1 Tesalonicenses 3
3
1Mexinxin are atho juinaꞌo ná rukununa ná kexreen te ra, jaꞌan ná kjuao ná ko ndachrjan ná ixin icha jian tabithuna ná nthiꞌi Atenas 2ko ruaꞌan ra xan choo ná Timoteo, xan thjengijna ná ko ncheꞌe xree Ndo Dio ixin dikao xan juajnee ndo. Ko juiji xan ixin juitsjaꞌa ra xan ixin sinthasuji ra xan ko icha ruchunthia ra thi jian juajna. 3Ixin maski tangi tedathuꞌe ra, xruꞌin ra xro rutjañaꞌa ra thi jian juajna bithikaon ra, ko jaꞌa ra ujian nuꞌa ra ixin jañaa tangi sathuꞌe ná 4ixin are binthe ná ngajin ra undathjo ra ixin tangi rukuan ná, ko jamee kuꞌen. 5Ko mexinxin ikuixinaꞌa chuan icha ko ruaꞌan Timoteo ixin banchiangi a xradithikaon ra jian ngain Jesucristo ixin kuaa juachjaon ixin nchiijin runthayaꞌa ra ko runcheꞌe ra thi jianꞌa ko jañaa thi jaꞌan ná kjuaguꞌa ra ndarukinthuꞌe ra.
6Ko jai Timoteo ukjanxin rajnaa ra, Tesalónica, ko jian juajna juiaꞌo na ixin jaꞌa ra anto jian chunthia ra Jesucristo ko anto thjueꞌe choo ra. Kai ndachjejin na ixin jaꞌa ra xraxaon ni ra kainxin nchaꞌon ko anto rinao ra sikon ni ra, jañaa inchin jaꞌan ná kai rinaꞌo ná sikon ra. 7Mexinxin, jaꞌa ra xan chian, maski anto tangi tedetan ná ko tangi tedathua ná, aro jaꞌan ná tusuji ná ixin kununa ná ixin jaꞌa ra xra jian chunthia ra ngain Jesucristo. 8Ko ixin dachrjendeꞌa ra Jesucristo, jaꞌan ná kai icha tusuji ná. 9Nunaꞌa ná, kexreen anto tsexruxianxin ná Ndo Dio ixin jaꞌa ra, ixin jaꞌan ná anto chaꞌna ná ngathexin kon ndo ixin thi tencheꞌe ra. 10Nchaꞌon ko thie nthatsaan ná ñao Ndo Dio ixin ruchjana ná juachaxin ixin jaꞌan ná sikon ra inaa, ko jañaa ruxethjaxin thi xra chunthiaꞌa ra jian ngain Nchaa ná.
11Ko Ndo Dio Ndudaa ná ko Nchaa ná Jesucristo tsjengijna ná ixin nchao sasutsjaꞌa ra. 12Ko kai nthatsaan ná ñao Nchaa ná ixin icha sinthakangi ra thi unuꞌa ra ixin ruthjueꞌe choo ra icha ko ruthjueꞌe ra icha chujni, inchin jaꞌan ná thjuaꞌa ra jaꞌa ra. 13Ko Ndo Dio sinchesuji ansean ra ixin xruꞌin thi jianꞌa sincheꞌe ra ko xruꞌin jianꞌa seꞌe ngain ansean ra ngathexin kon Ndo Dio Ndudaa ná are tsii Nchaa ná Jesús kunixin kainxin chujnii.
Currently Selected:
1 Tesalonicenses 3: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
