2 Tesalonicenses 1
1
Pablo ko ni bagakao ruaꞌan na̱ juajna ngain niꞌngo Tesalónica
1Jaꞌan, Pablo na, kunixin Silvano ko Timoteo, ruaꞌan ra xroon jiꞌi jaꞌa ra xro Tesalónica, xro dithikaon ra ngain Ndo Dio Ndudaa ná ko ngain Nchaa ná Jesucristo. 2Ko Ndo Dio Ndudaa ná ko Nchaa ná Jesucristo sinthanchaon ra ko ruchjaa ra thi chrjuin tsunuꞌe ansean ra.
Ndo Dio sincheꞌe jie̱ ngain chujni ncheꞌe jianꞌa are Jesucristo tsii inaa
3Jaꞌan ná kainxin nchaꞌon rugunda tsexruxian ná Ndo Dio ixin jaꞌa ra xro dithikaon ra Jesucristo inchin jikininxin sinthaꞌa ná ixin jaꞌa ra nchaꞌon ko nchaꞌon icha chunthia ra Nchaa ná ko icha thjueꞌe choo ra. 4Ko jaꞌan ná taꞌin ñaꞌo ná are nichja ná ixin jaꞌa ra ngain icha niꞌngo dithikaon Ndo Dio ixin thixiꞌan ra kain ko thinthueꞌa ra thi bithikaon ra, maski tangi tedathuꞌe ra ko chujni jianꞌa nthakinga ra. 5Ko thi tuꞌen jiꞌi tjaago ixin Ndo Dio jian ncheꞌe jie̱ ko jeꞌe ndo binthakininxin ra ndo sixiꞌin ra ngain thi thetuꞌan ndo, mexinxin tangi tedathuꞌe ra.
6Ndo Dio jian ndo ko sincheꞌe jie̱ ko sinchegatho tangi thi chujni nthagatho ra tangi. 7Ko jaꞌa ra, xro anto tangi tuꞌan ra, Ndo Dio santsjaꞌa ra kain thi ndakunchrjen ra ko kai jaꞌan ná, are Nchaa ná Jesucristo tsixin ngajni kunixin kain ángel ngagee xruꞌi 8ixin sincheꞌe jie̱ ngain ni banchejee Ndo Dio ko ngain ni bithikaonꞌa juajnee Nchaa ná Jesucristo. 9Ko ni teꞌi ndasitjaan na̱ ngathe xruꞌi ko ndatsunkjínxin na̱ ngathexin kon Ndo Dio ko ngain thi jié juachaxin chunda ndo. 10Ko jiꞌi sikuꞌen ngain nchaꞌon are Nchaa ná Jesucristo tsii ixin kain chujni bithikaon ngain jeꞌe sinchesayeꞌe na̱ ko tsiseꞌen na̱. Ko ngayee ni teꞌi sinthe ra kai ixin ubithikaon ra juajnee Ndo Dio are jaꞌan ná ndathjo ra.
11Mexinxin jaꞌan ná nthatsaan ná ñao Ndo Dio kainxin nchaꞌon ixin jaꞌa ra, ko sinthakininxin ra ndo sincheꞌe ra xree ndo ko kain thi jian kunixin juachaxiin ndo, ko Ndo Dio tsjengijna ra ngain kain xra sincheꞌe ra ixin chunthia ra ndo. 12Ko jañaa Nchaa ná Jesucristo tsusayeꞌe ixin dithikaon ra ngain jeꞌe, ko kai jaꞌa ra tsusayaꞌa ra ixin jeꞌe ixin Ndo Dio ko Nchaa ná Jesucristo anto thjuaa ná.
Currently Selected:
2 Tesalonicenses 1: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.