Titi 2
2
Nizya chimanyisyo ichenecho
1Loli awe ubaghiye umanyizyanje ukuyana ni chimanyisyo ichenecho. 2Ubamanyisye abanavuli abachasongo ukuti batakakolwanje, babanje bantu abamahala na bakwilema; babanje bantu abamaka mulwitiko, na balughano, sona na bololo. 3Umwakuyana bulo, bope na bakolo abachasongo, ubamanyisye ukuti babanje ni nkalo iyakuyana na bakolo babo bali nubumi ubuzelu. Batakabanje bantu abiyebo, pamo abazya aba vinyo, loli bamanyisyanje chicho chiza, 4umwakuti bope bamanyisye abakolo abachilindu pakubaghana abalume na bana babo. 5Ubamanyisyanje ukuti babanje bantu abakwilema, na bazelu, sona nukuba bakolo abakusungilila akiza inyumba zyabo, babo bololo, sona bakwivwila abalume, umwakuti nayumo umuntu atakaghasamule amazyu agha Chala.
6Umwakuyana bulo, bope abachilumendo ubakazyanje ukuti bilemaye. 7Muvintu vyosi, awe ubanje we chifwanikizyo icha nkalo inyiza. Bo ukumanyisya, umanyisyanje nu moyo uwanaloli, sona nu muchizi. 8Ineno yako yibanje yanaloli yiyo abantu batangayisusya, umwakuti isoni zibalemaye abalwani bako, bo bapotwa pakuchagha ichibibi chimo ichakuti batunene aswe.
9Abazya babivwilaye abamwene babo nukubahobosya muvintu vyosi. Batakamulayeko, 10pamo ukubibila. Loli akabalilo kosi balanjizyanje ukuti biza, sona basubiliwa, umwakuti muvintu vyosi vivyo bakubomba abantu badebiwanje ni chimanyisyo icha Chala Umupoki witu.
11Pakuti u Chala avumbula ichisa chache ukuti abantu bosi bapokiwe. 12Ichisa ichi chikutumanyisya ukuti tuleke pakuba ni nkalo iyakusita ukumunyila u Chala, sona nukuti tuleke ivinyonywa ivya muchisu ichapasi. Chikutumanyisya sona ukuti tubanje bantu abakwilema, na bagholosu, sona na bakumuchindika u Chala mubumi bwitu ubwa muchisu ichapasi, 13bo tukulindilila nu lusubilo isiku isayiwa lila, isiku lilyo ubuchindamu ubwa Chala umukulu nu Mupoki witu u Yesu Kilisitu#2.13 Chala umukulu…Kilisitu: Pamo U Chala umukulu nu Mupoki witu u Yesu Kilisitu. bukwiza pakuboneka. 14#Mas. 130.8; Ukf. 19.5; Ukk. 4.20, 7.6, 14.2; 1 Pit. 2.9Akiyipa mwene pachifukwa icha sweswe ukuti atusatule ku bubibi bwitu bosi nukuti tubanje bantu bache abazelu, babo balweke pakubomba imbombo inyiza.
15Ivi vyo vintu vivyo ubaghiye umanyisyanje. Lanjizya ubulaghili bwako bosi, bo ukubakazya nukubachemela abantu babo bakukuteghelezya. Atakabepo nayumo umuntu uwakukusula.
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya