HEBREOS 1
1
An Dios yucha an isTs'alhi puchiwininta
1Yu ma'anchacha ixjuntachalh an Dios wanaj a'lhuwi jaxa'alalh an yu ta ixjalhila'ts'inaw chi tamj tamjcha ixjaxa'alay yucha an yu ixtalhichiwiniy ixchiwinti Diosi ixjapuxa'alay. 2Yu chaway anicha xati'astan panch'e'ex, yucha an isTs'alhcha kintapuxa'alayan, yu pu'ilhtulh an lakamunulhpa chi yu ma'axta'ni'olh chux an tanlhun. 3Yucha ixmakalip'at an ixta'ayat an Dios, yucha ixtasut an Dios chi yucha sa' lakch'apayaw'ojota chux an tanlhun an laka alhp'asni ixchiwinti.
Akxni kintaxakamaj'anincha kintala'alhink'an, tawilhcha an lakt'iyan tan ch'alhkatnan an Dios tan oxi ixpa'xti tawlhnilh, 4chi palay xa'ayi walh, an angelhnin jantu, mu yucha la'a'ilh la'atam ta'a'ut yu palay oxi, an angelhnin jantu.
An isTs'alh Dios yucha yu ay, an angelhnin palay jantu
5Mu an Dios jantu a'tam junilh xamati angelh:
Uxint'i kinTs'alhk'at'i, kit'ini ikxta'nin jatsukunti.
Chi jantu xamati angelhi kapastakpalh kanawlh:
Kit'in ixPayi ajkuna', chi yucha kints'alhi kajuna'.
6Chi lakatam najun akxni lhimilhcha an la'atamij isTs'alh ani lakamunulhpa:
Ixchuxk'an an ix'angelhnin an Dios ayi katala'ts'ilh.
7La ixchiwinti Dios najun:
Yucha ja'ilhtuyi an ix'angelhnin tacha un,
chi an yu tat'atapatsay tacha lam lam an jikmi ja'ilhtuy.
8An Dios juniy an isTs'alh:
Uxint'i Diosk'at'i amilhich'alhkat ixpujun'alhincha.
Amink'iw yu p'uch'alhk'atnan wa tami k'ap'uxt'a'a'a.
9Uxint'i yucha an yu laj'oxi tanlhuni ach'aniy,
jant'u la'ts'imp'ut'uni an yu jantu laj'oxi tanlhun,
xliyu lhisakxtun an Dios, miDios,
chi palay xta'nini achat an mint'alhtanan jantu.
10Chi nawpalay:
Uxint'i Jamach'alhkat, ixlip'ulhnaj ilht'ucha tan katawilh an lakaat'un.
Chi an lakt'iyan la mimaka ilht'u.
11Yu'uncha katats'an'acho'oya', pero uxint'i k'ats'uk'u'alhiya'a.
Chi chux yu'uncha katalaj'at'ilina tacha la'atam la'ch'it.
12Uxint'i k'ajats'ipsa'a tacha ts'ipskan alhtam la'ch'it
chi k'ajamap'axaya'a tacha mapaxakan la'ch'it.
Pero uxint'i watachacha uxint'i k'a'una'a,
amink'ata jantu a'tam katimin'olh.
13An Dios jantu a'tam junilh xamati angelh tacha junilh an isTs'alh:
Tan oxicha kimpa'xti k'at'a'ulh sta li an yu wa taxkayan ajka'ilhtuyacha li k'ajap'ut'ach'at'acha.
14Mu ixchuxk'an an angelhnin yu'uncha takuwinin yu tat'atapatsay an Dios, yu'uncha jamala'achakanta para li kata'a'tayjulh an yu katata'alhtaxtuya'.
Currently Selected:
HEBREOS 1: tpp
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
