Lizsij dih Gaihcij 4
4
Gaihyinj caeuq Yaqbwz song beixnuengx
1Yaqdangh caeuq mehyah de ninz. Ninz le, mehyah de couh mizndang, seng miz daeglwg he. Meh de naeuz: “Aenvih Yehhozvaz bang gou, sawjhawj gou ndaej daeglwg neix,” yiengq couh an coh hawj daeglwg neix heuh Gaihyinj. (‘Gaihyinj’ gij coh neix caeuq gij vah Hihbwzlaiz dih cih ‘ndaej’ doeg ijvanh doxdoengz.) 2Gajlaeng de caiq seng daeglwg he, an coh heuh Yaqbwz. Yaqbwz dwg boux ciengx yiengz he, Gaihyinj dwg boux dajndaem he.
3Miz ngoenz he, Gaihyinj aeu doenghgij de ndaem ndaej hih gij gw, aeu ma guh gij dajbwiz he soengq hawj Yehhozvaz. 4Yaqbwz nej, Yaqbwz caemh daj ndaw gyoengq yiengz de aeu geij duz yiengzlwg daixdaeuz he dih gij noh ceiq ndei he, aeu ma guh gij dajbwiz he soengq hawj Yehhozvaz. Hoeng, Yehhozvaz haenj Yaqbwz caeuq gij dajbwiz de, 5dauq mij haenj Gaihyinj caeuq gij dajbwiz de. Yiengq Gaihyinj cungj ndatheiq hwj naj ndaem ndetndet bae.
6Gajlaeng Yehhozvaz cam Gaihyinj naeuz: “Mwngz vihmaz ndatheiq hwj naj ndaem ndetndet bae nej? 7Hauhnaeuz mwngz rox guh vunz nex, gou swhmboujyienz haenj mwngz; mbouj nex, mwngz couh veizyiemj, yungzheih famh coih. Coih couh veizyiemj luj duz mavangh ndoj youq bakdou mwngz ijsiengj haeb mwngz, sojhij mwngz couh ij cuqhiq de mbouj hawj de cimyex mwngz.”
8Gajlaeng, Gaihyinj doiq daegnuengx de naeuz: “Raeuz bae rog reihnaz bax!”#4:8 Miz hih gujdaiq saw mbouj miz gawq ‘Raeuz bae rog reihnaz bax!’ gawq neix. Yiengq gyoengqde bae daengz reihnaz le, Gaihyinj couh hoi fawz dub daegnuengx de, dub hawj daegnuengx de rai lo.
9Gajlaeng Yehhozvaz cam Gaihyinj naeuz: “Daegnuengx mwngz nej, de youq mwnqlaw lah?”
Gaihyinj han naeuz: “Mbouj rox law. Nanzdauh gou dwg boux fuqswz yawj daegnuengx gou hih maz?”
10Yiengq Yehhozvaz caiq saemjcam naeuz: “Mwngz guh gijmaz saeh hax? Gou lujnaeuz dingqri gij lwed daegnuengx mwngz daj laj doem yiengq gou daejdaej danqdanq. 11Mwngz gaj de mwhmwnq, gij dieg aj bak gyan gw gij lwed daegnuengx mwngz daj ndaw fawz mwngz riuz okdaeuj he. Sojhij mwngz couh vih yienghneix hwj ngaiz mang lo. 12Mwngz dajgeng hah, dajndaem hah, gij dieg caiq mbouj ok doenghgij gw hawj mwngz laem lo; mwngz ngaiz dauqcawq bae liuzlangq cij ndaej.”
13Yiengq, Gaihyinj doiq Yehhozvaz naeuz: “Fad baenxlai naek, gou dingx mbouj ndaej hah! 14Mwngz boenq gou ok mwnq dieg neix bae, mbouj hawj gou caiq raen mwngz, gou couh bienqbaenz boux mij gya mij dangq hih boux liuzlangq he lo. Yiengq gij vunz raen gou cungj ij gaj gou!”
15Hoeng Yehhozvaz naeuz: “Mbouj ngaiz law. Hauhnaeuz byawz gaj mwngz hih, de couh ij souh daengz caet boix hih bauqwngq.” Yiengq Yehhozvaz couh youq gwnz ndang Gaihyinj guh gij geiqhauh he, mbouj hawj vunz raen de le gaj de. 16Gajlaeng, Gaihyinj couh daj Yehhozvaz mwnq bae daengz dieg Nozdwz. (‘Nozdwz’ couh dwg ‘liuzlangq’ dih iqswh.) Mwnq dieg neix dwg youq Ihdenq hih mbiengj baixdoeng he; de couh youq mwnq youq.
Gaihyinj dih doengh daih gajlaeng
17Gaihyinj caeuq mehyah de ninz. Mehyah de couh daiqndang, seng miz daeglwg he, gij coh de heuh Hijnoz. Mwhde Gaihyinj caemh hwnq aen singz he; de aeu gij coh daeglwg de ma an aen singz neix heuh Hijnoz. 18Gajlaeng Hijnoz seng Hijnaz; Hijnaz seng Mijhuqyajliq; Mijhuqyajliq seng Majdujsajliq; Majdujsajliq seng Lahmwz.
19Lahmwz aeu song mehyah, meh he heuh Yaqdaq, meh he heuh Sijlah. 20Yaqdaq seng Yajbaz; Yajbaz dwg gij vunz dauqcawq bae dajciengx hih, daengz mwnqlawz youq mwnqlawz hih cojgoeng. 21Daegnuengx Yajbaz heuh Youzbaz; Youzbaz dwg gij vunz danz gimz boq dig hih cojgoeng. 22Sijlah seng Dujbaz-Gaihyinj; Dujbaz-Gaihyinj dwg cangh diz doengz diz diet hih cojgoeng. Nazmaj dwg dahnuengx Dujbaz-Gaihyinj.
23Miz baez he, Lahmwz doiq song mehyah de naeuz:
Yaqdaq, Sijlah, dingq gou naeuz;
Faenhsou dwg gou hih yah, ij dingq gij vah gou naeuz.
Gou gajrai sienghaih gou hih vunz,
Daiqlienz saeg gou bungq gou hih lwgngez cungj gaj.
24Gajhaih Gaihyinj hih vunz
Ij souh daengz caet boix hih bauqwngq;
Gajhaih gou nex,
Ij souh daengz caetcib caet boix dih bauqwngq.
Yaqdangh hih doengh daih gajlaeng
25Yaqdangh caiq caeuq mehyah de ninz; meh de caiq seng miz daeglwg he. Yaqvah naeuz: “Cangqdiq caiq hawj daeglwg he hawj gou dingj Yaqbwz, aenvih Yaqbwz ngaiz Gaihyinj gajrai lo.” Yiengq couh an coh hawj de heuh Caihdwz. (‘Caihdwz’ gij coh neix caeuq gij vah Hihbwzlaiz dih gawq ‘nyok hawj’ doeg ijvanh doxdoengz.) 26Gajlaeng Caihdwz caemh miz daeglwg he, an coh hawj de heuh Hijnozswq.
Daj mwhmwnq, gij vunz ij heuh Cangqdiq nex, couh yungh Yehhozvaz gij coh neix ma heuh.
Currently Selected:
Lizsij dih Gaihcij 4: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited