Hechos 8
8
Saulo baningakuꞌen chujni bagithikaon Jesús
1Ko Saulo bikon kexreen guen na̱ Esteban ko ndachro ixin nchao kuꞌen.
Ko nchaꞌon mee kuexiꞌin na̱ bingakuꞌen na̱ ko baruee na̱ chujni bagithikaon Jesús ixin ruguen na̱ na̱ kain ni binthe nthi̱ꞌa̱ Jerusalén. Ko ni teꞌi sakuinga na̱ ko chjekee na̱ ngain nuntheꞌe Judea ko nuntheꞌe Samaria. Jeꞌo ni theyoo kuinchieꞌe Jesús bithuꞌe na̱ Jerusalén. 2Ko tsukjin mee kanxion ni bagithikaon Jesús kjui na̱ bigatsiin na̱ Esteban ko kjuabaa na̱ ko tsjé nchaꞌon tsjangaxin na̱. 3Ko nchaꞌon mee Saulo bagixiꞌin nchianduꞌa ni bagithikaon Jesús, ko bagantsje xii ko nchrii ko bakingajin na̱ ixin bakiaxiꞌin na̱.
Felipe beꞌe Samaria
4Aro chujni sakuingaxin Jerusalén nguii thi bakji na̱, thinga banichja na̱ thi jian juajnee Jesucristo. 5Ko Felipe kjui Samaria ko nthi̱ꞌa̱ nichja ixin Jesús, thi biꞌin Mesías. Ko Felipe jiꞌi kjui naa ni yaato kuinchieꞌe ni bagithikaon. 6Ko kain chujni baxrathe na̱ ko bakiꞌin na̱ thi jian bandachro Felipe, ko bagikon na̱ kexreen banchexingameꞌe ni niꞌi kunixin juachaxiin Ndo Dio, 7ixin tsjé chujni bechunda espíritu jianꞌa bagachrjeꞌe na̱ espíritu mee, ko espíritu jianꞌa bakuyao are bagachrjexin ngain na̱. Ko chujni chroꞌa bakingi ko chujni chroꞌa bakji kai bakuxrueꞌen na̱. 8Mexinxin ngain rajna mee chujni anto bachee na̱.
9Kaxon nthi̱ꞌa̱ beꞌe naa xii biꞌin Simón, banchekiseꞌen xa ko bancheyeꞌe xa chujni ixin kain juathuso bancheꞌe xa ngain rajna mee, ko jeꞌe xa bandachro xa ixin jeꞌe xa renthe xa. 10Ko ni yeye ko xan nchinnchinchjan bakiꞌin na̱ jian thi bandachro xii jiꞌi, ko bandachro na̱:
—Xii jiꞌi chunda xa juachaxiin Ndo Dio.
11Ko kain na̱ anto bakiꞌin na̱ ko bagikon na̱ juathuso bancheꞌe xii jiꞌi, ko anto tsjé nano bancheyeꞌe xa chujni. 12Ko are kuiꞌin na̱ thi ndachro Felipe ixin thi jian juajnee Ndo Dio ko thi bincheꞌe Jesús, mexinxin ni xii ko ni nchrii bithikaon na̱ ko bigithe na̱. 13Ko kai Simón bithikaon ko bigithe ixin bikon kexreen banchexingameꞌe ni niꞌi ko icha thi jian bancheꞌe Felipe. Ko Simón ibachrjendeꞌa Felipe.
14Ko ni theyoo kuinchieꞌe Jesús xra binthe na̱ Jerusalén. Ko are kunuꞌe na̱ ixin chujni Samaria bithikaon na̱ juajnee Ndo Dio ruaꞌan na̱ Pedro ko Juan nthi̱ꞌa̱. 15Ko are biji na̱ nthi̱ꞌa̱, nichjee na̱ Ndo Dio ixin kain ni nandaa bithikaon nthi̱ꞌa̱ rajna Samaria rugayee na̱ Espíritu Santo, 16ixin xra bayeꞌa na̱ Espíritu Santo, ixin jeꞌo bigithe na̱ kunixin juachaxiin Jesús. 17Kuthejan Pedro ko Juan kuentaꞌa raa na̱ ngataꞌa jaa ni bigithe ko kain na̱ bayée na̱ Espíritu Santo.
18Ko Simón bagikon ixin chujni bagayée na̱ Espíritu Santo are ni apóstol bakentaꞌa raa na̱ ngataꞌa jaa ni bigithe, ko Simón banchenthuxiꞌin na̱ tumi 19ko ndachro:
—Chjana ra juachaxin chunda ra yaa ixin kaxon are jaꞌan tsentaꞌa rana ngataꞌa jaa kexeꞌo chujni, sayée na̱ Espíritu Santo.
20Aro Pedro batheꞌe:
—¡Ditjaan jaꞌa ko tumia ixin jaꞌa xraxaon ixin thi dajon Ndo Dio nchao sinanxin kunixin tumi! 21Jaꞌa jikininxinꞌa sarichunda juachaxin sincheꞌe xra jiꞌi ixin Ndo Dio chunxin ndo ixin jeꞌa jian juaxraxauan. 22Thendueꞌe ñao ixin thi jianꞌa jiꞌi, ko nchetseꞌen ñao Ndo Dio, a sinthatjañaꞌa ndo thi jaꞌa xraxaon ngain ansean. 23Jaꞌan dikon jaꞌa anto tunchjuaꞌa ko thi jianꞌa tanchrjandaꞌa ansean ixin tsinxin thi jian.
24Ko Simón ndachro:
—Nchetseꞌen ra ñao Ndo Dio ixin tsunnaꞌa thi jaꞌa ra ndachjejin ni ra.
25Are Pedro ko Juan juexin nichja na̱ ixin kain thi bakuꞌen are bagakao na̱ Jesús, sakjan na̱ Jerusalén, ko kain rajnee Samaria bathugaꞌa na̱ nichja na̱ juajnee Ndo Dio.
Felipe ko naa xi Etiopía
26Kuthimejan naa angeel Ndo Dio ndache Felipe:
—Dingathjen ko sadingajin ngain nthiꞌá xinkajinxin Jerusalén ko sathji Gaza.
Ko nthiꞌá jiꞌi datho thi anto xema. 27Ko Felipe bingathjen ko sakjui. Ko ngatja nthiꞌá betanxin naa xi eunuco, xi juixin Etiopía, ko xi jiꞌi xi bakenchjiꞌan tumii nchri Candace, nchri baketuꞌan Etiopía. Ko sakjui xa Jerusalén ixin banchesayeꞌe xa Ndo Dio. 28Ko xii jiꞌi sajikjan xa rajnee xa ngaa ntha thingajin kunxin, ko jitjao xa xroon dikji̱n Isaías, xi banichja juajnee Ndo Dio. 29Kuthimejan Espíritu Santo ndachro ngain Felipe:
—Tunchieꞌen ngain ntha jithingajin kunxin jiꞌa ko tato xi jitji ngaa ntha.
30Ko are Felipe kunchieꞌen, kuiꞌin ixin thi xii mee jitjao xa xroon dikji̱n Isaías, kuthejan banchiangiꞌi xa:
—¿Athinxin thi jitaxin xroon ritjao yaa?
31Ko jeꞌe xa batheꞌe xa:
—Aro xruꞌin kensen tjaguꞌna, ¿ko kexreen tsianxin?
Kuthejan xii jiꞌi binchetseꞌen xa ñao Felipe ixin rukanito ko tarugeꞌe chrika xa.
32Ko thi jitjao xa ngain Xruen Ndo Dio jaꞌin chro xron:
Bikao na̱ bigeꞌen inchin are deꞌen naa kuleko.
Ko kai inchin are kjin ba tuyaoꞌa ba ngain thi kjiꞌin ba,
jañaa jeꞌe kai kuyaoꞌa.
33Ko chujni kjuanua na̱ jeꞌe ko xruꞌin kensen bincheꞌe jie̱ ixin jeꞌe.
Ko xruꞌin chjan bechunda.
Ixin chujni naguenxon na̱ nthiꞌi ngataꞌa nunthe.
34Ko xi Etiopía banchiangiꞌi xa Felipe ko ndachro xa:
—Nthatsaꞌan ñao ndachjejin na, ¿ixin kensen jinichja xroon jiꞌi? ¿A ixin jeꞌe Isaías o inaa chujni?
35Ko Felipe kuexinxin nichja ixin thi jitaxin xroon jiꞌi, thi xroon kjuao xi Etiopía ko kuekiin xa thi bincheꞌe Jesús. 36Ko ngatja nthiꞌá tethji na̱ are bikon na̱ jinda ko xi Etiopía, ndachro xa:
—Nthiꞌi jii jinda. ¿Achroꞌa sigithe na nthiꞌi?
37Ko Felipe ndachro ngain xa:
—Ja̱ tuenao ixin bithikaon kunixin ansaan, nchao sigithe.
Ko jeꞌe xa batheꞌe xa:
—Jaan, dithikaꞌon ixin Jesús Xeꞌen Ndo Dio.
38Kuthejan kuetuꞌan xa rugengathjen ntha thingajin kunxin, ko baniankaꞌo xa Felipe chringi jinda ko Felipe binchegithe xa. 39Ko are bachrjengixin na̱ jinda, Espíritu Santo sabikao Felipe. Ko maski xi Etiopía ibikonꞌa xa Felipe, anto chee xa ko ruee xa nthiee xa. 40Ko Felipe xraago ngain rajna diꞌin Azoto, ko sakjui ngain rajna Cesarea, ko kain rajna bathugaꞌa kjuaago ixin Jesús.
© 2017, Wycliffe Bible Translators, Inc. All rights reserved.