2 Corintios 6
6
1Jaꞌan ná xro nthaꞌa ná xree Ndo Dio, nthatsaꞌan ñao ra ncherenthe ra ko thinthueꞌa ra thi jian chjaa ra ndo. 2Ixin ngain Xruen Ndo Dio ndachro:
Ngain nchaꞌon icha bundaꞌa ra, jaꞌan kuian thi ndachjejin ni ra,
ko nchaꞌon jikininxin kjuengijna ra, kjan ra inaa chujni narua.
Ko jai mee nchaꞌon jian ixin jaꞌa ra, ko nchao rukjan ra inaa chujni narua.
3Jaꞌan ná rinaoꞌa ná ixin chujni runichja na̱ ixin ndakuaꞌa tenthaꞌa ná xrana ná. Mexinxin jaꞌan ná jian nthaꞌa ná xra. 4Ko icha jian tjaago ná ixin jaꞌan ná ndua ni nchexree Ndo Dio. Ko thixinna ná kain thi tangi detan ná are xruꞌin chunda ná, are icha chujni chrjuinꞌa ncheꞌe na̱ ngajin ná, are chunda ná juachjaon, 5are dintja ná na̱, are thiaxinna ná na̱ ngain nduꞌa xiiso, are tuyauthe ná na̱ ngayee chujni, are nthaꞌa ná xra, are dinthechrinꞌa ná, are jineꞌa ná. 6Ko jian te ná ngathexin kon Ndo Dio, ko ixin jian nuna ná thi ndua, ko thixin na ná kain, ko thjengijna ná chujni ixin Espíritu Santo jii ngajin ná, ko kain thi nthaꞌa ná dachrjexin ngain ansenna ná. 7Ko ixin nichja ná thi juajna ndua, ko ixin juachaxiin Ndo Dio, ko ixin juachaxiin juajnee Ndo Dio, yaa nthaxin ná xra ko thjengijna ná, ixin nichja ná thi ndua. 8Ko te nchaꞌon chujni nchesayaa ná na̱, aro te nchaꞌon chrjuinꞌa nichja na̱ ixin jaꞌan ná. Ko chujni ncheꞌe na̱ ngajin ná inchin ncheꞌe na̱ ngain chujni nichja thi nduaꞌa, maski jaꞌan ná nichja ná thi ndua. 9Nchena ná na̱ xraa chujni chunxinꞌa na̱, maski chunxin ná na̱ jian. Kain nchaꞌon tangi dathua ná ko xraa undaseꞌen ná, aro xra techon ná, tangi nchegatho ná na̱, aro duenꞌa ná na̱. 10Ko xraa tatechiꞌin ná, aro jaꞌan ná chaꞌna ná, ko maski xruꞌin tumi chunda ná, aro tsjé chujni chjaꞌa ná thi chunda ná, ko xraa xruꞌin chunda ná, aro chunda ná kain thi rugundana ná.
11Jaꞌa ra xro niꞌngo Corinto, ndathjo ra kain thi jaꞌan ná tununa ná ixin jaꞌan ná anto thjuaꞌa ra kunixin ansenna ná. 12Jaꞌan ná anto thjuaꞌa ra, aro jaꞌa ra thjueꞌa na ni ra xraa jaꞌan ná. 13Jaꞌan rinthatsaꞌan ñao ra inchin naa ndudaꞌa nchetseꞌen ñao xeꞌen ndo, ixin ruthjueꞌna na ni ra kunixin ansean ra inchin jaꞌan thjuaꞌa ra.
Jaꞌan ná ningue Ndo Dio ndo jichon
14Tatoꞌa ra chujni dithikaonꞌa Jesucristo. Ixin, ¿a jian dakao choo chujni ncheꞌe jian ko chujni ncheꞌe jianꞌa? O, ¿anchao seꞌe thi dingasaan ngain thi naxin xeꞌe? 15Ko nchiijin chroꞌa sincheꞌe thi rinao Cristo, ko Cristo chroꞌa sincheꞌe thi rinao nchiijin. Ko kai naa chujni dithikaon Cristo chroꞌa sincheꞌe thi rinao chujni dithikaonꞌa Cristo. 16¿Keꞌe dakauxin choo jian ningue Ndo Dio ko diuchjan dinchechjian xii? Ixin jaꞌan ná ningue Ndo Dio, ndo jichon, inchin ndachro ndo:
Jaꞌan sariꞌi ngain anseen na̱ ko thi sakji na̱, nthi̱ꞌa̱ sakjiꞌan na̱;
jaꞌan rukjan Dioe na̱,
ko jeꞌe na̱ rukjan chujni rajnana.
17Mexinxin kai ndachro Ndo Dio:
Dachrjeyexin ra ngayee na̱, ko dachrjenda ra;
ko katheꞌa ra kain thi thjuaꞌa.
Kuthimejan jaꞌan sayáꞌa ra,
18ko jaꞌan rukjan naa Ndudaꞌa ixin jaꞌa ra,
ko jaꞌa ra rukjan ra xanꞌna xan xii ko xan nchrii.
Jañaa chro Nchaa ná thi chunda kain juachaxin.
Currently Selected:
2 Corintios 6: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
