UmTshumayeli 12
12
1Khumbula uMdali wakho
ngezinsuku zobutsha bakho,
kungakafiki insuku zokuhlupheka
njalo kusondele leminyaka
lapho ozakuthi,
“Angizuzi kuthokoza kuyo”
2andubana ilanga lokukhanya
kanye lenyanga lezinkanyezi kufiphale,
lamayezi achitheke
ngemva kwezulu;
3lapho abalindi bendlu
bezathuthumela,
amadoda aqinileyo akhokhobe,
labacholi batshiye umsebenzi
ngoba sebebalutshwana,
kuthi labalunguzayo ngamawindi
sebebona lufifi;
4lapho iminyango ephumela emigwaqweni isivaliwe
lomsindo wokuchola usufiphala;
lapho abantu besethuswa yikukhala kwenyoni,
lezingoma zazo zincipha;
5lapho abantu sebesesaba izindawo eziphakemeyo
lezingozi emigwaqweni;
lapho isihlahla se-alimondi sesiqhakaza
lentethe isihamba ngokuzihudula nje
njalo kungasekho ukulangazelela.
Lapho-ke umuntu usesiya ekhaya lakhe
laphakade njalo abalilayo
bagcwale emigwaqweni.
6Mkhumbule intambo yesiliva ingakaqamuki,
kumbe umganu wegolide ungakabhidlizwa;
lodiwo lungakahlikizwa emthonjeni,
loba ivili lephulwe emgodini wamanzi,
7kuthi umhlabathi ubuyele emhlabathini
lapho owavela khona,
lomphefumulo ubuyele kuNkulunkulu
onguye owawuphayo.
8“Ize! Ize!” kutsho uMtshumayeli,
“Konke kuyize!”
Isiphetho Sendaba
9UMtshumayeli wayehlakaniphile, njalo esabela abantu ulwazi. Wazidla ingqondo wadingisisa wamisa kuhle izaga ezinengi. 10UMtshumayeli wadingisisa ukuze azuze amazwi ayiwonawona, kwathi-ke konke akulobayo kwaqonda njalo kuliqiniso.
11Amazwi abahlakaniphileyo anjengenswazi zokwethusa izimvu, izitsho zabo eziqoqiweyo zinjengezipikili ezibethelwe zatshona, zivela kuMalusi munye. 12Limuka, ndodana yami, loba kuyini okudlula lapho.
Ukulotshwa kwezincwadi ezinengi akulamkhawulo, njalo ukufunda kakhulu kuhlukuluza umzimba.
13Manje-ke konke sekuzwakele;
nansi isiphetho sendaba:
Mesabe uNkulunkulu ugcine imiyalo yakhe,
ngoba lo yiwo wonke umlandu womuntu.
14Ngoba uNkulunkulu uzazahlulela zonke izenzo,
lalokho okufihliweyo
loba kuhle loba kubi.
Currently Selected:
UmTshumayeli 12: BEN
Highlight
Copy
Compare
Share
Want to have your highlights saved across all your devices? Sign up or sign in
IBhayibhili Elingcwele LesiNdebele™ BEN™
© 2003, 2006, 2022 Biblica, Inc.
Lisetshenziswe ngokusemthethweni. Wonke amalungelo agodliwe emhlabeni jikelele.
Ndebele Contemporary Bible™ BEN™
Copyright © 2003, 2006, 2022 by Biblica, Inc.
Used with permission. All rights reserved worldwide.
