Luka 2
2
Shi Aɓei Ma Yesu
1Nsayi kwa Kaisar Agustus wa ga wyidna ge a ba aza vinya. Kaisar ɓei zhin esu nu n Roma 2Aza ba ye nu ɓei zhin kmisunyi sanu Kirinius ɓei gyibe n Siria nyi.
3Ko ɓei zhin dole nu zaho-zahoyi wa lo ewo ayi ntu ge woi ga owo ye. 4Yusufu kwa walo Baitalami. Wo ɓei lo ntu ge Dawuda zhi nu n sapai. Yusufu kwa wo ɓei zhin Dawuda awyi nu. Wa laka n Nazarat Galili nya. 5Ɓa gnilo n Maryamu yi, Yusufu ɓei zhin Maryamu Nugunyi nu. Amma nsayi Maryamu ɓei gni n nuboyi.
6Sanu ɓaɓei fi n Baitalami, esa Maryamu nu n wo ɓa ma eɓi. 7Wa ma eɓi nugbayi, owo ɓi kmisunyi. Wa kmi wo dna n bargo wa yawo dna n aba n ɓafi aburutu nyagyi nyi. Gama ɓa to ɓei bwa nyakun n azhiɓeyi puwa m.
8Nsukoyi azaho ɓei zhi n zhabui ɓai kna akni. 9Sai malaika wa bayana gaɓa to ɓai pa ce m. Aba bmiya ʼnaya wai-wai n Shekwoyi mwa-mwayi. Har edna kwa woɓa sosai. 10Amma malaika ciɓa ge, “Fye to wo edna m, gama ma ɓe fye n nabari manayi nu, n ato shin ko wo m. Ko zhin zaho-zahoi nya nu.
11“Gama n naiye ala anyi gyiyi ma n Baitalami. 12Nfya lo fye ɓa gye oɓi kmidna n bargo n woi ya dna n aba nɓa zhin ɓa ga aburutu nyagyi nyi.”
13Nsayi kwa amalaika do ɓa kun n She ɓa yeɓedo n deyi ɓei ci Shekwoyi.
14Ɓa ko anyi ge, “Aga Shekwoyi mwa-mwa n She, Bugba fu kwa ku ɓe aza ɓa n ɓa da Shekwoyi nyi.”
15Sanu amalaika ye ɓei la jeze lo she aknikna yi ɓa cige, “Ko kamata lo ya lo Baitalami yi gye eɓo manayi ye n Shekwoyi ku wu yi nyi.”
16Ɓa kukala ɓa lo zhimi, ɓa lo ɓa gye Yusufu n Maryamu yi. Ɓa gye eɓi dna she aɓei gnaɓa n wu nyi. 17Akniknayi ɓa gna zaho-zahoyi laɓa enya ko ku zhin, njesun nya amalaika gna ɓa. 18Ezaho-zaho vinya n wo ɓei wo ɓedaye ca wo-wo. 19Amma Maryamu wa ku aɓeye sofi n bugba woi zhin ɓa nubo nsasai.
20Nsayi aknikna yi ɓa jezelo zhabui ɓai ga Shekwoyi mwa-mwa ntu amalaika ɓo n ɓa ɓei ɓe nyi. Ntu ge ɓa ɓei ku gye eɓi shi malaika-ɓei gnaɓa nyi. 21She anyipyeyi ɓo ku nu n gun nyimwa-nyimwa, alo n ɓi ntu ge a zhin wo kaciya. A tuwoye ge Yesu shi malaika ɓei da nyi.
22She esa ɓei laɓe ntu ge Maryamu wa ze wohin gyi-gyi-yi she Musa wyidna ɓei da nyi, ɓalo n Yesu yi n Urushelima ntu ge ɓo dnawo n Shekwoyi akun. 23Gama Shekwoyi ɓei gna Musa n doka ge, “N nyikoza maɓi kmisunyi, zanugbayi, woɓa ze Shekwoyi nya.”
24Nsayi kwa Maryamu wa ɓe n sadaka yi ntu wohin gyi-gyi ɓo, ɓa ga alukpe ngnu aba ko kwa a tatam-bare a ɓi-ɓiyi. 25Nwyihi kwa ozaho ai yi wo ge Simon n dna n Urushelima wa ɓe aduwa nyakun. Wo ɓei zhin oza manayi nu, woi wo Shekwoyi dna n nu-nuyi n zafun yi woi pmi Yesu ɓeɓe dna anyi. 26Gama Zafun gyi-gyi-yi ɓei ku wu wo nge wo ta fi m, sai wo la gye oza n Shekwoyi ɓa tnu n woi. 27Zafun Gyi-gyi-yi wa zhin wo ntu ge wa lo aduwa nyakun n wyihi. Sanu n Maryamu ɓedo n Yusufu yi ɓei ɓe ntu ge ɓa ga Shekwoyi eɓi ntuge ɓa nu Musa wyidna. 28Simon ɓo dna. Wa la eɓiyi shi wa zhin Shekwoyi godiya.
29-31 Wa cige, “Dagayi, fami ma fi n saiye, gama hoku oho alkawali Inu. Mi la oza gye n wo ɓa gni aza vinya nɓa laifi nyi. 32Owo nu zhin buzangna n wo ɓa wu aza nɓa to kpeho ye m. Owo nu ɓa ɓe n daraja yi n ho aza Israila aba.”
33Yusufu n Maryamu yi kwa, cei wo ɓa, she Simon ɓei gni woi da aɓoye pya n Yesu tukwo.
34-35 Simon wa tu ɓa anabarka, amma wa ci Maryamu ge, ebeyakwo ɓa fin ho n bugba, gama aza n mwa begye n Israila taye eɓi ye m. Amma oɓa nuwan nu. Amma aza n mwa ɓa bwa agmada n wo aba njesun, wo ɓa kun azaho ɓemwi bmi.
36-37 Anabi nyikwozada, ai yiwo ge Anna, ɓei je dna n aduwa nyakun n wyihi. Wo ɓei zhin Fanuel nyigun nu. Fanuel kwa ɓei zhin Asher bye nu. Anna ɓei la kwo, gama wo ɓei zhin nyigbayi nu har aye Shinyimwa-nyimwa cei-anyi. Anna ɓei senu aye ngun tnaba nu kawai. To woi gmi n aduwa nyakun m, amma woi dna ɓa sukwo n nyipyeyi, woi zhin aduwa ga Shekwoyi.
38Wa ɓe sanu Simon ɓei gni wo daɓo n Maryamu ɓedo n Yusufu yi. Owohin ce wa ga Shekwoyi mwa-mwa, har wa gna azaje laɓa n Urushelima n ɓa ɓei kmi Kiristi ɓeɓe nyi, woi cige Masifu laɓe.
Ɓa Jeze Lo Nazarati
39She ɓa ɓei ku zo n ɓoho-ɓohoyi vinya n wyidna da, ɓa kuka ɓa lo Nazarat n Galili kni. 40Nɓonu n Yesu ɓei mwa, wa bwa ɓeyekpe n du wohin kala. Shekwoyi kwa, wa tuwo anabarka.
41-42 Sanu Yesu ɓei bwa aye ngun awo-cei-aba wa lo Urushelima n gnisun nwo azamayi, ntuge ɓo zhin paska, n ɓa ɓei zhin ɓai lo eye-eye nyi. 43Esanu n ɓa ɓei ku zo ɓa jeze lo oɓa yi Nazarat, amma Yesu wa ce dna n Urushelima. Owo azamayi to ɓai kpe m. 44Gama ɓa ɓei gye ge wo dudu nu ngnisun nwo anugundo yi, ɓai gni zan-zan. Amma she wyeshe ɓei she to ɓa gye wo m, ɓa dnawo wye laɓa n azaje aba n a nugundo yi. 45Sanu n ɓa to ɓei gye wo m, ɓa jeze lo Urushelima ntuge ɓo dnawo wye.
46-47 Avun anyipyeyi ngu ata, ɓa gye wo dna n nyakun n gnisun amalami yi ɓai nya wo aɓo n ataurat. Ca wo zaho-zahoi she wa bwa ɓeyekpe ye pya.
48Owo adada n wo ʼya yi kwa ɓa ku jeje. Owo ʼya cige, “Eyi ɓi, kni na zhin hoi zhin yi lonu a? Ai akuyi ɓe ge yi zan ho zan yi n abaho-bahoi.”
49Yesu wa ciɓa ge, “Kni na zhin fyei zan mi zanyi a? Fye to ɓei kpe ge mi dnalo n aduwa nyakun n omi-dada puwa n?” 50Amma toɓa bwa awyega n nyayi n wo ɓei da nyi m.
51Nsayi wa jezelo Nazarat n ɓai woi vi ɓa ɓo. Owo ya kwa waku aɓoye sofi n wo bugba. 52Yesu kwa wa mwa n nahi ɓedo n ɓeyekpe yi. Shekwoyi ɓedo n azai ɓai ye wo.
Currently Selected:
Luka 2: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.