Matta 27
27
Owo Wada Nwo Wu-Wuyi
1N Labmiyi a malami dnagmayi vinya ɓedo a Yahudiyi atukoda yi, ɓa yezhi njesun ɓa zhin shaula shi ɓa Ba zhin ɓa wu Yesu. 2Ɓa wo pa, ɓa lo n woi n Bilatus aba nwo nu ɓo zhin gwomna nyi.
3Nsahi, shi Yahuda Iskariyoti, n wonu ɓo kun Yesu nyi, shi wo ɓo gye ge aku efi owa da Yesu, wa shan wo bugba do, wa la agyiwye wa jeze lo amalami dnagmayi ɓedo a Yahudawayi atukoda n cei.
4Wa gna, “Mi ku laifi zhin, ntu ge mi la eza kni-kniyi kun.” Ɓa ci wo ge, “Oho anuwan nu.”
5Wa she agyiwye ya shi aduwa nyakun wa lo wa wohin gyi. 6A malami dnagmayi ɓa la agyiwye ɓa gna, “Yi ta mi ya shi agyiwye ye azhiya m, ntu ge owa kwa gna ge yi ta go agyiwye ami nya m.”
7Ɓa zhin shaula ɓa si ekni, aba n na shakun-miyi ɓo zhin ɓai ka ozun, ɓa ekni ho ze avingo ntu azhiɓei bi ɓo. 8Ce nu zhin ai yi avingo ho ge ekni ami nya.
9Deye ɓo zhin dei-dei ngye shi anabi, Ilimiya ɓo da ge, “Ɓa ku azurfa shita agyiwye nu a Israila yi ɓo tu wo. 10Ɓa si ekni n ashaku-miyi ngye shi Dagayi ɓo wu mi.”
11Nsahi Yesu woi gni n Bilatus abye, a Roma yi gwomna, wa nya wo ge, Ho nu zhin a Yahudawayi Masihu? Yesu wa ye ge, “E”.
12Ama esa a malami dnagmayi ɓedo a Yahudawayi abye-dai ɓo da ɓeda nukoyi tu n Yesu tukwo, to Yesu wa dna ɓe gbe m.
13Bilatus wa ci wo ge, Ho ta wo ɓo lo n ɓa da tu nho tukwon?
14To Yesu wa da ɓo m, ce a wo gwomna. 15Ko ɓo zhin gwomna kunnu nu eye doho-doho n paska ʼsa, wa lo eza pa-pai ya ga a Yahudawayi, ezaho-zahoi n ɓa ye. 16Nsaye aɓo n zajeyi wan dna, ai yi wo ge Barabbas. 17Shi aza-yezhi ɓo ku yezhi n Bilatus aduba n labmiyi, wa nya ɓa ge, “Nkanu n fye ye ma lo wo ya ga fye a? Barabbas ko Yesu n wo nu zhin efye Masihu nyi a?” 18Ntu ge wo ɓo ku kpe ge a Yahudawayi atukoda ɓo wan Yesu ntu shewo ɓo nu, ntu ge aza ɓo zhin ɓai ye wo n mwa.
19Esa nu wo ɓo dna n awada ba, Bilatus nyiko wa tnu ga wo ge, “La abwa kun n eza ɓefye-cei ye ɓo mi ku ena ednanya nu nsukoyi n wo yi.”
20Amalami adnagmayi ɓedo a Yahudawayi atukodayi, ɓa fi aza ya ge a lo Barabbas nu ya, a wu Yesu. 21Ntu ce nu, esa gwomna ɓo je ɓo nya ge, dna aza ngun aba ye mi lo nkanu ya? Ɓa ye vinya ge Barabbas nu.
22Bilatus wa nya ɓa ge, mi zhin n wuna n Yesu yi efye Masihu a? Ɓa ye gbo-o ge, a zun wo du.
23Wa nya ge ntu kniɓei a? Wo ku knihi nu zhin a? Ama ɓa ce ɓa gyi abye ge azun wo du, a zun wo du.
24Shi Bilatus ɓo gye wo ta mi lo wa bwa ɓa tukwo shin, njesun wa gye gyikici ɓa laka, wa tnu nuwan ɓo n ebue yi, wa wa bwa na n aza-yezhi abye, woi gna, mi zhin eza knikniyi nu n eza Befye-cei ye ami ɓo. Deye ko zhin efye anuwan nu.
25Aza-yezhi ɓa ye nkalayi ɓa gna ge, Ewo ami ɓa la tu n yi ɓedo n yi aɓi yi.
26Nsa-yi Bilatus wa Barabbas loya. Ama Yesu wa lu wo, wa ga wo n a Romayi a soja akun ntu ge ɓa lo n woi ɓo zun wo du. 27Ɓa la wo ɓa lo n woi n akun kaya nyakun, ɓa yi asoja vinya ɓa yezhi. 28Ɓa kma wo aje ya vinya, ɓa kpe wo eje bye-byei. 29Ɓa zhin alawani aknawuyi nya ɓa kun wo, tukwo, ɓa ga wo busi shi n wo bwaizhe-bwa ɓa yazhi n wo abye ɓai kpe wa gye ɓai gna, Shekwo-mwasa n hoi, Esu a Yahudawayi nya. 30Ɓa kni akni kpe wo, ɓa ge busi ɓa lu wo n cei n tukwo.
31Shi ɓa ɓo ku agye kpe wo, ɓa kma wo eje bye-byei, ɓa kpe wo ewohin eje njesun, ɓa lo n woi ntu ge ɓo zun wo du.
32Shi ɓa ɓei lo aba nɓa ɓo zunwodu, ɓa gye ezado ho wo gmi Sairani n Afirika a yi wo eye ge Siman, ɓa tu wo tile wa la zundu Yesu nya. 33Esa ɓaɓo si aba a yi Golgota, ngye tukwo-bmila. 34Asoja ɓa ga wo nuwan bedo yi, shi wo ɓo towo to wa ye sin ɓo m.
35Shi ɓa ɓo la wo zundu asoja ɓa she zoku ntu ge ɓa gna wo aje ga aje. 36Ɓa ku zhi ɓai shi wo awye tu zundu. 37Ɓa ku rubutu kakpe n wo tukwo she ge, “eza deye yesu nu, a yahudiyi esu” 38Aɓo ku azaje zundu ngun aba n knusun n Yesu yi, eza gmanyi n wo bwakmi eza gmanyi n wobwai-zhe-bwa. 39Azoko wanhi ɓai duya ɓai da ɓeda nukoyi ga wo, ɓai bmiya tukwo ɓai gna. 40Ashe! Ho ɓa mi ha la aduwa nyakun ya ha je ɓa mi njesun dna anyipyei ngun ata? Ho kashi n zundu ye ngye ho zhin Shekwoyi Nugun nu.
41-43 A malami dnagmayi ɓedo na Yahudawayi atukwodayi ɓa kpe wo agye ɓai gna, “Wo ɓo la azado gni, ama wo ta mi lo wa gni wohin! Ashe ho zhin a Israilayi Esu nu? Ho kashi ɓe n zundu, yi ɓa ga ho gaiciya. Wo ɓo la kpema Shekwoyi–akpe Shekwoyi wo gu wo! Wo to ɓo gna ge wo zhin Shekwoyi Nugun nu?”
44Azajei ce ɓa gna wo ɓeda nukoyi. 45Nyipyei atukwo wyegma kwa dna anyi vinya har awa ngun ata. 46Esa n sunkna ngun ata ɓo la si, Yesu wa yi n begye kala yi wa gna, “Eli, Eli Lama sabachthani,” ko wu ge “Emi Shekwoyi, Emi Shekwoyi, knihi nu zhin Ho lami ya?”
47Aza nɓa ɓo zhi ɓo, to ɓakpe ɓeye n wo dam, ɓa zhin nubwo ge wo yi Iliya nu. 48Ezaho nɓa mi wa busi lo wa la soso wa fi nuwan yakayakayi wa fye ko n busi wa ga wo ge wa sin. 49Ama aza je ɓa gna, Fawo, ya gye ngye Iliya ɓa ɓe wa gni wo.
50Yesu wa je ɓo da nkala yi, wa fa wo zafun, wa fi. 51Labule, nko ɓo sa na ɓa gyi-gyi-yi du-duyi n na duwa nyakun nyi, kwa saya tunyi n she har sinta, ekni kwa shan-shan, akuta ɓai ɓaya. 52Avingo ɓai kmiya, a Shekwoyi aza afi-fiyi anugbai na nyikoyi ɓai je wye-wyei bwa. 53N Yesu kalala avun n vingo, ɓa fa avingo ɓa lo fi n Urushelima ɓa wu ɓahin tukwo naza mwaɓegye aba.
54Asoja nɓa ɓo zhi n zundu aba nyi, ɓedo nɓa zajei, ɓa ku vin-vin, shi ɓa ɓo gye ekni shan-shan ɓedo na ɓoi vinya nɓa zhin, ɓa ci ge, “Lale, eza deye ɓo zhin Shekwoyi Nugun nu.”
55Anyikoza nɓa ɓo kun n Galili ɓa kun ɓe n Yesu yi ntu ge ɓa bma wo zhin, ɓa ku zhi n kpai ɓai gye. 56Nɓa mi Maryamu Magadaliya ɓo nyi, ɓedo n Maryamu a Yakub n Yusufu ya yi, ɓedo Yakub n Yohanna ʼya yi, (Zebedi a nugun).
Owo Fi Nwo Bi-Biyi
57N Wyeshei, nyabwai ho, a yi wo eye Yusufu woi gmi n Arimatiya Yesu viyi nu. 58Wa lo Bilatus aba wa nya Yesu nayi ɓo. Bilatus wa ga gbe ge a la ga wo. 59Yusufu wa la wo, wa wo kmi dna na je manayi. 60Wa lo n woi, wa wo bi dna n wohin vingwo n wo ɓei ce nyi dna n Kuta, wa kutado la wa ko gu n cei. 61Maryamu Magadaliya ɓedo n Maryamu do yi ɓaku sase kpe vi-vi ɓai gye.
62Efye a gyi, wato nyipyei n ko ɓo vi paska shiri zhin nya nyi, amalami dnagmayi ɓedo, na Farisiyawa yi ɓa yezhi n Bilatus aba. 63Ɓa gna wo ge, Shekwomwasa, Kata cei ye ɓo gna ge, anyipyei ngun ata avun mi ɓo je wye-wyei bwa. 64Ntu ce nu, yi ye ha ga egbe a gu wo vingwo har nyipyei tayi, kada ewo abara, ɓo gna aza ge wo la lakala n fi, N kwo ze lo nu, ho gye koce-dna kmaknayi ɓo ladu kmisunyi n nukoyi.
65Bilatus wa gna ɓa ge, Fye zhin akma n fye aduwa nyakun a yandoka yi ɓa ɓa mi ɓa gu kwo. 66Sai ɓa lo ɓa hatimi tu n kutayi, ɓa ku a yandoka zhi ɓa gu vingwo.
Currently Selected:
Matta 27: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.