞌan ra juajna, ko kai ncheꞌe xree Jesucristo, ko kain nchaꞌon nichjee Ndo Dio ko anto nchetseꞌen ñao ndo ixin jaꞌa ra ixin sachrjedeꞌa ra nthiee ndo ko kain jian sincheꞌe ra inchin rinao ndo. 13Ixin jaꞌan nuna ixin Epafras anto ta juachjaon ixin jaꞌa ra, ko kai ixin chujni dithikaon Jesucristo te ngain rajna Laodicea ko rajna Hierápolis. 14Lucas, xi nchexruan anto thjueꞌe ná, ruaꞌan ra juajna ko kai Demas.

15Ko chjeꞌe ra juajna kain ni choo ná te ngain rajna Laodicea, kai chjeꞌe ra juajna Ninfas kunixin kain ni niꞌngo xrathe nthi̱ꞌa̱ ngain nchianduꞌa. 16Are tsjexin tsiꞌin ra keꞌe jichro xroon jiꞌi, kai ruaꞌan ra xron ngain ni niꞌngo Laodicea ixin tsiꞌin na̱ keꞌe jitaxin ngain xron, ko kai jaꞌa ra tsjeꞌe ra keꞌe jitaxin xroon kjuiꞌi ni niꞌngo yaa. 17Ndache ra Arquipo ixin sincheꞌe xra kuetuꞌen Nchaa ná Jesús, ko jian sincheꞌe xra.

18Jaꞌan Pablo na rikji̱ꞌan ra juajna jiꞌi kunixin rana. Ko xraxaon ra ixin jiaxinna. Ko Ndo Dio sinthanchaon ra. Jañaa tsuꞌen.

Currently Selected:

Colosenses 4: plsNT

Highlight

Copy

Compare