Hechos 26
26
Pablo nichja ngain rey Agripa
1Kuthejan Agripa ndache Pablo:
—Jaxon nchao nichja ixin thi jaꞌa bincheꞌe.
Ko Pablo batsiin raa ixin kain na̱ rukiꞌin na̱ kain thi runichja ko ndachro:
2—Anto chaꞌna ixin nchao runichja ngathexin kon, suixin rey Agripa, ixin kain thi jianꞌa nichja ni judío ixin jaꞌan. 3Ko icha ixin suixin dichunxin kain thi nthaꞌa ná xro judío ná ko kai thi thetuxin ná. Mexinxin nthatsaꞌan ñao, duñaoꞌa ko dekinna thi runichja.
Kexreen bancheꞌe Pablo are xrabechunxinꞌa Jesús
4’Kainxin ni judío bechunxin na na̱ kexreen barichon ngain rajnana ko ngain rajna Jerusalén are xra xa xii na. 5Ko jeꞌe na̱ chunxin na na̱ ko nchao rundathjo na̱ ixin jaꞌan naa fariseo na. Ko kain ni fariseo chrintho na̱ ko anto dithikaon na̱ ley. 6Ko jai ni judío tenchena na̱ jie̱ ixin dithikaꞌon thi ndachro Ndo Dio ngain ni xrachrjenna ná ixin ni ndadigeꞌen ruxechon na̱. 7Ko chujnia ná, ni theyoo xeꞌen Israel, chuan ná sikuꞌen thi nichja Ndo Dio ngain ni xrachrjeꞌan ná. Mexinxin nthasayaa ná Ndo Dio nchaꞌon ko thie. Ko jiꞌi thi tjanginanxin ni judío. 8¿Ana jaꞌa ra dithikaonꞌa ra ixin Ndo Dio sinchexechon ni ndadigeꞌen?
Pablo nichja kexreen baningakuꞌen ni bagithikaon Jesús
9’Are saꞌo jaꞌan baxraxaꞌon ixin rugunda runthaꞌa thi jianꞌa ngain ni bagithikaon Jesús thi Nazaret. 10Ko jañaa banthaꞌa ngain rajna Jerusalén. Ko xi daana thetuꞌan ngain icha xi daana chjana xa juachaxin kuiaxian tsjé ni bagithikaon Jesús. Ko are baguen na̱ ni bagithikaon, jaꞌan bandachrjan ixin nchao jii. 11Ko tsjé nthiꞌá bagintja na̱ ixin rundachro na̱ ke dithikaonꞌa na̱ ngain Jesús, ko jiꞌi banthaꞌa ngain kain ningue rajna. Ko jaꞌan anto baningakuan na̱ ko baruaa na̱ ngain nunthe jeꞌa nuntheꞌna ná.
Pablo nichja ixin kexreen bithikaon Jesús
(Hechos 9:1-19; 22:6-16)
12’Ko jiꞌi bitunna runthaꞌa are kjui rajna Damasco kunixin juachaxiin xi daana thetuꞌan ngain icha xi daana. 13Aro ngatja nthiꞌá are sarithji rajna Damasco, inchin ngusine nchaꞌon, naa xruꞌi juixin ngajni juinchengasanthe na ná, jaꞌan kunixin ni rithjiꞌan, ko thee xruꞌi icha suji ke thee nchaꞌon. 14Ko kain ná binthji ná ngataꞌa nunthe. Ko jaꞌan kuian naa thee chujni nichjananxin ngiguaꞌna hebreo ko ndachro: “Saulo, Saulo, ¿unda ningakunna ko ruena? Jaꞌo rituniꞌa ixin xraa kuxinthaa are xrantue ba kon rejon dekaxin na̱ ba.” 15Kuthejan ndachrjan: “¿Kensen, Suixin?” Ko Nchana Jesús, ndachro: “Jaꞌan Jesús na, thi jaꞌa ningakuꞌen ko rueꞌe. 16Jai dingathjen ko thiꞌin thi rundathjo: Jai kununxinna ngajin ixin sinthakjan naa xi nchexrana ko runichja thi nuꞌa ixin jaꞌan, ko kai tsjaago thi xra tsjaguꞌa. 17Ko jaꞌan rithetuꞌan tsji ngain ni judío ko ni jeꞌa judío ko jaꞌan sakuꞌan ko tsajandaꞌa na̱ are jeꞌe na̱ sinao na̱ sinthaniꞌa na̱. 18Ko jaꞌan thetuꞌan tsji ngain na̱ ixin sinchekueꞌen na̱ thi ndua ko tsinthuꞌe na̱ kain thi jianꞌa ncheꞌe na̱ ko jañaa sithikaon na̱ Ndo Dio ko sithikaonꞌa na̱ nchiijin. Ko sithikaon na na̱ jaꞌan ko sinthatjañaa na̱ kain thi jianꞌa ncheꞌe na̱. Ko sinthe na̱ ngayee chujni ubithikaon na̱ jaꞌan nthi̱ꞌa̱ ngajni.”
Pablo bithikaon thi ndachro Jesús
19’Mexinxin, suixin rey Agripa, jaꞌan bithikaꞌon kain thi ndachro Jesús are kununxinna. 20Ko saꞌo nichjaa ni te rajna Damasco, kuthimejan nichjaa ni te rajna Jerusalén, kuthimejan nichjaa ni te nguii nuntheꞌe Judea ko kai ni jeꞌa judío. Ko ndathjan na̱ tsintuꞌe na̱ kain thi jianꞌa ncheꞌe na̱ ko rukjan na̱ ngain Ndo Dio. Ko sincheꞌe na̱ kain thi jian ko jañaa sikunxin ni ixin jaan dithikaon na̱ Ndo. 21Ko ixin thi kuekiꞌan jiꞌi, ni judío tse na na̱ ngain niꞌngo ko juinao na̱ ruguen na na̱. 22Aro jaꞌan Ndo Dio kjuengijna na ko xraruaa ndo, mexinxin tjagua ni chunda tumi ko ni nua. Ko jaꞌan xruꞌin thi jee ritjaago, jeꞌo thi nichja Moisés ko thi banichja ni bayée juajnee Ndo Dio ixin thi rukuꞌen. 23Ixin thi Cristo anto tangi rukuꞌen ko rugeꞌen, aro jeꞌe thi saꞌo ruxechon ko jeꞌe runchengaseꞌen ni judío ko ni jeꞌa judío ko rukjaago kexreen rutjañeꞌe na̱ kain thi jianꞌa ncheꞌe na̱ ko rukjan na̱ inaa chujni narua.
Agripa batheꞌe Pablo
24Are Pablo nichja kain yaa, Festo kuyao suji:
—¡Pablo, jaꞌa ndadixinga!, ixin anto tangi xroon.
25Aro Pablo batheꞌe:
—Naꞌi, jaꞌan dixingaꞌa na ixin kainxin thi jaꞌan ndachrjan, jaan, thinxin ni, ko jaan, ndua. 26Ko nthiꞌi jii rey Agripa ko jeꞌe chunxin jian kain jiꞌi. Mexinxin xraonꞌa na nichja ngathexin kon jeꞌe ko jaꞌan nuna ixin jeꞌe jian chunxin kain jiꞌi ixin kain thi kjuan ná jiꞌi, jeꞌa jima kuꞌen.
27Kuthimejan Pablo ndache rey Agripa:
—Suixin, ¿adithikaon thi dikji̱n ni bayée juajnee Ndo Dio? Jaꞌan nuna ixin, jaan, digithikaon.
28Kuthimejan Agripa ndachro:
—¡Abeo nchiunchjaon ko runchegithikaon na ngain Cristo!
29Kuthimejan Pablo ndachro:
—¡Maski see o seꞌa, rundachro Ndo Dio jeoꞌa suixin rugithikaon, kaxon kain ni tethinna jai rukjan na̱ inchin jaꞌan, aro ruchriaxinꞌa raa na̱ kunixin chia inchin jaꞌan!
30Kuthejan rey Agripa, Festo, Berenice ko kain ni te nthi̱ꞌa̱ bingathjen na̱, 31ko bachrjexin na̱ nthi̱ꞌa̱ ko jeꞌo na̱ kjuao choo na̱ ko ndachro na̱:
—Xii jiꞌi xruꞌin thi jianꞌa bincheꞌe xa ixin rukininxin rugeꞌen xa ko kaxon jikininxinꞌa rugiaxiꞌin xa.
32Ko Agripa ndache Festo:
—Xii jiꞌi nchao rukajanda ni xa, ja̱ rundachroꞌa xa ixin César runcheꞌe xa jie̱.
© 2017, Wycliffe Bible Translators, Inc. All rights reserved.