नियायीमन 17
17
मीका के मूरती-पूजा करई
1एपरैम के पहाड़ी इलाका म मीका नांव के एक मनखे रिहिस। 2एक दिन ओह अपन दाई ले कहिस, “जऊन गियारह सौ सेकेल#17:2 करीब-करीब 13 किलोग्राम चांदी तोर से ले लिये गे रिहिस, जेकर बारे तेंह मोर सुनत म सराप देय रहय—ओ चांदी ह मोर करा हवय; मेंह ओला लेय रहेंव।”
तब ओकर दाई ह कहिस, “हे मोर बेटा, यहोवा ह तोला आसीस देवय!”
3जब ओह ओ गियारह सौ सेकेल चांदी अपन दाई ला लहुंटा दीस, त ओकर दाई ह कहिस, “मेंह गंभीरता से अपन चांदी ला मोर बेटा बर यहोवा ला अरपन करत हंव ताकि एक मूरती बनाय जावय अऊ ओकर ऊपर चांदी के परत लगाय जावय। एकरसेति मेंह ये चांदी तोला वापिस देवत हंव।”
4जब ओह अपन दाई ला ओ चांदी लहुंटा दीस, त ओकर दाई ह दू सौ सेकेल#17:4 करीब-करीब 2.3 किलोग्राम चांदी लीस अऊ ओला एक सुनार ला दे दीस, जऊन ह ओकर उपयोग एक मूरती बनाय म करिस। अऊ ओ मूरती ला मीका के घर म रखे गीस।
5ये मनखे मीका करा एक ठन देव-स्थल रिहिस, अऊ ओह एक एपोद अऊ कुछू घर-देवता बनाईस अऊ अपन एक बेटा ला संस्कार करके अपन पुरोहित ठहिरा लीस। 6ओ समय म इसरायलीमन के कोनो राजा नइं रिहिस; जेला जइसने ठीक लगय, ओह वइसने करय।
7यहूदा के बैतलहम नगर म एक जवान लेवी यहूदा गोत्र के मनखेमन के बीच रहत रिहिस; 8ओह बैतलहम नगर ला छोंड़के कहीं अऊ रहे बर आने जगह के खोज म निकलिस। रेंगत-रेंगत ओह एपरैम के पहाड़ी देस म मीका के घर म हबरिस।
9मीका ह ओकर ले पुछिस, “तेंह कहां ले आवत हस?”
ओह जबाब दीस, “मेंह यहूदा के बैतलहम ले आय हंव अऊ एक लेवी अंव, अऊ मेंह एक जगह के खोज म हवंव, जिहां में रह सकंव।”
10तब मीका ह ओ लेवी ला कहिस, “मोर संग म रह अऊ मोर ददा अऊ मोर पुरोहित बन जा। मेंह तोला हर साल चांदी के दस सेकेल#17:10 करीब-करीब 115 ग्राम, तोर कपड़ा अऊ तोर जेवन दूहूं।” 11लेवी ह ओकर संग रहे बर तियार हो गीस, अऊ ओ जवान ह ओकर एक बेटा के सहीं हो गीस। 12तब मीका ह ओ लेवी के संस्कार करिस, अऊ ओ जवान ह ओकर पुरोहित बन गीस अऊ ओकर घर म रहन लगिस। 13अऊ मीका ह अपनआप ला कहिस, “अब मेंह जानत हंव कि यहोवा ह मोर भलई करही, काबरकि ये लेवी ह मोर पुरोहित बन गे हवय।”
Currently Selected:
नियायीमन 17: एस सी ए
Highlight
Share
Copy
Want to have your highlights saved across all your devices? Sign up or sign in
पबितर बाईबल, समकालीन छत्तीसगढ़ी अनुवाद™ एस सी ए™
कापीराईट © 2012, 2016, 2021, 2024 Biblica, Inc.
Biblica, Inc. के अनुमति के दुवारा उपयोग। पूरा संसार म जम्मो अधिकार सुरछित।
Holy Bible, Chhattisgarhi Contemporary Version™ SCA™
Copyright © 2012, 2016, 2021, 2024 by Biblica, Inc.
Used by permission of Biblica, Inc. All rights reserved worldwide.
