Aba Loma 13

Nizya kubivwila abalaghili aba muchisu

1Umuntu wesi abivwilaye abalaghili aba muchisu pakuti umuntu atangaba mulaghili nanti u Chala atamwimikite. Abalaghili bosi babo baliko bakimikiwa nu Chala. 2Polelo umuntu wesi yuyo akususannya na balaghili banaba, akususannya na chicho u Chala akalamula. Sona umuntu wesi yuyo akubomba bunubu akwiza pakwipelela mwene ubulongi. 3Abalaghili batakuboghofya abantu babo bakubomba inyiza, loli abantu babo bakubomba ububibi. Nkimba ukulonda pakuba muntu yuyo atakubanyila abalaghili? Bomba chicho chiza, po bakwiza pakukupala, 4pakuti bo babombi aba Chala, babo bakubalongozya pakubomba inyiza. Loli nanti ukubomba ichibibi, po ubanyilaye pakuti amaka ghabo aghakufundila ghanaloli. 5Pachifukwa ichi mubaghiye pakubivwila abalaghili, kute kokuti mukubunyila ubukali ubwa Chala bwene, awe, loli ni chifukwa icha mabyebye winyu bulo.

6 # Mat. 22.21; Mlko. 12.17; Luk. 20.25 Ichi cho chifukwa mukusonka umusonko, pachifukwa ichakuti abalaghili balabala bakumubombela u Chala, bo bakubomba imbombo yabo. 7Po mumulipile umuntu wesi vivyo vimubaghiye: Nanti gho musonko, musonke; nanti gho musonko uwa katundu, musonke ukatundu; nanti umuchizi pamo amapalo vipeghiwe ku bantu babo vibabaghiye.

Nizya kubombelana

8Mutakabanje ni nkongole nu muntu, loli inkongole yibanje iya lughano. Pakuti umuntu wesi yuyo akumughana uwamwabo, akuzikonka Indaghilo. 9#Ukf. 20.13-15, 17; Ukk. 5.17-19, 21; Lev. 19.18Pakuti pali amalamulo aghakuti, “Utakalowaye, utakaghoghaye, utakibaye, utakanyonywanje” na malamulo ghosi aghanji ghonganite pilamulo lyoka ilyakuti, “Umughane umupalamani wako ukuyana namumo wiyighaniye wemwenecho.” 10Nanti umuntu amughana uwamwabo, atangamubombela nachimo ichibibi. Ichi cho chifukwa nanti umuntu akumughana uwamwabo, kokuti akuzikonka Indaghilo zyosi.

11Mubaghiye pakubomba zinizi, pakuti muzimenye ukuti akabalilo kakwana akakuti mulamusye mutulo. Pakuti akabalilo akakupokeliwa kali papipi nkani ukuchila akabalilo kako tukandilagha pakusubila. 12Ubusiku buli papipi pakumala, umusanya ghuli papipi pakwanda. Po zagha tuzileke imbombo izya muchisi. Zagha tuvwale ivilwilo ivya bwite ivyakulwila pamusanya. 13Zagha tulanjizye inkalo inyiza ukuyana na bantu babo bakwenda mu lukozyo ulwa musanya. Tutakabe bantu bapafu pamo baching'wela, tutakabe bamalaya pamo bapopo, tutakabe balombwa pamo bakabini. 14Loli umwenecho u Mwene u Yesu Kilisitu abanje chilwilo chinyu icha bwite, sona mutakakonkaye ivinyonywa vyinyu ivibibi ivyakupapiwa navyo, nukubomba vivyo ghakulonda.

Currently Selected:

Aba Loma 13: LMBNT2016

Highlight

Copy