Lizsij dih Gaihcij 46

1Gajlaeng Yajgoz#46:1 Dineix ndaw yienzvaenz dwg naeuz ‘Hijswzlez.’ couh daiq sojmiz dih gyadangq byaij goq aen cwnq Bezciqbah bae Ngaihgiz. De byaij daengz Bezciqbah le, couh dawz doxgaiq bae bwiz boux cauqguq daxboh de Hijsaj dih Cangqdiq. 2Haemh mwnq, Cangqdiq couh hawj de fangxngwnzloq, loqraen Cangqdiq caeuq de gangj vah. Cangqdiq heuh de naeuz: “Yajgoz, Yajgoz!”

Yajgoz han naeuz: “Aex, gou youq dineix!”

3Cangqdiq naeuz: “Gou dwg baujcuk baujyouh daxboh mwngz dih Cangqdiq. Mwngz gaejyungh lau bae Ngaihgiz; gou gaengjdingq hawj doengh daih lwglwg lanlan laenjlaenj mwngz youq mwnq cungj ndaej bienqbaenz aen minzcuz hung he. 4Gou ij cingqcaen caeuq mwngz itheij bae Ngaihgiz, caemh ij cingqcaen daiq doengh daih gajlaeng mwngz ma daengz dineix. Yozswz caemh ndaej dawzrai mwngz.”

5Yajgoz dingq le, couh dajlwh Bezciqbah okdin bae Ngaihgiz. Doengh daeglwg de hawj de caeuq daxmeh gyoengqde caeuq doenghheij lwg heij yah gyoengqde naengh aen ci goengjvuengz baij daeuj he. 6-7Yajgoz daiq gyoengq lwglwg lanlan laenjlaenj de, [6a]vanzlij miz sojmiz dih gyadangq caeuq sojmiz dih cukseng hah [6b,7b]bae daengz Ngaihgiz.

Aen gyahcuz Yajgoz

8Laj neix dwg ranz Yajgoz gaen de itheij bae Ngaihgiz hih coh:

Daeglwg daeuz Yajgoz, Lijbenq, 9caeuq doengh daeglwg de Hahnoz, Fazluq, Hijswhlwnz caeuq Gyahmij.

10Sihmenj caeuq doengh daeglwg de Yehmujliq, Yajminj, Ayaz, Yajginh, Sojyaz caeuq Saujloz. (Daxmeh Saujloz dwg lwgsau Gyahnamz.)

11Liqveiq caeuq doengh daeglwg de Gwzswnq, Gohyaz caeuq Mijlahliq.

12Youzdaq caeuq doengh daeglwg de Wj, Ngoznamz, Siqlah, Fazlwzswh caeuq Seqlah (hoeng Wj caeuq Ngoznamz gaenq rai youq dieg Gyahnamz lo). Fazlwzswh caemh miz lwg lo, couh dwg Hijswhlwnz caeuq Hahmujlwz.

13Hijcazgyah caeuq doengh daeglwg de Dozlah, Bujvaj, Yozbwz caeuq Sinhlwnz.

14Sihbuqlwnz caeuq doengh daeglwg de Sihlez, Hijlwnz caeuq Yajliq.

15Gij vunz gwnz neix dwg Liqyaq youq laeng boxda de dieg Bahdanj-Yaqlanz seng hih lwglwg lanlan, caemh miz lwgsau Dijnaz. Gyoengq lwglan neix itgungh miz samcib sam vunz.#46:15 Couh dwg ceij samcib sam daeg lwglan, daiqlienz gaenq rai dih Wj caeuq Ngoznamz.

16Gyahdwz caeuq doengh daeglwg de Sijfaehywnz, Hahgih, Cuhniz, Hijswhbaenj, Hijliq, Yaqlozdij caeuq Yaqlezliq.

17Yaqsez caeuq gij lwg de Yimhnaz, Hiqswhvaj, Hiqswhveiz, Bijliqyaq, caeuq dahlwg de Sihlah. Bijliqyaq caemh miz lwg lo, couh dwg Hihbez caeuq Majgyez.

18Gwnz neix dwg Sizbwz dih doengh daih gajlaeng. Sizbwz dwg Lahbanh soengq hawj dah lwgsau de Liqyaq guh swqhaeuh de. De vih Yajgoz seng hih lwglan, itgungh miz cibroek vunz.

19Mehyah Yajgoz Lahgyez seng miz song daeglwg: Yozswz caeuq Benqyajminj.

20Mehyah Yozswz Yaqsihnaz youq Ngaihgiz seng miz song daeglwg: Majnazsih caeuq Hijfazlenz. Yaqsihnaz dwg dah lwgsau Bohdizfeihlah goengjsae dajbwiz neix he, dwg youq An Singz he.

21Benqyajminj caeuq doengh daeglwg de Bijlah, Bijgyez, Yaqsizbez, Gihlah, Naijmanq, Hijhih, Lozsiz, Mujbingz, Huqbingz caeuq Yaqlwz.

22Gwnz neix dwg Lahgyez seng hawj Yajgoz dih lwglan, itgungh miz cibseiq vunz.

23Danq caeuq daeglwg de Huqsinh.

24Nazfuzdahliq caeuq doengh daeglwg de Yajceh, Gyezniz, Yehswz caeuq Siqlaengj.

25Gwnz neix dwg Bizlah dih doengh daih gajlaeng. Bizlah dwg Lahbanh soengq hawj dah lwgsau de Lahgyez guh swqhaeuh de he. De seng hawj Yajgoz dih lwglan, itgungh miz caet boux.

26Gaen Yajgoz bae Ngaihgiz dih gij lwg gij lan gij laenj de, bawx mbouj suenq, itgungh miz roekcib roek vunz. 27Gyacangq Yajgoz caeuq Yozswz caeuq song daeglwg Yozswz youq Ngaihgiz seng he, ranz Yajgoz bae daengz Ngaihgiz mwhde itgungh miz caetcib vunz.

Ranz Yajgoz bae daengz Ngaihgiz

28Couh yienghneix, Yajgoz bae daengz Ngaihgiz le, couh sien baij Youzdaq bae cimh Yozswz, bae cam de ij bae dieg Gohsanh baenzlawz bae. Yiengq mwh Yajgoz daengz Gohsanh hih mwhde, 29Yozswz dawz ci hoenxciengq bae yawj daxboh de. Gyoengqde raennaj le, Yozswz couh got dawz daxboh de daej haujlai caez. 30Gajlaeng Yajgoz doiq Yozswz naeuz: “Gou ndaej caenra raen mwngz vanzlij lix, gou rai ra caemh laep lo!”

31Yozswz doiq doengh gyoengq goengjlungz nuengxau de caeuq gij vunz ndaw ranz daxboh de naeuz: “Gou ij bae naeuz goengjvuengz ni, naeuz: ‘Gyoengq beixnuengx gou caeuq gij vunz ndaw ranz daxboh gou gaenq dajlwh Gyahnamz buen daeuj daengz dineix lo. 32Gyoengqde cungj dwg dajciengx he, cenmonz dajciengx goq saedceij; gyoengqde dawz sojmiz dih yiengz hah, cwz hah, caeuq sojmiz dih gyadangq hah cungj buen daeuj daengz dineix lo.’” 33De caiq naeuz: “Goengjvuengz heuh faenhsou bae caeuq de raennaj, cam faenhsou guh gijmaz hong nex, 34faenhsou ij yienghneix han: ‘Bouxhoiq mwngz dajlwh cojgoeng raeuz cungj dwg dajciengx goq saedceij he.’ Yiengq, goengjvuengz couh hawj faenhsou youq dieg Gohsanh youq lo, aenvih gij vunz Ngaihgiz dwgcaengz gij vunz ciengx yiengz he.”

Currently Selected:

Lizsij dih Gaihcij 46: YBNT

Highlight

Copy

Compare