Lizsij dih Gaihcij 43

Yajgoz hawj Benqyajminj bae Ngaihgiz

1Dieg Gyahnamz iekvangh gig yiemzcungq. 2Yajgoz cenz ranz cungj gw liux gij haeux dajlwh Ngaihgiz cawx ma he lo. Gajlaeng, Yajgoz couh doiq gyoengq lwg de naeuz: “Faenhsou caiq doiqyungz bae cawx di haeux he ma bax!”

3Yiengq Youzdaq couh doiq daxboh de naeuz: “Boux mwnq gingjgauq goq gyoengqraeuz naeuz: ‘Hauhnaeuz faenhsou mbouj daiq laeq nuengx iq faenhsou daeuj nex, gaej muengh naeuz faenhsou ndaej daeuj raen gou lo.’ 4Boh, mwngz hawj nuengx iq caeuq raeuz bae nex, raeuz couh bang mwngz bae cawx haeux. 5Hauhnaeuz mwngz mbouj hawj nex, raeuz caemh mbouj ndaej bae lo, aenvih boux mwnq gangj goq naeuz: ‘Hauhnaeuz nuengx iq faenhsou mbouj caeuq faenhsou itheij daeuj nex, couh mboujcwnj faenhsou daeuj raen gou.’”

6Gajlaeng Yajgoz naeuz: “Faenhsou vihmaz ij yienghneix haih gou? Vihmaz naeuz boux mwnq ni naeuz faenhsou vanzlij miz daegnuengx iq laem nex?”

7Gyoengqde han naeuz: “Boux mwnq caenhrox saemj, caenhrox caz gyoengqraeuz caeuq ndaw ranz raeuz baenzlawz yiengh: ‘Faenhsou lij miz daxboh laem lwi? Faenhsou vanzlij miz mbouj miz beixnuengx hah?’ Yiengq gyoengqraeuz cungj lauxlaux saedsaed naeuz de ni lo. Bouxlawz rox naeuz de ij hawj raeuz daiq nuengx iq raeuz bae nex?”

8Youzdaq caiq doiq daxboh de naeuz: “Gyau daegnuengx iq hawj gou bax. Raeuz majcangq bae cawx haeux, mienxndaej raeuz cenz ranz bouxlaux, bouxnoix, daiqlienz mwngz caeuq gij lwgyah raeuz cungj ngaiz rai iek. 9Gou ndaej baux laeq nuengx neix dih nganhcenz; hauhnaeuz gou mbouj ndaej bingzan daiq de ma nex, nyienh'eiq baenxseiq vunz rap gij coih neix.” 10Gangj daengz dineix le, Youzdaq couh naeuz: “Neq, hawjm'z yawj hux, hauhnaeuz raeuz mbouj ngaiz nguh nex, seizneix cungj ndaej bae ma song ngaux lux!”

11Yiengq daxboh de han naeuz: “Hauhnaeuz ngengh ij yienghneix guh nex, caemh ndaej, hoeng faenhsou caemh ij dawz di mwnq raeuz neij gij ceiq ndei he, luj dangzrwi hah, cix feih cix ndei gw dih gaihsinhgoj hah, gingqywnz hah, caeuq sam cungj iengfaex#43:11 Sam cungj iengfaex neix couh dwg yanghliuq, yeijyangh caeuq mozyoz. Doenghgij neix ndaej aeu ma guh yw, yanghceij caeuq yieng. rang fwtfwt ceiq dijbauj he, it cungj cungj aeu it di bae soengq hawj bouxcawj mwnq, caemhdangq naeuz soengq di laex he hawj de sat lo. 12Caiq daiq ngaenz bae lai boix he hwj, dawz gij ngaenz mbat gaxgonq youq ndaw daeh raen mwnq nax—aiq dwg loek dinghluh—aeu bae boiz vunz. 13Faenhsou daiq daegnuengx iq sou vaiqdi bae cimh boux vunz mwnq bax. 14Muengh Cangqdiq, couh dwg akak rengzrengz gaiqgaiq cungj ndaej guh daengz dih Cangqdiq, sawjhawj de sim'unq le, ndaej hawj Benqyajminj caeuq Sihmenj gaen faenhsou ma. Hauhnaeuz yienghneix cungj lij ij hawj gou baih lwg nex, gou caemh gauqswz lo, cungj caenhbouh liux lo, mij banqfaz laem lo, suenq lo.” 15Couh yienghneix, gyoengqde couh daiq di caenxcingz caeuq song boix dih ngaenz, caemh daiq Benqyajminj bae Ngaihgiz cimh Yozswz lo.

16Yozswz raen Benqyajminj caeuq gyoengqde daeuj le, couh naeuz boux guenjgya de hawj de daiq gyoengqde bae ndaw ranz de, caemhcaiq raengq de naeuz: “Maj gaj bit gaj gaeq loengh byaek daengj gou; haeuxringz gou ij caeuq gyoengqde gw.” 17Boux guenjgya caemh ciuq de naeuz hih yienghmwnq bae guh, daiq gyoengqde maj ranz Yozswz.

18Aenvih Yozswz hawj gyoengqde haeuj ndaw ranz de bae, yiengq gyoengqde cungj lau hwj naeuz: “Aiq dwg vih gij ngaenz mbat gaxgonq coengq youq ndaw daeh, cij daiq gyoengqraeuz daeuj dineix, ijsiengj hoenx gyoengqraeuz, ciengj aeu duz lawz raeuz, caeuq ep gyoengqraeuz hawj de guh hoiq dinghluh.”

19Gyoengqde yienghneix lwnh naeuz le, couh youq mwh gyoengqde ngamq baex daengz bakdou he couh majcangq cam boux guenjgya de naeuz: 20“Goengjau, mbat gaxgonq gyoengqraeuz daeuj dineix dwg daeuj cawx haeux he. 21Hoeng, maj daengz buenqroen doz haemh yietbaeg le, hoi bak daeh cij rox naeuz gij ngaenz bonjfaenh cungj lij youq ndaw daeh bonjfaenh, it faen cungj mbouj noix. Seizneix, gyoengqraeuz doiqyungz daiq gij ngaenz mwnq daeuj lo, 22vanzlij linghvaih daiq daeuj mbat neix ij cawx haeux he dih ngaenz. Gyoengqraeuz cingqcaen mbouj rox mbat gaxgonq dwg bouxlawz dawz ngaenz coengq haeuj ndaw daeh raeuz bae.”

23Goeng guenjgya dingq le, vued gyoengqde naeuz: “Faenhsou gaej heiq gaej lau; gij ngaenz faenhsou gou gaenq senqsi sou lo. Gij ngaenz ndaw daeh faenhsou dwg boux baujcuk baujyouh faenhsou caeuq cojgoeng faenhsou dih Cangqdiq soengq hawj faenhsou coengq youq ndaw daeh lah.” Goeng de yienghneix gangj sat le, couh daiq Sihmenj okdaeuj hawj gyoengqde.

24Boux guenjgya daiq gyoengqde haeuj maj ranz Yozswz le, couh daek raemx hawj gyoengqde swiq ha,#43:24 Mwhmwnq daek raemx hawj vunz swiq ha dih iqswh dwg doiq bouxhek miz lijmauq. caiq heuh vunz bang gueng doengh duz lawz gyoengqde. 25Doengh daeggo Yozswz gaenq rox naeuz gyoengqde haeuxringz ij youq mwnq gw haeux lo, yiengq gyoengqde couh cwnjbiq ndei doenghgij caenxcingz mwnq, daengj de ma le couh soengq hawj de.

26Yozswz ma daengz ranz le, gyoengqde couh dawz gij caenxcingz soengq hawj de, caemh bomz roengz doem bae sax de. 27Yozswz raen yienghneix le, couh dongx gyoengqde naeuz: “Faenhsou baenzlawz yiengh hah? Ndei lwi?” Caiq cam gyoengqde naeuz: “Daxboh faenhsou hax, couh dwg faenhsou gangj goq dih boux vunz laux mwnq hax, de ndei lwi? Vanzlij youq bax?”

28Gyoengqde han naeuz: “Daxboh gyoengqraeuz, bouxhoiq mwngz, ndei hwj; de vanzlij giencangq.” Gangj sat, gyoengqde youhcaiq gvih roengzma sax de.

Yozswz raen Benqyajminj

29Yozswz yawjraen caeuq bonjfaenh doxdaep saejndw dih daegnuengx iq de Benqyajminj le, couh cam naeuz: “Boux neix couh dwg faenhsou naeuz gou ni goq hih daegnuengx ceiq iq he laj?” Caemhcaiq naeuz: “Nuengx iq, muengh Cangqdiq soengq fuk hawj mwngz.” 30Yozswz gangj sat, couh nyungjnyat byaij okbae. Aenvih de baenxlai caez mij raen daegnuengx iq de lo, couh cojgvaq hwj ceng di he cungj mbaet mbouj ndaej, ijvanh youq dangqnaj gyoengqde daej lo, yiengq de couh maj daengz ndaw fungh bonjfaenh de le, daej donq he. 31Gajlaeng de couh naenx youq ndaw sim hwj mbouj daej, swiq naj le couh ok daeuj, heuh gij vunz de nda daiz baij haeux baij byaek.

32Yozswz gag daiz he, gyoengq beixnuengx de caemh gag daiz he, gyoengq vunz buenx gw he, dwg vunz Ngaihgiz, caemh gag lingh nda daiz he, aenvih gij vunz Ngaihgiz dwgcaengz caeuq gij vunz Hihbwzlaiz caemh daiz gw haeux.

33Yozswz hawj gyoengq beixnuengx de baez boux baez boux hwj naj yiengq laeng de bae naengh; daengj gyoengqde cungj naengh ndei le, gyoengqde cij rox naeuz yienzlaiz dwg daj hung daengz iq baiz naengh. Yiengq, gyoengqde cungj doeksaet hwj boux yawj boux, geizheih de vihmaz rox yienghneix baiz nex. 34Yozswz mingqlingq gyoengq hoiq de dawz gij haeux gij byaek gwnz daiz de faen hawj gyoengq beixnuengx de. Hoeng, faenh Benqyajminj beij gak boux beixnuengx de lai haj boix. Couh yienghneix, gyoengqde couh caeuq Yozswz gw laeuj, gw hwj angq fwngjfwngq.

Currently Selected:

Lizsij dih Gaihcij 43: YBNT

Highlight

Copy

Compare