Colosenses 1

Pablo ruaꞌan juajna ngain ni Colosenses

1Jaꞌan Pablo na ko Ndo Dio kuinchieꞌna ixin thjiꞌan juajnee ndo, ko kai xan choo ná Timoteo, 2ko ruꞌan ra xroon jiꞌi, jaꞌa ra xro kuinthuꞌe ra thi jianꞌa ko jian dithikaon ra Jesucristo ngain rajna Colosas, xro tekininxin ra ngain Ndo Dio Ndudaa ná, ko Nchaa ná Jesucristo sinthanchaon ra ko ruchjaa ra thi chrjuin tsunuꞌe ansean ra.

Pablo nchetseꞌen ñao Ndo Dio ixin chujni dithikaon Jesucristo

3Kain nchaꞌon are jaꞌan ná nichjaa ná Ndo Dio, Ndudee Nchaa ná Jesucristo, kai thexruxian ná ndo ixin jaꞌa ra 4ixin jaꞌan ná ndachjejin ná na̱ ixin jaꞌa ra jian chunthia ra Jesucristo, ko ixin anto thjueꞌe ra kain chujnii Ndo Dio. 5Ko jaꞌin tencheꞌe ra ixin jaꞌa ra techuꞌen ra thi jithenchjiꞌan Ndo Dio nthi̱ꞌa̱ ngajni ixin jaꞌa ra. Ko kuexiꞌin ra chuꞌen ra thi jichjian are kuiꞌin ra thi juajna ndua ko mee juajnee Jesucristo. 6Ko juajna jiꞌi, thi juii ngajin ra, ko kai ngain kain chujni te nguixin nunthe, ko kain rajna tsjé chujni tedithikaon na̱ juajna jiꞌi, jañaa inchin jaꞌa ra bithikaon ra ko kuiꞌin ra ixin ndua Ndo Dio anto thjuaꞌa ra ndo. 7Ko jiꞌi thi kjuaguꞌa ra Epafras, thi xan choo ná, xan thjengijna ná ngain xra. Ko jeꞌe naa jian ni ncheꞌe xree Jesucristo ixin thjengijna ra. 8Ko jeꞌe ndachjejin ná ixin espíritu thjengijna ra ixin anto thjueꞌe choo ra.

9Mexinxin jaꞌan ná, are kuian ná ixin jaꞌa ra, kain nchaꞌon nichjaa ná Ndo Dio ixin jaꞌa ra. Ko danchiaa ná ndo ixin sinthagatsuan ra ndo jian thi jeꞌe ndo rinao ndo, ko tsinxin ra kunixin jian juaxraxaon ixin juachaxiin Espíritu Santo. 10Ko jañaa jian sinthe ra inchin rinao Nchaa ná ko jeꞌe ruchee ixin kain thi tencheꞌe ra. Ko jaꞌin jaꞌa ra kain nchaꞌon sincheꞌe ra thi jian, ko xra ruchunxin ra icha ixin Ndo Dio, 11ko jeꞌe ndo sinthasuji ra ndo kunixin thi jié juachaxin chunda ndo. Ko jañaa nchao tsixiꞌan ra ngain kain thi tangi jii. 12Ko chaꞌa ra are thexruxiꞌin ra Ndo Dio, Ndudaa ná, ixin jeꞌe ndo chjaa ná ndo juachaxin sunthe ná ngain chujni jeꞌe ndo kuinchieꞌe ndo. Ko kain ná sayée ná thi jeꞌe ndo ndachro ndo ko sunthe ná ngain thi anto chrjuin dingasaan thetuꞌan ndo. 13Ko jeꞌe ndo binthjianxin ná ndo ngain thi naxin xeꞌe, ko binthagatho ná ndo ngain thi thetuꞌan Xeꞌen ndo, Xan anto thjueꞌe ndo. 14Ko Xeꞌen ndo beꞌen xan nganito ntha cruz ixin kjuenga xan ꞌna kain thi jianꞌa binthoꞌo ná, ko binthatjañaa ná xan kain thi jianꞌa.

Thi bincheꞌe Jesucristo ixin jaꞌan ná

15Ko Ndo Dio thi chroꞌa dikon ni, xraago ngain Jesucristo, thi nakuaxinxon Xeꞌen ndo, thi ubeꞌe are kunchjian kain thi jii ngain nunthe. 16Ko ixin Jesucristo, Ndo Dio binchechjian kain thi jii ngajni ko nthiꞌi ngataꞌa nunthe, thi nchao dikon ni ko thi chroꞌa dikon ni, kai juinchechjian ángel thetuꞌan ko techunda yeye juachaxin nthi̱ꞌa̱ ngajni ko nthiꞌi ngataꞌa nunthe, ko kain jeꞌe binchechjian ko kunchjian ixin tsusayexin. 17Ko Cristo ubeꞌe are kain kuexiꞌin kunchjian ko ixin jeꞌe dajon juachaxin, mee xrajixin kain thi jeꞌe binchechjian. 18Ko Cristo thi thetuꞌan ngain ni niꞌngo. Ko jeꞌe thi kuexinxin ko jeꞌe thi saꞌo xechon ngain ni ndabeꞌen, ko jañaa ngain kain thi jii, jeꞌe thi icha renthe. 19Ko Ndo Dio binao ndo ixin kain juachaxin chunda ndo seꞌe ngain Cristo. 20Ko ixin Cristo, Ndo Dio binchekjan kain thi jii ngataꞌa nunthe ko thi jii ngajni, ngain ndo. Ko kain kjan ngain ndo ixin Cristo beꞌen nganito ntha cruz.

21Are saꞌo jaꞌa ra bechunxinꞌa ra Ndo Dio ixin thi jianꞌa baxraxaon ra ko bancheꞌe ra, ko jaꞌa ra baningakuꞌen ra ndo aro jai ubinthakjan ra ndo chujni jian ngathexin kon ndo, 22ixin Cristo beꞌen nganito ntha cruz, inchin naa xii. Ko jañaa binthakjan ná jian chujni, xraa naa chujni xruꞌin jianꞌa bincheꞌe ngathexin kon jeꞌe. 23Aro rugunda ixin dachrjendeꞌa ra thi uchunthia ra, ko thinthueꞌa ra thi techuꞌen ra thi ukuiꞌin ra ngain juajnee Ndo Dio. Ko juajna jiꞌi thi jixrague chujni jii ngataꞌa nunthe, ko juajna jiꞌi, jaꞌan Pablo na bitunna tsjaago.

Pablo ncheꞌe xra ixin ni niꞌngo

24Ko jai jaꞌan chaꞌna ixin tangi tunna ixin jaꞌa ra, ko jañaa ruxethja ngain nthauꞌna thi tangi kuꞌen Cristo ixin kjuengijna ná xro duthikaon ná ngain jeꞌe. 25Ko jaꞌan tjagua kain ni niꞌngo ixin Ndo Dio chjana xra jiꞌi ixin thjengijna ra, ko jañaa tsjena tsjaago thi jian juajnee ndo. 26Ko Ndo Dio binchegatsuan chujnii ndo thi juajna bechunxinꞌa na̱. 27Ndo Dio binchenuꞌe chujni jeꞌa judío thi jian juajna bechunxinꞌa na̱. Ko jañaa xraago juajna anto renthe ngain kain ni jeꞌa judío ixin Cristo jii ngajin ra, ko jeꞌe chjaa ra juachaxin ixin sikon ra thi jie̱ juachaxin chunda jeꞌe.

28Jaꞌan ná ndathjan ná kain chujni thi jian juajnee Cristo, ko tjagua ná na̱ ko nthakuaan ná na̱ kunixin jian juaxraxaon, ko jañaa jian sinthe na̱ ngathexin kon jeꞌe. 29Ko jaꞌan rinthaꞌa xra jiꞌi ko tunchrjenꞌa na ixin tusuji na kunixin kain juachaxin chjana Cristo.

Currently Selected:

Colosenses 1: plsNT

Highlight

Copy

Compare