2 Corintios 8

Tumi xra tsetauꞌen ixin tsjiꞌi chujni rugundeꞌe

1Jaꞌa ra xro choo ná, jai rinaꞌo rundathjo ra kexreen Ndo Dio binchenchaon kain chujni dithikaon Jesucristo ngain kain niꞌngo te ngain nunthe Macedonia. 2Maski tsjé thi tangi kuꞌen na̱, aro jeꞌe na̱ anto chee na̱. Ko maski anto nua na̱, aro jeꞌe na̱ bajon na̱ tsjé tumi inchin chujni anto chunda. 3Jaꞌan rundachrjan ixin, jaan, ndua bikon bajon na̱ tumi, aro xra bajon na̱ icha tumi, thi xra nchao bajon na̱. 4Jeꞌe na̱ anto banchetsena ná na̱ ñaꞌo ná ixin ruchjaꞌa na ná juachaxin ixin jeꞌe na̱ xra rukjengijna na̱ chujni nua dithikaon Jesucristo. 5Ko jeꞌe na̱ xra bincheꞌe na̱ icha ke thi jaꞌan ná bixraxaꞌon ná: Saꞌo xrajon na̱ ngaa raa Nchaa ná, kuthimejan bithikaon na̱ thi ndathjan ná na̱. Ko bincheꞌe na̱ thi rinao Ndo Dio. 6Mexinxin binthatsaan ná ñao Tito ixin sinchekjexin thi xra jeꞌe kuexiꞌin ngayaꞌa ra ixin satsetauꞌen tumi dajon ra. 7Jaꞌa ra kain ncheꞌe ra jian ixin jaꞌa ra jian chunthia ra ngain Ndo Dio, anto jian nichja ra, icha nuꞌa ra, anto thjengijna ra icha chujni ko anto thjue na ni ra. Mexinxin ncheꞌe ra ixin jaꞌa ra icha dajon ra ixin tsjengijna ra chujni nua.

8Jaꞌan rithetuanꞌa ra jiꞌi, jeꞌo rinaꞌo ixin jaꞌa ra ruchunxin ra kexreen icha niꞌngo dajon tumi ixin thjengijna choo na̱. Ko jañaa jaꞌa ra tsjaago ra ixin ndua thjueꞌe ra icha chujni. 9Jaꞌa ra unuꞌa ra thi jian bincheꞌe Nchaa ná Jesucristo. Jeꞌe bechunda kain, aro ixin anto thjuaꞌa ra, jeꞌe kuinthuꞌe kain ixin jaꞌa ra nchao ruchunda ra kain thi thixin ngain Ndo Dio.

10Ko rundathjo ra thi jaꞌan xraxaꞌon ixin thi thjengijna ra ni nua: Ngain nano batho jaꞌa ra thi saꞌo bajon ra ko kai jaꞌa ra thi saꞌo xraxaon ra runcheꞌe ra jiꞌi. 11Ko nchekjexin ra thi kuexinxin ra kunixin jian juaxraxaon inchin are kuexiꞌin ra ko thjengijna ra chujni kunixin thi jaꞌa ra nchao sajon ra. 12Ja̱ chrujan chujni ndua rinao sajon, Ndo Dio jaan dayee ndo, ko danchiaꞌa ndo thi chundaꞌa ni.

13Aro jeꞌa ixin tsjengijna ra inaa chujni, ko jaꞌa ra iruchundaꞌa ra thi sundaꞌa ra. 14Jai ixin tsjé chunda ra, thjengijna ra chujni dundeꞌe. Ko are jeꞌe na̱ ruchunda na̱, jeꞌe na̱ tsjengijna ra na̱ kai ko jañaa yaꞌi tsjengijna choo ra. 15Inchin ndachro ngain Xruen Ndo Dio: “Thi bechunda anto tsjé, xruꞌin xeꞌe; ko thi tsjéꞌa bechunda, xruꞌin bitjeꞌen.”

Tito kjui Corinto

16Thexruxian Ndo Dio ixin bakeꞌe Ndo ngain anseen Tito xrajeꞌo juaxraxaon inchin juaxraxaon richunda ixin jaꞌa ra. 17Are jeꞌe bithikaon thi jaꞌan kuetuan, ko ixin jeꞌe anto rinao tsji ngajin ra, ko jai jeꞌe siji sitsjaꞌa ra, ixin jeꞌe rinao.

18Jai siji Tito kunixin inaa xan choo ná thi jaꞌan ná ruruaꞌan ná. Ko anto jian nichja na̱ ngain kain niꞌngo ixin jeꞌe xan, ixin jeꞌe xan tjaago xan thi jian juajnee Ndo Dio. 19Ko kain niꞌngo kuinchieꞌe na̱ xan ixin tsji xan ngajin ná are tsjiꞌan ná tumi ngain chujni. Ko jiꞌi sinthaꞌa ná ixin tsusayeꞌe Nchaa ná ko tsjaago ná ixin anto rinaꞌo ná tsjengijna ná icha chujni. 20Ko rinaoꞌa ná ixin chujni chrjuinꞌa runichja na̱ ixin jaꞌan ná ixin thi tumi jaꞌa ra dajon ra. 21Ko jaꞌan ná tenthaꞌa ná thi jian ko jeoꞌa ngathexin kon Ndo Dio, kai ngathexin kon chujni.

22Ko ngain ni teꞌi, jaꞌan ná ruruaꞌan ná inaa xan choo ná, thi xan bikon ná tsjé nthiꞌa ixin ndua rinao tsjengijna ná ngain xree Jesucristo, ko jai icha rinao sincheꞌe xan xra ixin anto chunthia xan ngajin ra. 23Xraxaon ra ixin jaꞌan ko Tito nthaꞌa ná xree Jesucristo ixin thjengijna ra jaꞌa ra. Ko ixin ni jidikao Tito ikanxion niꞌngo ruꞌan na̱ ko ni teꞌi nchesayeꞌe na̱ Jesucristo. 24Ko ixin kain niꞌngo tjaago ra ixin ndua thjueꞌe ra na̱, ko ixin, jaan, ndua thi taꞌin ñaꞌo ná ixin jaꞌa ra.

Currently Selected:

2 Corintios 8: plsNT

Highlight

Copy

Compare