Matta 25
25
Anabari Tu Shekwoyi Ebemi Tukwo
1“Aɓa mi a mwi Ebe ʼShe nya do n nabari aɓi-nyikwoyi nya ngun awo yi, nɓa ɓo ku ɓa apitila, ɓa lo ɓa she gun mula ɓa. 2-4 Nɓa mi, aza ce-cei ɓo nyi ngun atnu, ɓa ku emi fi nɓa apitila, ngun atnu nɓa ɓo ce nyi, ɓa ɓo zhin amama nu to ɓa fi emi m.
5-6 “Shi mula ʼɓa ɓo la zhin kalala, ɓa yazhi ge ɓa sun, har sadu, sanu a ɓei ku ɓa kala ai gna, ‘Mula ɓa ɓe lo! Fye kun ɓe fya zhin wo amaba!’
7-8 “Aɓi-anyikwoyi vinya ɓa kuka, ɓa wan ɓa apitila na. Aza ngun atnu nɓa to ɓo emi yi shi nyin, ɓai ɓa ge ace ga ɓa ntuge, eɓa apitila ta wan ena lo n.
9“Ama eɓa azaje ɓa gna ɓa ge, ɓa lo gniko ɓo si, gye deye ta kun ɓa m.
10“Shi ɓa ɓo ku zo lo, esa fyewyi mulaɓa woi ɓe, aza nɓa ɓo n shiri zhin, Ɓa gni lo fi n awyefan ba, apmi a ba gu.
11“Esa fyewyi aza deyi ngun atnu ɓai jeze ɓe, ɓa ku zhi n gmi ɓai gna ge, a gu ɓa aba ya.
12“Ama wa ye ɓa wa gna, fye lo fye nya fye ku kalala zhin.
13“Ntu ce nu, fye zhi n shiri yi zhin, ntu ge fye takpe nyipyei lo ko esa, nmi ɓa jeze ɓe n cei m.
14“A ba je Ebe Eshe nya do mwi, n nabari ezado ho nya yi, n wo ɓo laka wa lo ekni do, wa yi wo abara zhi vinya wa ga ɓa agyiwye ntu ge ɓa ze abwa woi du.
15“Wa ga zaho ₦5,000, ezado ₦2,000 wa ga eza kmaknayi ₦1,000, wa gaba dei-dei ngye shi wo gye ezaho-zahoi ɓa mi wa zhin sun, wa wan wo zan walo. 16Eza nwo ɓo go ₦5,000 wa ya anya si woi kun, esa fyewyi wa ku gyiba gyi ₦5,000. 17Eza n wo ɓo go ₦2,000 wa ya gnikogni wohin ce wa ku gyiba gyi har ₦2,000. 18Ama eza n wo ɓo go naira ₦1,000 nyi wa lo wa bwokun nyi wa agyiwye ho sodna.
19“Shi esa ɓo la mwa, eɓa puwa da wa zhi, wa yi ɓa ge wa wo lafiya enya nɓa zhin nwo agyiwye yi. 20Eza n wo ɓo go ₦5,000 nyi, wa ɓe wo n ₦10,000.
21“Ewo puwa da wa ci wo ntu tnu-tnu manayi ɓo. Wa gna wo ge, Ho ku gaiciya zhin tu na gyi wye ɓi-ɓiye, ntu ce nu nɓa tnu-tnu ɓe ho. Dagma ngnisun nho puwa dai.
22“Eza nwo ɓo go ₦2,000 wa ɓe wa gna, ho ɓo gami ₦2,000 mi ku gyiba gyi njesun lo nu.
23“Ewo puwa da wa gna wo ge a bmiya lo. Ho zhin bara manayi nu n gaiciya da yi. Ho ku gaiciya zhin dna agyiwye ɓi-ɓiye nɓa ɓe ho.
24-25 “Eza n wo ɓo go ₦1,000 wa ɓe wa gna, Shekwo mwasa, mi kpe lo ge ho zhin eza kalada nu, ma wo dna ge ho ɓo la nyaʼgo mi n ma bwa, ntu cenu ma obwo nyi ma agyiwye yi sodna, a hoi shi nyi.
26“Ama ewo puwada wa gna wo ge, ‘Eza nukoyi, fyenu bwatoyi! Shi ho ʼbo kpe ge nɓo ye gyiba. 27Ho ɓo ba lo n mi agyiwyei ho la yadna n banki, mi la gyiba bwa. 28Fye la agyiwye go n wo, fya ga eza n wo ₦10,000 shi nyi. 29Ntu ge eza n wa zhin ampanyi n nya yi n na gawo nyi a ɓa ɓe wo, wa bwa n mwa. Ama eza n wo to zhin gaiciyan, ko enya n wo cei shi fyewyi, a ɓa go wo. 30Fye la bara banza nya ye fya she yadna n wyegma: n bwai nu aɓo ci bwi ai gyi anyikna.’
31“Esa Emi, Masihu ɓa ɓe dna nmi latu, n mi amalaika yi, nɓo sase tu n Shinkpe-gye latu nya. 32Abye vinya ɓo la yezhi n mi abye. Nɓo gna aza ajeya, ngye shi kniknayi zhin wa gna akniya n abuiyi nyi. 33A kni ɓo lo emi bwaizhe, a bui n bwakmi.
34“Emihin Esu mi ɓo gna aza nɓa zhi nmi bwaizhe ge, Fye ɓe anabarka da emi Dada nya, fya lo ebe mi na ɓo zhin shiri ntu fye ɓo tunyi to ai zhin anyi nyi m. 35Ntu ge mikun ɓo gunmi, fya gami nyagyi; Nuwan mikun yi womi, fya ga mi nuwan; esa mi ɓo zhin zhiɓei fya mi go dna n fye puwa. 36Mi gni n bwotoloyi, fya ga mi aje; mi nyasan yi, mi dna n kurkuku fya ɓe mi aba.
37“Aɓefyece zhin yi, ɓei nya ge, Shekwo-mwasa, yi ɓo gye ho n na n mikun yi ya ga ho nyagyi a? Ko n nuwan mikun yi ya ga ho sin-sin yiʼa? 38Ko n zhin zhiɓeyi ya bma ho zhin a? Ko n bwotoloyi ya ga ho eje a? 39Yi shin ho gye nkni esa yi nu, n nyasan yi ko n kurkuku ya lo ho gnaɓi a?
40“Emi, Esu nɓo gna ɓage, esa nu fye ɓo zhin mi azaje n cei lo nyi, fye ɓo zhin mi nu. 41Ma ɓo pmi ma gna aza, nɓa zhi nmi bwaikmi nyi, Fye la ku mi ka, aza aknituyi, fya lo ena a ɓo zhin shiri ntu Shetan ɓo ɓedo nwo amalaika yi nyi. 42Ntu ge mikun ɓo gun mi, to fya ga mi nyagyi m, ko nuwan ma to fya ga mi ge mi sin. 43Mi zhin zhiɓeyi, to fya ye ge fya go mi dna n fye puwan; mi gni n bwotoloyi to fya ga mi ajem, mi n nyasan yi, mi dna n kurkuku to fya ɓe mi gnaɓi m. 44Ɓa ɓo gna, Dagayi, yi ɓo gye ho nkni esa yi n mikun yi, ko n nuwan mikun yi ko zhin zhiɓeyi, ko nbwotoloyi ko n dna n kurkuku to ya bma ho zhin ma?
45“Nɓo gna ɓa ge, esa n fye to ɓo ye fya zhin emi azaje nyin, emi nu n fye to ɓo bmazhin m.
46“Ɓa ɓolo tata nyalo-nyalo nya aba, ama aɓefyeceyi ɓolo wye-wyei nyalo-nyalo nya nu.”
Currently Selected:
Matta 25: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.