UJoshuwa Isingeniso

Isingeniso

Incwadi kaJoshuwa leyaBahluleli zikhuluma ngodaba lweminyaka yokusungulwa kwesizwe sako-Israyeli. Izincwadi lezi zichaza ukunqoba lokuthumba kwabo ilizwe laseKhenani lokutshikatshika kwabo ekugcineni isivumelwano sabo loNkulunkulu wabo. Udaba lweBhayibhili lapha luphothuluka lusiya esigabeni esiqakathekileyo lapho abantu bakaNkulunkulu beselizweni likaNkulunkulu. Lanxa kunjalo, kubasobala ukuthi indlela yokubuyisana koluntu loNkulunkulu izakuba nzima.

Udaba luchaza amalungiselelo lezimpi zokuhlasela kwabako-Israyeli kanye lendlela izizwe zako-Israyeli ezazilehlukaniselane ngayo. Njengoba imvukela yala ikhona, uJoshuwa enkulumeni yakhe yokucina ukhuthaza ukuthi isizwe ngesizwe sithathe ngokupheleleyo isabelo selizwe esiqondene laso. Uqhubeka ngokuthungamela abantu ukuthi bavuselele ukuzinikela kwabo ekugcineni isivumelwano sabo loNkulunkulu.

Incwadi yakhe (uJoshuwa) yaBahluleli ikhuluma ngokungalaleli lokuhlamuka kwabako-Israyeli ekwephuleni isivumelwano, bethunjwa ngezinye izizwe lokukhala kwabo kuNkulunkulu bedinga usizo. Kodwa ukusizakala kwabo ngokwesikhatshana nje, ngoba basuka babuyele ebubini babo njalo. (“Abahluleli” balinxusa lamabutho kanye labaphathi bomthetho.)

Njengoba u-Israyeli wayebunjwe ngezizwe ezilitshumi lambili, lencwadi le isitshela ngabahluleli abalitshumi lambili. Kodwa njengoba abako-Israyeli beqhubeka ngezindlela zabo ezimbi sithola ukuthi sebedele Inkosi loMahluli wabo oqotho. Ngokwanda kobubi lobudlwangudlwangu kusuka kubaluleke ukuthi abako-Israyeli bayayidinga inkosi. Emaphethelweni kuvela imibuzo ethi: Kambe abako-Israyeli bangakuveza ukubizwa kwabo ngokuthi bayisibane sikaNkulunkulu ezizweni? Ngubani ongabusa u-Israyeli abancedise ekuvezeni umlandu wakhe kuloludaba lokusindiswa komhlaba?

Currently Selected:

UJoshuwa Isingeniso: BEN

Highlight

Copy

Compare

UJoshuwa Isingeniso

Popular Bible Verses from
UJoshuwa Isingeniso

Bible:

isiNdebele (Zimbabwe)

Version: IBhayibhili Elingcwele LesiNdebele - BEN