1 TESALONAIKA 5

Naktangka aming indi iikni' tipdidimanga girii wari abubu waraga' kapmekantam

1,2Ka kuyane indi kama ka girii wari tubobu abubu wara'ning wa nasi'ganang sini' kadofo' wara'ning wa kafakafa sini' mo' nakdidimem. Ka sidindu' kuma'sa' naknga iking, adi kapmo' ka kubu aming da'ning midi guk mo' tonga kagadofi sa' to', wara' indi waraga' wa sangdidima sini' titining guk mokngang. 3Beng sini' kama ka girii wari abubu wara'ning wa aming ka wara'ganang ikni' wari o kugurang karengsa' giri kuma' ikem ning tonga suknakube sa' kuma' tanga ikni' wara'ganangsa' napa' mamareng girii ka ifikadaga titining wari taming wari saba ibeunga kagaya urapsa' urang kadofiaminga nakiting ningda'ning kaga'sa' kadofiaminga nakni'ga', wara' adi mamareng ka u tatarafik ning kadapmang guk mokngang, bimbem sa' tini'ga'. 4Ka kuyane sidi aming ka sasuk ka girii wari tubobu abubu ning u kapmek wara'guk mokngang kangkam sa' ikiting ningwara' mo' iking, mokngang, sidi sasuk guk kuma' ira kapmek ting wara' girii wari tubobu abanga kubu aming da'ning urapsa' kadofiinga wa sidi yuguk mo' arani', sidi kuma' nakedanga kusubang gi'sa' adeni'. 5Beng sini' naktangka aming indi gaa' kangkam ning mo', indi diok a mayam ganang sangang sareng iik wara'ning. 6,7Ka indi kuma'sa' yabitam, aming ka dama dek ga'sa' nakiting wa tiim ganangsa' dekiting. Abanga aming ka ama kagaya topnanga papenga fatiangating undu' adi kangam ganangsa' titing. Wara' indi adisining kadapmang waraga' sura sasuk guk mokngang ka dama dekiting ningda'ning mo' ikantam, mokngang, indi sasuk guk ka ka'sa' ningda'ning ikantam. 8Beng sini' naktangka aming indi arantagim ka diok sangang ganang ningda'ning kuma' ikem wara' indi tugunung ningda'ning tanga sasuk ka kane a kadapmang karesi fam u titi wara'ning sasuk guksa' ira antam. Ning tanga ami'ning aming soldia wari suguk wari mo' idefi waraga' bapmasi' tasase tangkunasi ka siot kapa urang ipmating ningda'ning wa indi napa' tangkunasi ka Anutuga' naktangka titi a kabakni' ka kuyane fam ga' siamo' naknga yotangkayap titi wara'ning u tanga ikantam. Ning tanga soldia wari kisi' mungkup tangkunasi ain urang ipma saseting ningda'ning wa indi sasuk tangkunang ka inga' girii wari yotangkayabinga kareng gi' giri iik wara'ning wara'guk ningsa' ikantam. Ning tinga kadagang wari indifikadaga kabi'guk mo' tota'. 9Beng sini' kuyane Anutu wari indifikasira tugu' wa adi indi adining kaba kagaya wara'ning kagaya bimbem waraga' mo' sura indifikasiregu', mokngang, adi girini' Kasira Aming Jisas ning kane ganangsa' wa yotangkanip tinga kareng gi' giri iik waraga'sa' sura indifikasirinagu'. 10Jisas adi inga' indi adigok ka ningsa' iik waraga' sura kumogu', wara' adi tubobu abo'ganang wa indi adita' naktangka tanga ka' ko iik wa ma kuma' kungkumak undu' adigok ka' ningsa' kuma' marara iknam. 11Ka kuyane sidi midi ka waraga' sura ning tanga kadapmang kareng ka sidasa' kabaksi' kura' tiptangkangam ka u tanga iking wa mo' kabinting, mokngang, sidi tangkunang ningsa' surotangkanga tanga ira anting.

Pol ning midi ari'

12Ka kuyane indi midi kigineng nua'bu ning sangtam, naktangka aming girisi ka girii wari sidi yotangkasap waraga' ipminga kane girii ka kadapmang didimeng yaranga iik waraga' fasanggeking wara'sining kapmik ganangsa' ikanting. 13Ning tanga sidi adisining kane ka sidi yotangkasap ga' titing waraga' sura adisita' siamo' naknga adisining midi u nakiam sa' tinting. Ning tanga naktangka aming dabiksa' sidi kabaksi' kubaniksa' kufara ikanting.

14Abanga midi nua'ni ka ning sangtam, naktangka aming kuyase fam ka kane titiga' baratarak da' titing wa adisining kadapmang u tipdidima waraga' midi fam ina ifididima tinting. A aming ka sasuksi' tangkunang guk mokngang mutu titisi wa midi kareng ina ifitangka tinga mutu u kabinting. A aming ka naktangkasi' tangkunang guk mokngang undu' adisining kabaksi' ifitangkanga yotangkayap tinting. Ning tanga kuyasi' ka ni wari kadapmang didimeng ning bang fam u fe' kabi' tinga wa sidi kusubang gi'sa' ira yanggekanting.

15A napa' girii nua'ni ka undu' ning sangtam, aming wari kadagang saramikinga wa sidi kura'bu guk mo' tiamting, mokngang, sidi fikifiki sasuk ka naktangka aming kuyase ning bining ganang a aming fam dabiksa' wara'siga' kadapmang karengsa' tiam waraga'sa' suktangkanga ira tinting.

16Ning tanga sidi fikifiki kabaksi' karengsa' naknga ararangengsa' ikanting. 17Ning tanga Anutuga' ibang fikifiki tonting. 18Abanga nasi' nasi' kareng a mamareng ka sidining iiksi'ganang kadofisamita' waraga' undu' Anutuga' asekna ning aninga mesisiringa sa' tinting. Kadapmang kareng ka ningwara' wa Anutu wari Kasira Aming Jisas ning naktangka aming sidi titiga' nakita'.

19Ning tanga sidi kadapmang kareng titi wara'ning sasuk ning ki ka Anutuning mini unggo wari kabaksi'ganang tipkadofisamita' u mo' usugumakanting. 20Abanga sidi Anutuning midi karesi ka aming fam wari tokadofisamiting waraga' wa sidi a midi ka wa kamaganangnisa' nakem ning tonga waraga' bibi' mo' nakanting, mokngang. 21Sidi midi a napa'napa' wa kafakafa yapdidimanga ning tanga karesi yapma wa surotangka ning tinting. 22Ning tanga midi a kadapmang ka kadagasi ning yapma wa wadigi' sini' ibinting.

23Ka na sidita' sura Anutu girii ka kaba kugurang nimita' wara'ning waraga' ibang fatorik. Anutu ka wari sidining kadapmang kareng a iiksi' u didimeng kareng kuni' nua'ni sini' tipkadofisaminga titi waraga' fatorik. Ning tanga sasuksi' a urisi' a fuksi' dabiksa' wari kadagang ni guk mokngang fafandangeng kareng ningsa' ira anganga inga' girini' Kasira Aming Jisas wari tubobu abo'ganang wa karesi ningsa' sabo'. 24Beng sini' Anutu adi indi didimengsa' iikga' sura katininita'. Ka adi sasuk ka tim titi u kabinga inga' nua'bu tipkadofi ning guk mo' sini' tita', wara' adi sasuk ka adi kuma' tanga katisanggu' wa unggungsa' yaranga tasaminga karengsa' ira anting.

25O kuyane sidi indita' sura Anutu wari indi yotangkanip ga' ibang undu' tonimting.

26Ning tanga sidi indi sidita' kabakni' kareng nakem waraga' sura sidindu' kabaksi' karengsa' naknga naktangka aming sidasa' kafasi' kura' wengam tanga midi kareng kura' aning tanga yaranting.

27Pol naga girii Jisas ning wap ganang midi tangkunang ning sanotik, sidi umpang ka i yoksamem i bema indangira ning tanga kuyase fam ga' undu' indangikiama yareinga dabiksa' naksasu'nanga ikanting.

28Indining girini' Kasira Aming Jisas wari adining ai'dap girii u kabisaminga kugurang kareng gi'sa' ikanting, beng.

Currently Selected:

1 TESALONAIKA 5: uvh

Highlight

Copy

Compare