UJobe 23
23
UJobe Uyaphendula
1Waphendula uJobe wathi:
2“Lalamuhla ukusola kwami kulokhu kubuhlungu kabi,
isandla sakhe siyasinda loba ngibubula kangaka.
3Ngabe ngiyakwazi lapho engingamfumana khona;
aluba nje bengingaya emzini wakhe!
4Bengizayibeka kuhle indaba yami phambi kwakhe
ngigcwalise umlomo wami ngamazwi empikiswano.
5Bengizakuzwa ukuthi yena uphendula athini,
ngikuhlolisise lokho akutshoyo.
6Kambe angangiphikisa ngamandla na?
Hatshi, angazake angethese cala.
7Lapho umuntu oqotho ubengendlala indaba yakhe phambi kwakhe,
njalo bengizakhululwa lanini kumahluleli wami.
8Kodwa nxa ngisiya empumalanga, yena kakho khona;
nxa ngisiya entshonalanga, kangimfumani khona.
9Nxa esemsebenzini enyakatho,
kangimboni;
angaphendukela eningizimu,
kangiboni lokuthi tshazi kwakhe.
10Kodwa uyayazi indlela engihamba ngayo;
nxa esengilingile, ngizaphuma senginjengegolide.
11Inyawo zami bezilokhu zilandelana lezinyathelo zakhe;
ngalela endleleni yakhe angaze ngaphambuka.
12Angigudlukanga emilayweni yezindebe zakhe;
ngiwenze igugu amazwi omlomo wakhe
ukwedlula isinkwa sami sansukuzonke.
13Kodwa uzimele yedwa, ngubani ongaphikisana laye na?
Uyenza loba yini ayifunayo.
14Uyagcwalisa isimiso sakhe ngami,
njalo manengi amacebo anjalo awagcinileyo.
15Yikho-nje ngithuthumela ukuma phambi kwakhe;
ngithi ngingakukhumbula konke lokhu ngimesabe.
16UNkulunkulu usenze inhliziyo yami yaphela amandla;
uSomandla usengethusile.
17Kodwa kawuyikungithulisa umnyama lo,
umnyama lo onzima ovala ubuso bami.”
Currently Selected:
UJobe 23: BEN
Highlight
Share
Compare
Copy
Want to have your highlights saved across all your devices? Sign up or sign in
IBhayibhili Elingcwele LesiNdebele™ BEN™
© 2003, 2006, 2022 Biblica, Inc.
Lisetshenziswe ngokusemthethweni. Wonke amalungelo agodliwe emhlabeni jikelele.
Ndebele Contemporary Bible™ BEN™
Copyright © 2003, 2006, 2022 by Biblica, Inc.
Used with permission. All rights reserved worldwide.
