2 Corintios 11

Chujni bandachro ixin kuinchieꞌe Jesucristo aro nduaꞌa

1Nthatsaꞌan ñao ra thixiꞌan ra thi rundathjo ra, maski dikon ra xraa ndadixinga na. 2Ixin thi juachjio tununa ixin jaꞌa ra thixin ngain Ndo Dio. Ixin jaꞌan undachrjan ixin sajon ra ngain Jesucristo, xraa naa xan nchrii xra xruꞌin xii digindathe. 3Aro jaꞌan xraon na ixin tsuꞌan ra xraa kuꞌen Eva, are kunchee bincheyeꞌe. Ko jañaa chrujan chujni tsii ngajin ra ko sinthayaꞌa ra ko ndarutjañaꞌa ra ixin chunthia ra ngain Jesucristo. 4Ixin jaꞌa ra dithuaxin ra thiꞌin ra chujni ndathjo ra ujee ixin Jesucristo ko jeꞌa inchin jaꞌan ná kjuaguꞌa ra. Ko ngain ansean ra dayeꞌe ra ujee espíritu ko jeꞌa Espíritu Santo thi jaꞌa ra ubayeꞌe ra, ko dithikaon ra ujee juajna ko jeꞌa thi jian juajnee Jesucristo thi undathjo ra. 5Aro jaꞌan jeꞌa icha rentheꞌa na ke thi chujni rueꞌe ra ko tunuꞌe na̱ ixin anto renthe na̱ ixin nthayaꞌa ra na̱ ixin Jesucristo kuinchieꞌe na̱. 6Maski jaꞌan jeꞌa jian nichja xraa nichja jeꞌe na̱, aro jaꞌan jian chunxin juajnee Ndo Dio. Ko jiꞌi ukjuaguꞌa ra ixin thi nichja ná ko thi nthaꞌa ná.

7Nchingo jianꞌa binthaꞌa ixin xruꞌin tumi banchiaꞌa ra are kjuaguꞌa ra juajnee Jesucristo. Ko jaꞌan jeꞌa xraa naa chujni anto renthe binthaꞌa ixin jaꞌa ra rukurenthe ra. 8Jaꞌan bayáa tumi bajon kanxion niꞌngo ixin jañaa nchao binthaꞌa xra ngajin ra. 9Are jaꞌan bariꞌi ngajin ra ko chrujan bagundana, jaꞌan xruꞌin baganchiaꞌa ra ixin Macedonia bakixin kanxion chujni bagithikaon Jesucristo, ni teꞌi bachjana thi bagundana. Ko jañaa xruꞌin baganchiaꞌa ra ko xruꞌin sanchiaꞌa ra. 10Jaꞌan jian nuna juajnee Jesucristo, ko nguixin nunthe Acaya xruꞌin chujni santsjena thi chrjuin tunuꞌe ansenna ixin jaꞌan danchiaꞌa thi dundana. 11¿Unda nichja jaꞌin? ¿A ixin anto thjuaꞌa ra?, Ndo Dio nuꞌe ndo ixin jaꞌan anto thjuaꞌa ra.

12Ko jaꞌan xrasinthaꞌa xra rinthaꞌa ko jañaa tsanchrjandaꞌa ni thjee jeꞌo tsurenthe ko tsaꞌin ñao na̱. 13Ixin chujni teꞌi, jeꞌa chujni kuinchieꞌe Jesucristo ko kunxon ncheꞌe na̱ xraa chujni kuinchieꞌe Jesucristo, aro jeꞌo ncheꞌe na̱ yaa ixin dantsjexin na̱ tumii chujni. 14Ko utsjé nthiꞌa tuꞌen jiꞌi ixin nchiijin thii inchin naa angeel Ndo Dio ko tungiixin inchin naa xruꞌi chrjuin. 15Ko mexinxin chujni nchekaꞌo nchiijin xra nchexon na̱ ncheꞌe na̱ thi jian. Aro kain chujni jiꞌi Ndo Dio sincheꞌe jie̱ ngain na̱ ixin thi ncheꞌe na̱.

Thi tangi kuꞌen Pablo

16Ko rundathjo ra inaa, xraxaonꞌa ra ixin ndaxenga na, aro ja̱ xraxaon ra ixin ndadixinga na, maski jañaa xraxaon ra, thiꞌin ra thi runichja ko jañaa tsaꞌin ñaꞌo nchin. 17Thi jaꞌan rindachrjan jeꞌa Ndo Dio kuetunna. Jaꞌan nuna jian ixin are jeꞌo ni taꞌin ñao ni, jiꞌi ruchro ixin ndakuaꞌa te ni. 18Ko jañaa tsjé chujni taꞌin ñao ixin kain thi bincheꞌe nthiꞌi ngataꞌa nunthe, jamee jaꞌan kai tsaꞌin ñaꞌo. 19Jaꞌa ra anto nuꞌa ra, mexinxin anto thixiꞌan ra thiꞌin ra thi ndachro chujni ndadixinga. 20Ko kai thixiꞌan ra ixin nthaꞌa ra na̱ xraa chujni tuchji ngain naa xi najni, ko nthanthaꞌa ra kain thi rinao na̱, ko nthayaꞌa ra na̱ ko ningakuꞌan ra na̱ ko te na̱ xrangii raa na̱ ngakon ra. 21Ko tusuana ndachrjan ixin sujiꞌa ná, ixin binthaꞌa ná xraa chujni teꞌi.

Ko ja̱ chrujan ni taꞌin ñao ixin thi tencheꞌe na̱, jaꞌan kai nchao tsaꞌin ñaꞌo ko rinichja xraa naa chujni ndadixinga. 22¿Ko chujni teꞌi ndachro na̱ ixin hebreo na̱? Jaꞌan kai hebreo na. ¿Ko ndachro na̱ ixin Israel na̱? Jaꞌan kai Israel na. ¿Ko ndachro na̱ ixin bachrjeninxin na̱ Abraham? Jaꞌan kai bachrjeninxin Abraham. 23¿Ko jeꞌe na̱ ndachro na̱ ixin ncheꞌe na̱ xree Jesucristo? Ko jaꞌan tusuana rundachrjan jiꞌi. Aro jaꞌan icha tsjé xree Jesucristo rinthaꞌa ke jeꞌe na̱, ko jaꞌan thi icha bikaon na, ko tsjé nthiꞌa biaxinna, ko kai tsjé nthiꞌa uchiaon rugeꞌen na. 24Ko ni baketuꞌen ni judío naꞌo nthiꞌa kuetuꞌan na̱ bintja na na̱ ko kjuadunga na na̱ cuarta kan the na̱a̱ nthiꞌa. 25Ko nii nthiꞌa kuaxin na na̱ nthasen, ko naa nthiꞌa kuaxin na na̱ xro, ko nii nthiꞌa xinkajingi jinda ntha barko rithji jaꞌan, ko naa nthiꞌa tabaritauan jinda naa nchaꞌon ko naa thie. 26Ko nguii thi bakji ko bajiꞌi anto tangi bathua, uchiaon ndarugeꞌen na are bagathujin nda jithinga, ngain ni cheꞌe, ngain ni chujnina ni judío, ngain ni jeꞌa judío, ko bagathua tangi ngain rajna, ngataon jngi, ngain ndachaon, ko ngain chujni ndachro ixin jeꞌe na̱ dithikaon na̱ Jesucristo aro nduaꞌa. 27Jaꞌan binthaꞌa xra ko tsjé thi tangi betan, ko tsjé thie bagarichrinꞌa, tsjé nthiꞌa bageꞌen na jintha ko jinda, ko tsjé nthiꞌa xruꞌin bajine, ko tsjé nthiꞌa bagathua kin ixin tsjéꞌa luntho barichunda.

28Ko jeoꞌa jiꞌi, kai taa juachjaon ixin kain chujni dithikaon Jesucristo ngain kain niꞌngo. 29Are naa chujni xraa thinxinꞌa jian, jaꞌan kai tununa xraa chujni mee. Ko are naa chujni ncheyeꞌe inaa chujni sincheꞌe thi jianꞌa, jaꞌan anto duñaꞌo. 30Ja̱ chrujan tsainxin ñaꞌo, jaꞌan tsaꞌin ñaꞌo ngain thi binthaꞌa ko kjuaago ixin sujiꞌa na. 31Ndo Dio, Ndudee Nchaa ná Jesucristo, thi jikininxin sinthusayeꞌe ná kainxin nchaꞌon, jeꞌe nuꞌe ixin, jaan, ndua thi rinichja. 32Are bariꞌi ngain rajna Damasco, xi rey Aretas bakeꞌe xa naa thi kuetuꞌan nuntheꞌe Damasco. Ko xi mee bakeꞌe xa chujni benda kain thi dixinxin ni Damasco ixin rutse na na̱ ko rukiaxinna na̱. 33Aro kanxion chujni bagakjiꞌan jian bincheganianxin na na̱ nganito thjarioꞌo jindajin rajna kunixin naa nthaxra kaxro ko jañaa sakuinga.

Currently Selected:

2 Corintios 11: plsNT

Highlight

Copy

Compare