Matthieu 7
7
Swran wun nde kanle
(Luc 6:37-38, 41-42)
1Nanh an bu swran fo man Nyanmien bu amun fo. Fo kunngba nga an fa bu swran'n, ye Nyanmien wa fa bu amuon, 2ye liké kwlaa nga an sé ke, se swran yôo o ti kpa'n, i kunngba so'n ye Nyanmien wa sé amun ke an yôo. 3?O yô se ye a wun wla'n b'o ô o niaan i nyin su'n sannge a wu'an dyanvle'n b'o ô o bobo o nyinma su nion? 4?O yô se ye a sé o niaan ke: Dyran man n yi o nyin su wla'n, sannge dyanvle ô o bobo o nyin su nion? 5Dunman klôfue, yi dyanvle'n b'o ô o nyin su'n ka, nan a wun asé a yi o niaan'n i nyin su wla'n.
6Nanh an fa ninngé ng'o ti Nyanmien lie'n man alua mun, ye nanh an fa amun nennglenman'n gua kokoti'm bé bô, man bé tiatia bé su, bé kpe bé nyin amun su, bé to amun su.
Anh sre, anh kunnde, anh bôbô anuan
(Luc 11:9-13; 6:31)
7Anh sre, béh fah man amun, anh kunnde, amunh nyenh, anh bôbô, béh tikéh amun anuan. 8Afin swran kwlaa ng'o sre liké'n, bé men, swran ng'o kunnde liké'n, o nyen, ye swran ng'o bôbô anuan'n, bé tiké. 9?Amun nun ônin ye se i wa sé i ke o men i kpaun'n, o fa yebue men io? 10?Annze se o sé i ke o men i kpatra'n o fa wuô men io? 11Se amun bo an ti te'n, an fa liké kpa tye amun mma mun'n, wuun amun Si b'o ô nyanmien su lo'n i kusu oh fah liké kpa man bé nga bé sre i'n kpe blu.
12Liké kwlaa nga an klô ke swran yô man amun'n, anh yô i kunngba so'n man bé, i ye o ti Moïse mmla nin Nyanmien nuan idyofue'm bé nde nion.
Anuan fii'n
(Luc 13:24)
13Anh sin anuan fii'n nun, afin se bé sin anuan tetre'n nun'n, bé kpen atin dan'n bo i awiélie ti nyrennen'n nun, ye bé nga bé fa su'n, bé sonnin. 14Sannge anuan nin atin nga bé sin nun bé nyan nguan'n bé ti kaan, ye bé nga bé kunnde bé wuin'n, ba sonman.
Waka kun nin i mma
(Luc 6:43-44)
15Anh sasa amun wun bé nga bé ton bé wun suen ke bé ti Nyanmien nuan idyofue'n bé lika. Bé fa bua kplô wla bé wun, bé ba amun wun, sannge bé ti gbôklô bé satyi nnen mun. 16Bé nzuen'n ye amunh fah si béo. ?Bé kô ti lômin, lôlô su? ?Bé kô ti blofue aloma aintonman su? 17I kunngba nion, waka kpa kwlaa su mma kpakpa, sannge waka b'o ti'a kpa'n kusu o su'a mma kpakpa. 18Waka kpa'n kwla su'a mma tete, ye waka b'o ti'a kpa'n kwla su'a mma kpakpa. 19Waka kwlaa b'o su'a mma kpa'n bé kpe yii sin nun. 20I so'n ti, bé nzuen'n ye amunh fah si béo.
N si'a amun mlonmlon
(Luc 13:25-27)
21Nanh swran kwlaa nga bé fle min bé Min'n bé ngba ye béh yôh men nga Nyanmien sié'n i nunfueo, san swran ng'o yô min Si b'o ô nyanmien su lo'n i klun sa'n, i ye oh yôh men so'n nunfueo. 22Tyen so'n nun swran kpanngban kpa bé wa usa n ke: ?Nannan, Nannan, o dunman nun ya ka'an Nyanmien nde? ?O dunman nun ya fua'an asie usu? ?Ye o dunman nun ya yô'a sa kéklééklé mun? 23Ye nh séh bé ke: Amun bo an satyi mmla'n, anh fa dyaô min wun le. N si'a amun mlonmlon.
Sua kplanfue nnyon
(Luc 6:47-49)
24I so'n ti, swran kwlaa ng'o tié nde nga n ken ye'n, nan o fa su'n, o ti ke ngwlelefue b'o kpleen i sua yebue su'n sa. 25Nzué'n toli, o yii lika'n, ye aunngban'n fitaa sua so'n, sannge wa buman, yele ke bé kpleen yebue su. 26Sannge swran ng'o tié nde nga n ken ye'n b'o fa'a su'n, o ti ke sinnglinfue b'o kpleen i sua'n aunnyan'n nun'n sa. 27Nzué'n toli, o yii lika'n, ye aunngban'n fitaa sua so'n, nan wa bu mlonmlonmlonmlon.
Jésus i atin b'o le'n
(Marc 1:22)
28Ke Jésus kan nde so'n kléé swran mun wiéli'n, fo so'n b'o tuu bé'n o bôô bé nuan, 29afin fo wafa ng'o fa tu bé'n nin bé mmla kléfue'm bé lie'n ti'a kun, yele ke i le'n klé ke o le sin dyranfue.
Currently Selected:
Matthieu 7: BLNT74
Highlight
Share
Copy
Want to have your highlights saved across all your devices? Sign up or sign in
Baoulé New Testament © Alliance Biblique Universelle, 1974.